[تمت الاجابه] طريقة الفاصولياء الخضراء

[سنيورة]

السلام عليكم اخواتى كيف حالكم
انى عضوة جديده فى هذا المنتدى الرائع الذى ابهرنى بشكله ومواضيعه واعضائه الاكثر من رائعين

واليوم حابة نطلب منكم طلب وهو طريقة طهى الفاصوليا الخضراء لانى من عشاقها

وبينى وبينكم خطيبى يحبها هلبه وانى مانعرفش نطيبها لانه فى حوشنا مافيه حد يحبها الا انى لذالك قليل النادر ما ماما تديرها ومانكذبش عليكم مش حلوة تدير فيها فاليوم حبيت نتعلم تطييبها وطالبه مساعدتكم ياريت تساعدونى

ومشكورين مسبقا

[شاطئ بلا رمال]

ربي يهنيك إن شاء الله ويعقد عسلكم إنتي وخطيبك
حبوبه تبي الحق أني والله ماندير فيها هلبه
بس نبي نقولك بعض النصايح
هيا مافيهاش علم راهو
طبيختها زي أي طبيخه عاديه وتكون أحلى باللحم الوطني خليك كريمه في اللحيمات
ولما قريب يطيب اللحم ياخد من ساعه إلى ساعه ونصف إتضيفي الفاصوليا قبل ماتطفي النار بثلث أو نصف ساعه
الفاصوليا بعد ماتغسليها بالميه تاخذي كل وحده تتنيها بإيدك لوتكسرت تكون فرش تنحيلها الطرفين الراس والعقب وتقسميها على ثلاثه على حسب طول قرن الفاصوليا
ولو قعدت تنتى معاك ومرنه معناها ذابله ولوحيها
وفي الطياب يإما تحبيها طايبه على الآخر وإلا فيها تقرميشه خفيفه (اللي نفضلها أني) حاجه ترجعلك إو كيف مايحبها خطيبك وتكون الفاصوليا والطبيخه فيه تناسب يعني مش الفاصوليا شويه والطبيخه هلبه وإلا العكس والوالده أكيد حاتساعدك وربي يحفظهالك.
وصحتين مقدما.

[jolia]

ياحبوبة طريقة شاطى بلا رمال هى الطريقة الصحيحة طبيخة عادىة حطى فيها الفاصولياء الخضراء بعد تنظيفها

[Om Amory]

بصراحه أنى ماعمرى درتها لأنى مانحبهاش

وإن شاءالله اللى تعرفها تقول عليها

وشاطئ وجوليا قالولك عاديه بارك الله فيهم

[ام تغريد]

السلام عليكم ورحمة الله وبركاته

ماشاء الله شاطئ اعطتك الطريقة المزبوطة وعندي طريقة اخرى لعمل الفاصوليا الخضراء وهي نقطع الفاصولية قطع ونضعها في طنجرة ماء ونتركها تغلي على النار
وفي وعاء اخر نضع قليل من الزيت ونضع فيهم شوية ثومة تم طماطم اخضر مقطع صغيروفلفل اخضر مقطع
وخليهم لين يذبل الطماطم ثم نضيفله شوية ملح وشوية بزار وفلفل اسود وقرفة ونضيفله شوية امية من ماء الفاصوليا ونتابع الطبخ باضافة الماء كل ماحتاج الامر وفي الاخر نضيف الفاصوليا ونخليهم لين اتحسى بنزوح الماء اطف عليها وقدميها الصراحة وصفة خفيفة وبسيطة وان شاء الله لما نشريها تو انزلها بالصور

[hana-99]

طريقتي انا في تحضير الفاصوليا الخضراء :
افرم البصل فرمآ ناعمآ ثم اضعه في ملعقة زبدة سائحة مع قليل من زيت الزيتون الساخن حتي تشقر شوية اضيف ثوم مدقوق مع شوية كزبرة يابسة وقرن فلفل اخضر حار وشوية ملح حتي تذبل ثم قطع من لحم الخروف مقطع صغيرآ رأس العصفور -نقلبها مدة عشر دقائق ونضيف الفاصوليا المقطعة معها ونزيد نقلب حتي يجف الماء تمامآ وتتحمر شوية مش هلبة ونضيف عصير طماطم معصور في الخلاط ومصفي وملعقة من صلصة الطماطم ونخليها تغلي شوية ونضيف الحرارات المفضلة والفلفل الاسود وبعدين نضيف كمية من الماء الساخن يكفي لانها تتطيب , يقدم معها رز محمر بالشعيرية وسلاطة خضراء ..

[سنيورة]

ربى يحفظكم ليا ويخليكم يارب مشكوورين جدا وبارك الله فيكم وسامحونى تعبتكم معاى

انى جربت طريقتك يا شاطئ بلا رمال والحق طلعت معاى زى العسل طبقتها حرفيا زى كلامك بالضبط وماما تفاجئت فيها كيف جت حلوة وقتلى كيف درتها لكن ماقلتلهاش هههههههههه سر المهنة :d

مشكورين مرة تانية وربى يحفظكم يارب وانتظرو منى ابداعاتى مع ارفاق بعض الصور

[شاطئ بلا رمال]

الحبوبه جوليا مشكوره على المرور والحبوبه أم عموري تسلمي
ماشاء الله يأم تغريد وحنان 99 تسلموا على الطرق والأفكار الجديده أكيد حانجربهم ربي يبارك فيكم
الحبوبه سنيوره باين عليك صبيه شطوره وناشطه ماشاء الله عليك فرحتلك اللي نجحت معاك وإنسترتي مع خطيبك ربي يخليكم لبعض ويحفظلك الوالده ومافيش تعب حبوبه تفضلي، هههههههههههه ماتقوليش على سرنا:d نستنو في إبداعاتك.