[ مقطع مشلتت ] من مطبخ للاهم

**للاهم** · 12-21-2011, 08:26 AM

خير يا بنات
كيف حالكن كلكن
مع الشتا ما ينفع الا الجاري بالقديد
فوحته في الحوش محلاها
تعني اللمة والتهدريزة السمحة والشبع
والنوم الهني
من كم يوم تفكرت حاجة كانت امي ادير فيها زمان لن بويا كان يطلبها
ونحنا صغار انا وخوتي كنا ما نحبوهش
ناكلوها بالسيف
توا بعد كبرنا وبدا ذوقنا يتغير
واقتربت اعمارنا من اعمار اهلنا زمان J
بدينا نفهموا قيمة دقيق الشعير
والابتعاد ما امكن عن الدقيق الابيض
لما في الاول من فائدة
المهم خطر علي :
المقطع المشلتت
قلت نجرب نديره ونشوف
مقاديره عادية ومعتادة
وعينك ميزانك
قديد ودهان
ثوم مدقوق مع قرن فلفل
ملح فلفل احمر بزار
طماطم معجون
طماطم حب
نقلي الجميع
نمرق ونخلي المرقى تطيب
الجديد فيه:
نعجن دقيق شعير وشوية ملح بشوية امية عجينة يابسة (ضروري)
نخليها ترتاح
نمدها – بصعوبة – بالضرابة

بعدين نبدا نقطع فيها باليد كما اتفق
نقولولها "تشلتيت"
نرشها بالدقيق
ونخليها لعند اطيب المرقة
بعدين انغربلها
ونضيفها للمرقة ونحركها برفق مرة واحدة

نخليها علي نار هادئة لعند اطيب العجينة
ممكن تزيدن شوية حلبة كان اشتهيتنها
انا حطيت شوية حبق مقرض في الاخير
يقدم ساخنا ملهلطا يرد الروح
لم اتفرغ لتصويره تم التهامه ما ان دلقته في القصعة

تبقن علي خير

اهي صورة له بس مش واضحة كما يجب
راجني نصوره المرة الجاية
اللي تبي مرة جاية ترفع يدها وتعلق

**حبيبتهم** · 12-21-2011, 03:12 PM

تسلم ايديك عالمقطع احني انديروا فيه لكن بشوية اختلاف عجينة عادية بدقيق الفارينة ونقرصوها كرات صغيرة ولما اتطيب اللمرقة نفتحوا كل كورة باليد كيف الفطيرة لوين تبدا رقيقة ونحطهوها في الطنجرة لوين تجف وترتفع شوية من البخار انحركوها في الطبيخة ونحطوا اللي بعدها وهكذا

**أم أبرار** · 12-21-2011, 03:27 PM

نحن نسموه مقطع مفتت والدقيق نحلطه فارينا وشعير وقبل تنزيله من ع النار نظيف كرويه

**نسمه ليبيه** · 12-21-2011, 05:16 PM

عليك حق

ماوريتينش شكله فى الاخير

صحيحه عليكم

وعجبتنى (ساخن ملهلط)

**مغتربة 7** · 12-21-2011, 05:19 PM

اول مرة نعرفها الاكلة هذه شكلها يميي
الاكل التقليدي احلى اكل
الله يسلم الايادي يارب
وصحتين عليكم

استاحشناك ياغالية عوداً حميداً

**للاهم** · 12-21-2011, 07:52 PM

اقتباسالمشاركة الأصلية كتبت بواسطة حبيبتهمتسلم ايديك عالمقطع احني انديروا فيه لكن بشوية اختلاف عجينة عادية بدقيق الفارينة ونقرصوها كرات صغيرة ولما اتطيب اللمرقة نفتحوا كل كورة باليد كيف الفطيرة لوين تبدا رقيقة ونحطهوها في الطنجرة لوين تجف وترتفع شوية من البخار انحركوها في الطبيخة ونحطوا اللي بعدها وهكذا

حبيبتهم مرور طيب خيتي
تعجبني التعليقات اللي تضيف للموضوع معلومات جديدة وبالذات في الطعام الليبي لذي يختلف من منطقة لمنطقة - بل ويختلف من جدة لجدة فالطبخ موروث من الجدات والجدات من جداتهن وكل حسب منطقتها وليبيا عجين متجانس رائع
منكم نستفيد طريقتك الباين مش عااادية
ممكن تديريه بطريقتكم وتنزليه لنا؟

**للاهم** · 12-21-2011, 07:54 PM

اقتباسالمشاركة الأصلية كتبت بواسطة أم أبرارنحن نسموه مقطع مفتت والدقيق نحلطه فارينا وشعير وقبل تنزيله من ع النار نظيف كرويه

طيب المرور خيتي ام ابرار ربي يحفظها لكِ
انا ديما مستغربة في كلمة مشلتت كنت نقول لأمي بالك اسمه مشرتل بأعتبار اننا نشرتل العجينة
حتى مفتت يصلح لتسمية هذا النوع
عجبتني حكاية حطت الكروية في الاخير توا نجربها
شكرا للمعلومة

**للاهم** · 12-21-2011, 07:55 PM

اقتباسالمشاركة الأصلية كتبت بواسطة نسمه ليبيهعليك حق

ماوريتينش شكله فى الاخير

صحيحه عليكم

وعجبتنى (ساخن ملهلط)

حاااضرين خيتي نسمة ليبية الا ما نعاوده ونحطلك صورته ساخن ملهلط بالبواخ متاعه
طيب المرور خيتي

**للاهم** · 12-21-2011, 07:58 PM

اقتباسالمشاركة الأصلية كتبت بواسطة مغتربة 7اول مرة نعرفها الاكلة هذه شكلها يميي
الاكل التقليدي احلى اكل
الله يسلم الايادي يارب
وصحتين عليكم

استاحشناك ياغالية عوداً حميداً

بطولة عمرك خيتي مغتربة 7 وحشتنيني
ومش غير يميي تاكلي ما تشبعي منه جربيه وادعيلي

**أم أيوب** · 12-22-2011, 01:06 AM

يا سلااااااااااااااااام اليوم كان عشاي في حوش عمي

بس يديروا فيها رقاقة كبيرة ويرموها ولما قريب تطيب يقطعوها بكاشيك اللوح

ويقولو عليها مقطعة رمي

يسلمو ايديك يا للاهم س ياريتك كبرتي الصور شوي

الموضوع: [ مقطع مشلتت ] من مطبخ للاهم

أدوات الموضوع

عرض

[ مقطع مشلتت ] من مطبخ للاهم

معلومات الموضوع

الأعضاء الذين يشاهدون هذا الموضوع

المفضلات

المفضلات

ضوابط المشاركة