[ خبز القصعة] من مطبخ الجبليه

**الجبليه** · 12-04-2011, 05:03 PM

خبز القصعة

طبعاً هذه القصعة غنية عن التعريف كان جايبها الوالد من الاردن وتجي عليها فطاير وخبزة تهبل
هى تنحط فوق ال حطب لكن أنا نستخدم فيها على المركاب الحجم الكبير

المقادير :-

12 كوب دقيق _ ملعقة كبيرة ملح _ 1 ونص ملعقة كبيرة خميرة فورية _ الماء دافئ يضاف حسب العجن لحد ما يكون العجين متماسك مش يابس ومش رطب هلبة _ زيت للفرد

الطريقة :-
يوضع الدقيق والملح والخميرة فى صحن عميق ويخلطو مع بعض
ثم يضاف الماء الدافئ تدريجياً وتعجن جياً حتى تصبح العجينة ناعمة ولينة
تغطى العجينة وتترك نصف ساعة حتى تختمر

ماصورتش خطوة العجن لاني كنت مستعجله لان عجنتها بعد الفجر يوم العيد الكبير

تقرص العجينة الى اقراص وتوضع فى سفرة مدهونة بالزيت وتدهن الاقراص بالزيت حتى لا تكون قشرة

توضع القليل من الزيت فى سفرة ثانية ونأخذ قرص ونفرده فى السفرة المدهونة

سر هذا الخبز طبعاً فى هذه القصعة

نضعها على المركاب على نار متوسطه ولما تسخن نضع عليها القرص المفرود

عندما يستوى من تحت نقلبه على الجهة الثانيه

بعد خبز من 3 الى 4 خبزات نحضر فوطه مبلولة ومعصورة ونمسح بها القصعة بسرعه لتنظيفها

وهذا شكلها النهائي

ويجي عليها فطائر الفتات تهبل

**خدوج** · 12-04-2011, 05:36 PM

ماشاء الله لاقوة الا بالله
خبيزات يطيرو العقل
لا وخبزة حوش وشتاء
الله يحفظك البابا اللى جاب القصعة
ويسلم يدياتك اللى عجنت وخبزت
كنت نشوف فى القصعة هذى قدام المخابز
وخبزتها تهبل نفس خبيزاتك بس اكبر على حجم القصعة
وشفت مرة حتى الخباز يدير فيها مش عادية
تهبل
ومن يومها نتمنى نلقى القصعة
وتوا لمن نزلتى موضوعك اكثر
وياريت تقوللى النار اللى تخبزى عليها هادية والا مرتفعة
وياريت اللى تعرف وين موجدات
وشكر يالجبلية
الله يسلمك

**ام رواسي** · 12-04-2011, 07:36 PM

ماشاء الله
خبيزة اتجى فى الخاطر
سلم ايدياتك

**الجبليه** · 12-04-2011, 08:11 PM

الله يسلمك يارب أم رواسي
وسلمك يارب خدوج وشكراً لدعوتك للوالد والله اندير على نار متوسطة مش عاليه باش ما تنحرق ومش ضعيفه والله الوالده ادير عليهم فى فطاير تهبل وديرها كبيرة