[ دعوة للاجابة والاستفادة ]ما هو أكثر جهاز من اجهزتك المنزلية أستفدتي منه أو ندمتي على شرائه؟

[شاطئ بلا رمال]

كلامك مزبوط يا أم يمنى
والأختلاف إنه فيه أجهزه ثانويه في بيت تستعمل مره في الشهر بينما تكون في بيت ثاني أساسيه واستعمالها حتى عدة مرات في اليوم الواحد تختلف حسب طبيعة حياة كل عائلة
وكثرة الآلات للأسف هذه ضريبة التطور والحضاره والحياة الماديه تشتغلي وتجري طول اليوم باش في الآخر تشري بيها ألات تساعدك في توفير الوقت اللي أصلا تقضي فيه في الشغل هيا حلقه متصله، وكثرة الإنشغلات وماتحسيش باليوم
زمان كانت الحياه بسيطهههه وتحسي بالوقت والنهار طويل وتلقي وقت لكل شي توا كله جري في جري والوقت ماعادش فيه ومش ملحقين.

[الساجدة لله]

بالنسبة ليا انموووووت في كل قرابيج المطبخ ومانكدبش عليكم نحب نقتنيهمحتى لو ما نستعملهم , الله غالب البعيدة دودة تركبني كان ماناخدهم ههههههههه , متلا انا الغلاية الكهربائية عندي يوميا لازم نستعملها هي والة التست والشواية لان الشنيبير يحب المشاوي سواء لحوم او اسماك او دجاج والاكثرية اسماك ودجاج وحتى الخضار المشوية او البروسكيتا بدل مانديرها في الكوشا وفعلا زي ماقالت ام يمنى مش كل شئ نستعملو فيه يوميا وبارك الله فيكم على التفاعل ويالله انا نستنى في البقية اللي ماخشتش

[دلوعة زوجي]

اقتباسالمشاركة الأصلية كتبت بواسطة دلوعة زوجيالسلام عليكم
الموضوع مفيد جدا
ألاتي إلا استفدت منهم غسالة أتومتيك بابها من فوق تشتغل مثل الغسالة العادية كذلك ماركة بانسونيك ومكنسة كهربائية،ست البيت ،مضرب الكيك،مفرمة اللحم الكهربائية مطحنة اللوز يدوية وحدة مولنكس والتانية افضل ماركة مانعرفش لكن شكلها زي مكينة اللحم ولونها ابيض بلاستك خلاط كهربائ محضرة الطعام كاملة من مضرب الكيك والعجانة والخلاط والرحاية متاع التوابل واسعة معصرة الليم والفواكه وامواس مفرمة الجبن (لكن المعجنة مااستخدمتهاش لان منعرفش أي موس نستخدم) الة الشحن متاع الضي استفدت منها وقت الحرب لما يهرب الضي قلاية حجم الصغير،فرنيلو وكوشة كهربائية وطنجرة الضغط.
ألاتي إلا مااستفدتش منهم مكنسة كهرباية متاع العصا فسدت من تاني مرة مكينة البيتزا والشوية الكهربائية كل ماانطيب حاجة تنحرق فيها

حبيبة الشواية لازم توقفي عليها الباين حرارتها قوية لو فيها زر انقاص الحرارة معش حتنحرق منك الحاجات اللي تبي تشويها او حاولي توقفي بحداها وياريت تقولي شن نوعها بش ننصحوك اما العجانة انا مفهمتش شن تقصدي بالمووس اضني تقصدي مفرمة الجبن نقوللك صوريهم ونزليهم ونقولك اي وحدة تستعمليها

‏
بارك الله فيك اعذريني على تأخري في الرد لاني ادخل بااستخدام الموبايل ولم أعرف كيف اضع الصور وكم مرة طيبتي حاجات نبي نشارك بهم لكن معرفتش كيف نحط الصور بالاضافة لضعف الكونكشن،الشواية حرارتها قوية ومافيهاش زر إيقاف ونوعها ‏black& decker‏ وحتى محضرة الطعام نفس الماركة لامش مفرمة الجبنة العجانة فيها 3 شفرات واحدة فيها الحديد والثانيات بلاستك مكتوب عليهم العجن والقطع والخلط شبيه بالموس متاع ست البيت و متاع الجبنة بروحهم نعرفهم

[مغتربة 7]

دلوعة ياريتك تقدري تنزلي صور الشواية بلا اند ديكرس نعرفها هذه من اكثر الماركات فى كندا وامريكا
وبالنسبة للعجانة حسب ما فهمت من كلامك فيها 3 شفرات يتغيروا الموس تقرضي فيه وترحي فيه اللوز واي شي
والبلاستك للكريم او البسكويت يعجنه
والاخيرة للعجن حسب ما تصورت عندي وحدة ان شاء الله انزل صورها حتى اني ..

[شاطئ بلا رمال]

دلوعه بلاك أند ديكر شفت أكثر من واحده شكت منها وأني منهم خودي ديما حاجه مضمونه ومعروفه واجود زي مولينكس وتيفال مثلا أو تكون حد مجربها والأخت ساجده تقدر تفيدك لأنه عندها خبره ومنزله حتى موضوع بخصوص الشوايه الكهربيه وفيه موضوع للأخت أم ساره شوفي الموضوعين وأكيد حاتستفيدي وتكون عندك مرجعيه لما بتشري
وبالنسبه للأخت مغتربه ملاحظه بلاك أند ديكر اللي في ليبيا تجميع الصين تقريبا وممكن فيها حتى أجزاء مش أصليه مش زي اللي برا والله أعلم.
تحياتي للجميع

[دلوعة زوجي]

أختي مغتربه وشاطئ بلا رمال بارك الله فيكم عندى مشكلة في تحميل الصور حاولت أكثر من مرة لأن ندخل بالموبايل مش بالكمبيوتر،وأنا الاجهزة شاريها زوجي من قبل

[خدوج]

ربى يحفظكم تهبلو مش عاديات بكل
وان شاء الله كل وحدة تدير اللى خاطرها فيه من الالات
قولوا امين امين امين
بس نبى الة الكابتشينو ياريت سجودة والاخت ام يمنى اللى منزلتها تفتح موضوع مستقل لها
كتبت بكرى الظهر كلام (هللللللللللللللللللللللللللبة)
اهى اهى اهى
مالقيت ولاحرف منه

[الساجدة لله]

اقتباسالمشاركة الأصلية كتبت بواسطة خدوجربى يحفظكم تهبلو مش عاديات بكل
وان شاء الله كل وحدة تدير اللى خاطرها فيه من الالات
قولوا امين امين امين
بس نبى الة الكابتشينو ياريت سجودة والاخت ام يمنى اللى منزلتها تفتح موضوع مستقل لها
كتبت بكرى الظهر كلام (هللللللللللللللللللللللللللبة)
اهى اهى اهى
مالقيت ولاحرف منه

دوجي حاضر من عيوني بس النت عافسة فيا عندي موضوعين نبي انزلهم ودرهلي كبدي النت الله غالب ايفددو فينا يقول من جيوبهم يخلصو فيه النت متع الواي ماكس

[دلوعة زوجي]

السلام عليكم لقيت صورة محضرة الطعام متاعي في النت والشفرات إلا تكلمت إلا في اليمين
http://www.live.com.eg/shop/componen...508cd8399d.jpg

[مغتربة 7]

وخيتي دلوعة تشبها لمتعي بس اني ماركة فيلبس
والقطع متعي اقل
انت عندك حتى الى تصنع الى ايس كريم
وطبعا الصورة مش واضحة هلبة بس الباين فيها هلبة قطع