[استفسار]عن الرشده

**jolia** · 11-23-2011, 10:37 AM

اخواتى العزيزاتى \ اريد ان اعرف سبب التصاق الرشدة فى التبويخة الاولى

**guidona** · 11-23-2011, 11:19 AM

اعتقد العجينه لما تعجنيها خفيفه ادا اتني عاجنتها المقصود الرشده الافضل اتكون متماسكه
هدا اولا
وتانيها لو شارتها واتيه ياريت اتحطي قطرات زبده او زيت
هدا حسب علمي وان شاء الله اخشو الشاطرات ويفدونا
تحياتي

**Om Amory** · 11-23-2011, 02:16 PM

حبيبه أكيد عاجنتيها رطبه

خليها تكون متماسكه شوي

**زهرة البنفسج** · 11-23-2011, 03:33 PM

للاسف حتى انا زيك

**مغتربة 7** · 11-23-2011, 04:20 PM

حبيبة زي ما قالوا الاخوات العجينة لاازم اتكون يابسة هذه حاجة
والحاجة التانية لاازم تخليها شوية فى التبويخة الاولى يعني مش تحطي وتحولي هكي تكون معجنة
خليها شوية لان تحسي انها تغيرت شوية يعني لما تحوليها تنحل على طول معاك وما تكونش معجنة
ولو جاتك العجينة رطبة ومعاش عرفتي عبيها بالدقيق عند الفتح
يارب انكون فدتك
تقبلي مروري

**nonna** · 11-23-2011, 04:51 PM

عزيزتي بعد ماتحليها على الرقم المطلوب خليها تجف شوية قبل ماتقرضيها من جهة الرشتة يعني ستفيها على سفرة اللوح او الطاولة اللي تشتغلي عليها ومابين ماتكملي مجموعة ورقات تكون الأولى جفت لكن ماتخليهاش تجف لين تتكسر وبالممارسة توا تفهمي قصدي
وان شاء الله صحتين علي قلبك

**شاطئ بلا رمال** · 11-23-2011, 04:55 PM

الأخت جوليا والأخت الغربه صعبه
نبي نقوللكم على عدة ملاحظات إن شاء الله تستفيدو منها
أول حاجه نسمو بسم الله وعلى بركة الله ونبدو
1-ضيفي لعجينتك أثناء العجن قطرة زيت تساعد.
2- العجينه تكون يابسه يادوبك تلايمت بالميه وبعدين تخليها ترتاح تحسيها ولت أرطب تسبكيها تاني وتخليها ترتاح.
3- تفرديها على رقم 1 أوسع حاجه في الماكينه متع الباستا بدون دقيق وتطبقي عجينتك على إثنين وتدخليها تاني في الماكينه على رقم 1 تعاودي العمليه هادي 3 أو 4 مرات وبدون دقيق، وبالطريقه هادي العجينه تنسبك عندك كويس ( طريقة والدتي ) وتحسيها فعلا إنسبكت وحتى لما تقطعيها بجهة الرشده ماتلصقش في بعضها لما إتديري الخطوه هادي.
4- ولما تبي تكملي وتحليها على باقي الأرقام رشيها بالدقيق كويس في كل مره.
5- بعد ما تكملي لما تبي تبوخيها غربليها من الدقيق، وتقدري ترشيها بقطرات من الزبده أو الزيت زي ماقالتلك الأخت غيدونا.
6- وخليها تبوخ لين يجمل عليها زي مايقولو تاخد حتى ربع ساعه.
جربو هالخطوات وإن شاء الله تنجح معاكم، إن شاء الله غير عرفت نوصللكم المعلومه وقولولي شن صار معاكم.
ونبي نقوللكم نصيحه تانيه أني إنفضل إنك تعجنيها وتبوخيها تبويخه وحده من اليوم اللي قبله لما فاضيه العشيه مثلا وتدسيها في الثلاجه أو الفريز ولما تبي إتديريها تجيك ساهله تبوخيها التبويخه التانيه وخلاص لأنها شغلانه بصراحه.
وإن شاء الله الكل يستفيد وربي يوفق الجميع.
خطوه خطوه ومع التجربه الواحد يتعلم مافيش حد جي من بطن أمه يعرف كل شي كلنا تعلمنا والحمد لله.

**أمـ ساره** · 11-23-2011, 06:19 PM

ماشاء الله الحبوبات ما قصروا ربي يحفظهم

شاطئ بلا رمال

شرح وافي وواضح ماشاء الله عليك حبيبة

ياريت تنزلي موضوع عن الرشدة حبوبة حتى نستفيدوا منها كلنا

ويكون بالصور حتى توضح الخطوات أكثر

عجبتني طريقتك هلبة لو كتب ربي انجربها بارك الله فيك