[عاداتى فى العيد شاركونا عاداتكم ]نسمه ليبيه

[نسمه ليبيه]

عارفه روحى تاخرت فى كتابة عاداتى لكن معليش ان تصل متاخرا خير من ان لا تصل

المهم طبعا يوم العيد يمشي راجلى لصلاة العيد ويرجع يلاقينى مدايره الخبزه ونستنى فيه .واطفالى نايمين فى بيت جدهم فرحانين بالخرفان

ناخد خبزتى ونمشي وبعد التعييد والقبلات على راس العم والعمه يبدا عمى بالذبح واجمل ميزه فى العيد ان الجميع يعمل زى خلية النحل
وانا وسلفاتى نستنوا اول دواره تنزل نتلقوها ونبدوا فيها
وهذا يولع الكانون وهذا يغسل فى الدم وهذه تجهز السلطات للفطور وهكذا
والغداء رز بلاو ولحم على حله زى مايقولوا
وبعد الغدا كل واحد من سلفاى يترك ربع الشاه لاهله
واقوم بتحميم الاطفال وتلبيسهم ملابس العيد
وبعد المغرب ذهبت لبيت عمتى لان العيله كلهم يعيدوا عندها(وتكون هى ام دانيه
ونتلاقوا ونتعشي عندهم طبعا واخذه معايا (الكتف) لعمتى
وثانى يوم نمشي لاهلى ومعايا ربعى عالغداء ونتلاقى انا واختى ونقعدوا لثالث يوم وبس وهذى بعض الصور

[ام ساره وعبدالعزيز]

كل عيد وانتى بصحة وسلامة وطيبى في الخبزة السمحة ههههه
ماشاء الله ولاقوة الابالله تبارك الرحمن هذا اوليدك يانسمة

[حبيبتهم]

كل عام اونتم بخير نسومة
عاداتكم حلوة
شنو في قديد او لا والعصبان امتى
وفي حاجة مافهمتهاش (والغداء رز بلاو ولحك على حله زى مايقولوا)

وربي يخليلك السنفور الباين خاش عليكم الصقع بدري _{عندنا لتوا قاعد الجو تقول صيف
وتسلم ايديك عالخبزة الحلوة}

[مغتربة 7]

ماشاء الله يانسومة يهبل جو اللمة
محلاه عيدكم أجواء حلوة
ان شاء الله ديمة ملمومين وعامرة بيوتكم
ماشاء الله السنفور هذا وليدك؟؟
يجنن ماشاء لله عليه ربي يحفظه ويحرسه
وكل عام وانتم بخير

[نسمه ليبيه]

ام ساره وعبدالعزيز عيونك السماح وايوه هذا وليدى


حبيبتهم تم تعديل الجمله هو لحم على حله يعنى لحم كبير خخخخخخ والعصبان مانديروش فيه اول يوم انا بعد كم يوم بنعزم اهل زوجى وسلفاى وبنديره والقديد انا مادرتش سلم الماما هههههه

والجو عندنا مش غير صقع انا مولعه دفايتين اليوم



وشن رايكن فى حولينا شفتنه كيف ياخد فى اللقطه الاخيره تقول عارفنا نصوروا فيه

[حبيبتهم]

اها توا فهمت نسومة يعني كيف مانقولا احني لحم عالمفاصل

وربي يعينكم عالصقع وان شاء الله ربي يرزقنا الغيث النافع
وحوليكم ماشاء الله عليه خفت ينطحني من الشاشة ههههه

[الصابرة]

ماشاءالله نسومة عليك وفعلا ان تصل متاخرا خير من ان لا تصل
وجو عيدكم مش عادي ويهبل
وطريقة حكيك رائعة
وربي يحفظلك وليدك يارب ويعينكم على البرد
احنا مازال الجو عندنا تمام لكن البيضاء ديمة تصقع بدري ربي يعينكم

[نسمه ليبيه]

سلمك يالصابره وربي يرفع معنوياتك زى ماترفعى فى معنوياتى

[دانية]

ربي يسلملك فروجي ماشاء الله عليه وان شاء الله تشوفيه عريس.. وفعلا زي ماقالت حبيبتهم حوليكم قريب ينطحنا..

[luba]

بسم الله ماشاء الله لاحول ولا قوة الا بالله

اللهم صلي علي النبي المصطفي

سرد في عاداتكم طريقة حلوة وعيشتينا في الاجواء

ربي يسلمكم لي بعض ويحفظكم وتنعاد عليكم يارب بالصحة والسلامه

وقولي الحولي موصيتيه وانت تصوري فيه علينا اماله لين خفت وهو يفنص

مابعد اللي دبحه ههههه