[خبزة الفرن] من مطبخ saliamr

[saliamr]

السلام عليكم

في الحوش نديروا في خبزة شبه يومي إلا في حالات يكون الدقيق ناقص، والخبزة اللي نديروا فيها معروفة في عيلتنا يعني امي وصبايا اسيادي يديرن فيها، بس بصراحة ومانشكر في خبزتنا من ايدين امي الله يحفظها غير
وطبعاً كبرت ونا نشوف امي وبعدين خواتي الكبار يديرن فيها وبالتالي حتى نا تعلمت نديرها، بس بطيئة شوي مش كيف امي بروفيشينال فيها ربي يخليها ليا

المهم نجوا للخبزة، بالنسبة للعجينة على حسب مقدار الدقيق
في المقدار اللي نديروا فيه واللي صورته
3 كاس دقيق
2 ملعقة صغيرة ملح
2 او 3 ملاعق كبار سكر
ملعقة ونص كبار خميرة
كاس وربع يمكن اقل او اكثر بشوي اميا دافيه
مرات نحط شوية كركم يعطيها لون حلو
وكان تبي تزيدي كمون اسود ولا كمون عريض تقدري

الخطوات:
نحط الدقيق في سونية واسعة، وطبعا في سونية مخصوص دايرينها للعجينة من السواني الستيل الكبار واللي معاهن غطاء، بعدين ندير تجويف او حفرة في وسط الدقيق ونحط فيها السكر والخميرة ونصب شويه عليهم اميا دافية وبعد دقيقة نحط الملح وباقي الميا ونبدا نعجن

وايدك والعجن طول ما عندك جهد وانتي تعجني
بعدين نغطوها ونلفوها (بشوال العجينة) اللي حيكون له وظيفة بعدين ونخلوها بين الساعة ونص للساعتين
هنا شكلها بعد تخمرت واضاعف حجمها

نجوا توا للشغل، تقطعي العجينة لكور متوسطات الحجم، وكان تبيهن اصغر ولا اكبر شوي براحتك
بس حجمهن يكون بحجم فردة البيتزا

وعبال ما كملتي تقطيع اخر كورة تكون اول قطعة من العجين تريحت شوي
طبعا بعد اتقطعي العجينة تحطيها على (شوال العجينة) اللي ذكرناه من شوي وتغطيها
وشوال العجينة عبارة عن قماش الخيشة الثقيل ملبسينه قماش ابيض ومخيطينه عليه بيش كل بعد فترة تفكيه وتغسليه
تقدرن تجيبن قماش تقيل شوي وتخيطنه على 3 طبقات او اربعة وبهكي يكون عندكن ( شوال العجينة)
طبعا الشوال طوله قريب متر ونص ل مترين وعرضه نص متر
تجيبي صفرة واسعة وتفردي اول طرف من الشوال
وبعد تفردي العجينة بس ماتخليهاش لا رقيقة ولا غليظة بهالشكل

تحطيها ع الشوال، وطبعا انتي وحجم الفردة، نا الصفرة بحساب شالت عندي 4 فرادي

بعدين تثني الشوال وتغطي فرادي العجينة وتحطي الباقي على الثنية الجديدة
وهكذا نين ينتهي مقدار العجين اللي يجي 14 فردة
خليها اتريح ثلث ساعة مش اكثر ، سخني الكوشة قبل ب 10 دقايق ويفضل انها تكون كوشة او فرن من اللي ناره قوية كيف اللي حيبان في الصورة
تجيبي الرماية وهذا شكلها

تحطي عليها فردة الخبزة وطبعا الجهة اللي فيها دقيق هي اللي تكون لوطة قطعيها 4 او 8 بس مش تقطيع ع الاخر يعني لازم تكون متماسكة مع بعضها بس لما اطيب تقدري تقصيها بالساهل، ولو تحبيها فردة كبيرة كيف ما هي عادي بعدين تحطيها في الكوشة

لازم النار تكون متوسطة الى عالية شوي وماتاخذ وقت واجد
وهذا شكل الخبزة

لأني كلفت اختي بالتصوير ف ماخذتش صور واجد ومش باينة الخبزة كيف هي رطبة وطايبة كويس

إن شاء الله تعجبكن، وصحتين

[شاطئ بلا رمال]

الحبوبه سالي ربي يحفظلك إميمتك
وتسلم الأيادي خبيزه تشهي
وفكرة الشوال هادي أول مره نشوفها
هذا الشوال حكايه
ياريت إديري عليه موضوع وتنزليه في قسم التجارب والفوائد والنصائح باش الكل يستفيد ويكون الشرح أوضح ومشكوره
تحياتي

[mnona]

تسلم ايدياتك
وربي يحفظلك اميمتك ان شا الله يارب

[saliamr]

الحبوبه سالي ربي يحفظلك إميمتك
وتسلم الأيادي خبيزه تشهي
وفكرة الشوال هادي أول مره نشوفها
هذا الشوال حكايه
ياريت إديري عليه موضوع وتنزليه في قسم التجارب والفوائد والنصائح باش الكل يستفيد ويكون الشرح أوضح ومشكوره
تحياتي

مشكورة اختي على مرورك، وإن شاء الله توا نحط موضوع ع الشوال قريب :d

[saliamr]

تسلم ايدياتك
وربي يحفظلك اميمتك ان شا الله يارب

الله يسلمك، شكرا على مرورك

[الساجدة لله]

تسلم الايدي ياغالية على فكرة الشوال مش عادية ماشاء الله لاقوة الابالله حبوبة
خبيزة تســـــهف وفايحة وتستحق التقييم والتمييز

[Om Amory]

يسلمووو ايديك حبيبه

[مغتربة 7]

ماااااااااااااشاء الله تبارك الرحمان
خبيزة اتجي فى الخاطر
الله يسلم ايدياتك وايدياتك ماماتك ربي يحفظهالك
ويحفظ امهاتنا جميعاً
تقبلي مروري

[saliamr]

تسلم الايدي ياغالية على فكرة الشوال مش عادية ماشاء الله لاقوة الابالله حبوبة
خبيزة تســـــهف وفايحة وتستحق التقييم والتمييز

الله يسلمك، وشكرا على مرورك وفرحت بتقييمك

[saliamr]

يسلمووو ايديك حبيبه

الله يسلمك ويخليك يارب