[مشاركة العيد في ركن الأطباق الرئيسية الليبية ] رشدة الكسكاس من مطبخ أم يمنى

[أم يمنى]

طبعا احنى الليبين من أكلاتنا المميزة ( رشدة الكسكاس ) وكل واحد يخش الحوش ويشوف حوسة الرشدة والدقيق اللى محوس الدنيا , يفرح لانه بيتغذي رشدة وكل وحدة تقدر تسأل وتتأكد من خوتها والا راجلها ,
وعندى موقف مستحيل ننساه مع ألة الرشدة ,
هذا ياستات من حبى للرشدة , دورت هنايا على الالة ولما شريتها ماعجبتنى لانها تطلع فى العجينة غليضة شوية , ولما روحت لليبيا , شريت وحدة وجبتها معاى للامارات , وفى مطار دبى ’ شدتنى الشرطة وقالوا : شنى فى الحقيبة متاعكم .
قاللهم راجلى : هذه شنطة زوجتى ,(( نفضني طول )) وطبعا زعلت وهذه قصة ثانية .
قلتلهم : شن فيه .
قالوا : فتشوها فيها حاجة حديد وثقيلة .
وياحشمتى شدوا الشنطة وفتحوها قدام المسافرين وطلعوا الالة وخفت يأخذوها قلتلهم : هذه ماكينة الباستا .
وضحكوا عليا وردوها , ولما روحنا قعدت نبكى لان الموقف كان مخيف جدا , وزوجى كان يضحك عليا , وانى زعلانة منه , وقعدت هذيكا الالة شهور وانى حالفة عليها وزوجى يقولى :هيا ديريلنا الرشدة . وانى معندة نين طاب خاطرى وبعدين قعدت ديمة نديرفيها ,
واليوم قلت قبل مايكمل لحم العيد خلى نذوقوا الرشدة بيه .
ومقاديرها الكل يعرفها ( دقيق وماء وملح ) وأفرديها فى الالة .
ابدى برقم 1 وبعدين 3 وبعدين 5 وبعدين 7 وبعدين 9 وفى الاخير جهة الثانية اللى تطلع فيها العجينة خيوط .
وبوخيها وافككيها بين ايديك بشوية زهر .
ورديها ثانى فى الكسكاس ولما تتبوخ كويس حطي عليها شوى طبيخة وحببيها .
نسقيها فى صونية وسقيها بالبصلة واللحيمات .
قدميها مع سلاطة ومسير وبالهنا والشفا .

[خدوج]

صار عندك موقف من ماكينةالرشدة(ياخوافة)ههههه
يسحابوك شن بتفجرى هههههه
عالاقل تقعد ذكرى ومع الايام تصبح عندك موقفيضحك
والله يديم سعادتك

يسلم ايدياتك ام يمنى
ويسلم الصفرة اللى تشهى
وماننحرم من جديدك الرائع

[الساجدة لله]

تسلم الايادي ياغالية الرشيته تهببببببل ماشاء الله لاقوة الابالله

[مغتربة 7]

ماشاء الله رشيدة تسهف
تسلم الايادي حبيبة
وصحتين على قلوبكم

[ام صهيب]

سلم ايدياتك وعيدك مبارك
ناويه غدوة بنديرها غير طحت فى ماكينة جهة الرشتة اتجى لاصقة لازم انفكها بايدى لكن وراها

وعلى قولتك بالحمات العيد

[بنغازية]

ياسلا م عليها يسلموا ايديك

[أم يمنى]

مش عارفة عندى حساسية من التقييم , وكل ماندير حاجة نبدأ نراجع فى التقييم , طماعة شن بندير , والله كان تلغوه التقييم أحسن , لانكم بخيلات بخيلات بخيييييييييلالالالالالالالالات .
لوعجبكم موضوعى راكم قييمتوه , وبنقوللكم حاجة شن رأيكم كل ماتمروا على موضوع وتكتبوا الرد مروا
ع التقييم مش ح يأخذ منكم وقت , هى كبسة زر .
( مش على موضوعى بس , لكل مواضيع المنتدى , خلوا مثلا يوم معين تنوى أنك تقييمى كل موضوع تخشيه ).
حييه توا ماعادش تخشوا لمواضيعى , شورنى غلطت ,توا تقولوا ( والله ماينفع فيها الرد ).

[Om Saga]

تسلم إدياتك ياأم يمنى
ورشدة كسكاس تسهف
بس ليش ماشاركتيش بيها في المسابقة
ندخلك بيها ؟؟ تبي نعدلك العنوان وتخشي المسابقة
وأحلى تقييم لعيونك غر يرضى السمح بس
وفعلا إنتي ومواضيعك منورين المنتدى
والتقييم لموضوعك أيضا

[أم يمنى]

الله , يا أم سجو , كلامك حلو ومترتب ,
ومشكورة ع العرض , وجوابى ايه ايه , عدلى موضوعى ودخلينى المسابقة , مش عارفة كيف ماخطرش عليا .
وشن رأيك ع كلامى فى التقييم .

[Om Amory]

ماشاءالله يسلمو ايدياتك ياقمر

سفيره تهبل