الميكروويف

[jolia]

بنات نبى نسالكن عن الميكروويف هل هو امن صحيا ام ان استعماله له مخاطر وان كان مامون من الناحية الصحية هل استطيع ان احمر الطواجين فيه يعنى يجمر من فوف ولوطا انى مفكرة نشرى واحد

[مغتربة 7]

اهلين حبيبة
بالنسبة للميكرويف ما فيشي اضرار ان شاء الله الاضرار فى الاشعاع الى يطلع فى الخارج يعني لما تستخدميه بعدي عليه
اني ليه عندي 13 سنة والحمد لله ما فيش اضرار
لكن الفترة الاخيرة قل استعمالي ليه لاني شريت كوشة صغيرة افضل من الميكرويف
وبالنسبة للتحمير ما عمري ما حمرت فيه انسخن فيه فقط
وبصراحة تسخينة الكوشة احلى
يعني اني لو تخيريني معاش نشري ميكرويف فى المستقبل وانت زيدي شوفي البنات شن ايقولوا
بالتوفيق

[ام ليبيه حره]

و انا من راي المغتربة
ممكن حاجة وحدة كويسة فيه تذويب اللحم لما يجويك ضيوف على غفلة

[sweet nona]

واني انقوللك نفس الراي هوا ضروري ومش ضروري زي كلام ام ليبية خاصة في تدويب اللحم اكتر حاجة بالنسبة ليا استعمال في هالشي..بس مش للتحمير او القلي ..سلق الخضروات اوتدويب اي شي مثلج حتى الخبزة ..واحيانا كان بتضحكي عيا مرات يتم الغاز فالحوش فجاءة ننضر انطيب فيه قهوة اوكاكاو او شاي تسخين اي نوع من الوجبات خاصة ادا كان عندك تفارق في وقت الغداء للعيلة وطولت عليك
ههههههه بس انشالله انكون افدتك

[عنود الصحراء]

نفس كلام اختي المغتربه والله كفت وفت معندي منزيد بارك الله فيها

[ام صهيب]

هلبه ناس عاجبهم بس لما تشوفى ان الاشعة امتاعه مضرة مش لازم

يعنى لو انت حامل ما تستعمليشى لانة ايدير تشوهات للجنين ربى يعافينا

وبالنسبة ليا استعملته شوية ولوحت ما عجبنيش

[سيدة ليبية]

شوفوا هو ضروري بالنسبة للمرأة العامله والغير عامله , بصراحه في التسخين وفي فك التجميد للحم والدجاج والسمك " حشاكم " كل نوعية باستعمال معين ... وكوووويس في تسخين الخبز وكويس في تسخين وجبات اللي بيتأخر من العيله ... وممتاز في الكيكه السريعه .. يعني في 3-5 دقائق ممكن تحضري كيك ... وفي تعقيييييم الفوط قبل غسلها بصراحه طريقته ممتازه ... وبالنسبه للاشعه ممكن تزبطيييه وتبعدي عنا مش لازم توقفي عليه ... انا ننصحك بيه ...

[الساجدة لله]

ننصحك تاخديه بس يكون من النوعية اللي بابه محكم الاغلاق والحق انا ماعنديش ماكنتش مقتنعة بيه

بس من فترة قريت عليه انه لازم لما تستعمليه تتاكدي ان بابه مسكر كويس عشان ماتنضريش والحق هو كويس

لتسخين والحق ياربي توا نفكر نشريه بس قاعددة نبي ندور ماركة كويسة وهو زيه زي الافران الجديدة اللي توا طالعة اللي تكون زجاجية وكلها تعمل بنفس الكيفية وماتنسيش ان التكنولوجيا ليها فوائدها وليها اضرارها بس انا مفكرة ناخده لان لقيت حاجات في الطبخ مرات تبيها بسرعة والكوشة مش حطيبهالك بسرعة والميكروييف يديرها وانتي واقتناعك

[jolia]

شكرا ليكن وبارك الله فيكن ان كنت مفكرة نشرى واحد لكن توا نحيتها من راسى مرة وحدة

[نعومي نت]

الصراحة اني من انصار إبعد عن الشر وغنيلوا
ما نحبش الميكرويف طالما إن في اقوال متضاربة حول منافعة ومضارة فلذلك مستحييييييييييييييل يخشلي حوش هاذي وجهة نظري الخاصة