السلام عليكم ورحمة الله وبركاته :
يوم العيد طبعا درت العصبان , وتلقيت هدية وانى حايسة فى هذاك العصبان , مش ح نفتحها الا لما تكملوا معاى أكلتى
, وهيا مقادير العصبان زى عند أى وحدة منكم :
خضار : بقدونس , كسبرة , نعناع , بصل أخضر ,( طبعا رباطى )
طريفات من لحم الاضحية , وكبدة , وقلب , وشوية شحم متع ستارة البطن .
بهارات ,أفتحى دولابك وطلعى كل البهارات اللى تلقيها .
وانى راهو عينى ميزانى .
ونقرض خضرتى ونخلط كل المقادير مع الزيت وطماطم معجون والرز المصرى .
هذا التمر الدقلة التونسى , بعثه لجارتى وقلتلها , تو نلحقلك العصبان بعد ساعتين .
ونبدأ فى حشو المصارين ,وللامانة : شفت وحدة مصرية فى منتدى مصورة كيف تحشى المصارين , ان شاء الله تكون واضحة الصورة , وهى تحط فم المصران فى الخضرة وتفتحه بيديها الاثنين وتبدأ تلم فى الخضرة بصبعها وهى أسهل من أنك تشدى المصران فوق وتحشى بطريقتنا المعتادة , واختصرت عليا هلبة وقت ,
بعد ما تكملى الحشو , أثقبى بعود الاسنان أو بابرة كل المصارين , حتى لاتنفجر أثناء الطهى .
حطى طنجرة ع النار وفيها كمية من المية ولما تغلى حطى فيها العصبان , ولو ماسدك حطى فى الكسكاس .
خليه ع النار حوالى ساعة ونصف تقريبا ,
قدمته مع فاصوليا بالكرشة , ورز الخلطة .
عارفتكم تراجو فى فتح الهدية , باهى :
الهدية كانت عبارة على باكيت من الشكلاتة الفاخرة ,وفرحتى هلبة لانى من عشاق الشكلاتة ,
وسلامتكم حبوبات .
المفضلات