[بسكويت بالشوكلاته] من مطبخ saliamr

[saliamr]

السلام عليكم

كيفكن يا غاليات

من فترة شفت مقدار لبشكوط بالشوكلاطة وعجبني ف كتبته بس معش درته نظراً لظروف البلاد وتقدرن تقولن اني حرمت هلي من انهم ياكلوا الحلو حتى في رمضان، هو مش الحلو بس رمضان اللي فات قللت الطبخ وتميت مقتصرة على شي بسيط دوب الفطور تضامناً مع الثوار، والحمدلله ابتعدنا ع الاسراف بس عد مرات كي يعزموا نقوم بالواجب ^_^

المهم نردوا للبشكوط درته وجت طعمته من الأخير رووعة ملوحة البشكوط مع حلاوة الشوكلاته دايرة تركيبة مش عادية

نبدوا بالمقادير:
كوب زبدة نا استعملت قالب 200 غرام
كوب سكر ناعم
كوب كاكو
ملعقة صغيرة فانيليا
ثلاث ارباع ملعقة صغيرة ملح
صفار بيضة
كوب ونص دقيق

الطريقة:
نبدوا طبعا بالزبدة مع السكر بعدين نضيفوا الكاكوا والفانليا والملح واخر شي الدقيق

تقدري تفردي العجينة بعد ما تحطيها شوي بالثلاجة بين ورقتين زبدة وتقطعين بالشكل اللي تبيه
بس نا كورتها كور صغيرة وحطيتها في الكوشة، ماتاخذش وقت واجد وعلى حسب حرارة الكوشة اللي عندك
طبعا لازم تكوني مسخنتها قبل ب10 دقايق ع ال160

بعد يطيبن تكوني مذوبة شوكلاطة في حمام اميا
اعذرني ما صورتش الخطوة هذي لأني كنت بروحي وحست شوي
وزادت الشوكلاطة دارت جو شين وماباتش تذوب الا بعد كثرت الزيت

كنت ناوية نذوب شوكلاطة بيضاء وندير بيها خطوط فوق الشوكلاطة السودا بعد تنشف بس خفت تعطلني لهكي استعنت بالفارمسيلي وجا شكلها حلو وطعمها ما ينشبع منه

وإن شاء الله يعجبكن.. صحتين

[مغتربة 7]

ماشاء الله بسكويت يسهف
تسلم الايادي حبيبة
طريقة خفيفة وساهلة ان شاء الله انجربه
تقبلي مروري

[الساجدة لله]

تسلــــم الايـــــادي ياغالـــــية بســــــكوت روووووووعة

[زهرة البنفسج]

ماشاء الله ربي يبارك والله سهفتيني

[saliamr]

ماشاء الله بسكويت يسهف
تسلم الايادي حبيبة
طريقة خفيفة وساهلة ان شاء الله انجربه
تقبلي مروري

تسلمي على مرورك، وهو فعلا دورته خفيفة وإن شاء الله تديريه ويعجبك

[saliamr]

تسلــــم الايـــــادي ياغالـــــية بســــــكوت روووووووعة

الله يسلمك، صحتين

[saliamr]

ماشاء الله ربي يبارك والله سهفتيني

تسلمي حبوبة، وان شاؤ الله اتديريه ويعجبك

[خدوج]

يسلم ايدياتك
منظره مش عادى
واكيد الطعم اروع
يسلم يدياتك

[ام صهيب]

سلم ايدياتك

شكله ايهبل صحيتى

[ناني2007]

يسلمو ايديك غاليتي ...بسكويت رائع