[البراك او الضولمة او سلك محشي مع الكوسا ]مـن مطبـخ mnona

**mnona** · 12-14-2011, 10:48 AM

البراك آو السلك آو الضولمة مع الكوسا المحشية

المقادير

حزمة سلك / معدنوس / شبت / بصل اخضر / طماطم اخضر / لحم أو دجاج مقطع مكعبات صغيرة / حبق مفروم / نعناع اخضر مفروم ( مقدار الحبق والنعناع مش هلبا يعني ما يقارب ربع حزمة بس ) / رشة ملح / فلفل اسود / بزار ( كركم ) / قرفة / تابل / م ك معجون طماطم / زيت زيتون

الطريقة

ناخدو ياحنة هديكة حزمة السلك والا البراك وتغسليها كويس كويس تحولي منها التراب اللي حاصل في التراكين ، وقبلها نكونو موتين الطنجرة فيها مية تغلي ومنقصين عليها النار وأبدي حطي بالمجموعة في المية المغلية وبمجرد ماتتدبل ويتغير لونها قيميمها بسرعة ومتخليهاش عاد لين اطيب

وخليه يبرد شوية وبعدها خودي بالورقة واقسميها زي في الصورة ولو الورقة كبيرة تقسميها على 4 ومرات اكثر

وتبدي عاد تحطي في حشوتك وتلفي ، وكان صادفاتك وريقة زي اللي في الصورة عروقها يابسات خودي براس الموس واضغطي عليها لين تلين

وهكي لين تكملي وريقاتك وتحطيهم في الكسكاس ، وبعدها تكوني ياحنة موتية الكوسا منظفتيها وامورها تمام غير عالحشو بس وستفيها في الكسكاس مع البراك وغطيها وحطيها عالنار ولما اطيب تاكلوه بالهني والشفي عليكم ا ن شا الله ، وان شا الله غير يعجبكم

هي تفضلو للصفيرة درت معاه شربة خضرة وسليطة خضرة وجرجير وزيتون

تعالوا اللطف متحشمين مدو ايديكم هيا

ايه ايه جبت الخبزة والعصير غير تعالوا من غير سبل

**mnona** · 12-14-2011, 10:53 AM

حيه نسيت الرز سقط سهواً راكم تنسووووووووووه

**الساجدة لله** · 12-14-2011, 12:08 PM

تسلم يدياتك يامنونا وصحة اللي كلي وبما اني الاولة خلي نمشي ناكل قبل ماايجو

احلى تقييم ياغالية

**Om Saga** · 12-14-2011, 02:28 PM

موضوع رائع وتنسيق حلو
ومنورةالركن كله إمنونا
وأني خنبت الصنيةكلها هههههههههه ماعنديش معاه الروح
وأحلى تقييم لعيونك

**mnona** · 12-14-2011, 02:30 PM

المشاركة الأصلية كتبت بواسطة الساجدة لله

تسلم يدياتك يامنونا وصحة اللي كلي وبما اني الاولة خلي نمشي ناكل قبل ماايجو

احلى تقييم ياغالية

الله يسلمك ان شا الله شن دقتيه شن رايك فيه بنتها زعمة قنينة أكيد قنينة ( وحدة تشكر في روحها ) هههههههههههههههه

**بنت طبرق** · 12-14-2011, 02:36 PM

تسلمي منونة وصحتين

**mnona** · 12-14-2011, 02:38 PM

المشاركة الأصلية كتبت بواسطة om saga

موضوع رائع وتنسيق حلو
ومنورةالركن كله إمنونا
وأني خنبت الصنيةكلها هههههههههه ماعنديش معاه الروح
وأحلى تقييم لعيونك

ا
لله يسلمك ويبارك فيك وصحتين على قلبك ان شا الله
حتى اني تبي الحق عقلي عقلي حتى لما رفعوني للعيادة واني خلاص قريب نجيب
شميته الساعة 12 في الليل ومش عارف من وين جتني صنته ياسبحان الله قلتلهم نبي ضولمة ونبكي تقولي بنموت كان مكليتهاش ههههههههههههه وفعلا اميمتي الغالية روحت للحوش وشراته وجابتهولي وكليته الله الله على هديكة النبتة والصنة تفحفح في العيادة كلها
عموما صحيت ويبارك فيك واني فتحتلك موضوع ههههههههههههههههههههههه غير خطر علي بالي بس

**نعومي نت** · 12-14-2011, 08:27 PM

صحيتي يا منونة والله ماخاطري غير على خاطرك ناخد شوية مانردكش لانها ضولمة الحق إتجي في الخاطر هيا والشريبة والسليطة ماشاء الله تفتح النفس ماشاء الله سلم إيدياتك