[كسكسي بالقديد] من مطبخ نسيبة

**نسيبة** · 12-21-2011, 10:43 PM

بسم الله الرحمن الرحيم
السلام عليكم ورحمة الله وبركاته

كيف حالكم حبيبات ان شاء الله بخير اليوم حبيت نزل اول مشاركة ليا و انشاء الله نتابع

في طبخاتي نسيبة تحبك الطبخ هلبا هلبا لكن في كل مرة يا نحصل في تنزيل الصور

يا مسالة وقت و هذا اللي كان لكن لله الحمد شاء الرحمن ان اقدم

اول مشاركة مساء اليوم هني صبح المهم مع فارق التوقيت

درت يوم جمعة كسكسي بالقديد

منعطلش عليكن حبيات بالنسبة للمقادير

شوية قديد ،، حوال ملعقتين كبارزيت او ثلاثة كان القديد من مفيشه دهان

فيه اللي يخلي فيه يابس و يحطه في الفريز خاصة جماعة الدايت و الحمية و هو هكي احسن

بصراحة ،و ملعقتين طماطم صالصة، شوية فلفل، شوية بزار

ملح،حمص

و خضرتك

كوسا،ا قرعة حمراء، بطاطا ، باذنجان

ناخذ الطنجرة و نحط فيها الدبيرات بعد ما تتحمر البصلة شوية

ونحط قدياتي و نمرقها

الكسكاس نحط فيه البصيلة و الحمص

عاد لين يدبلو ا و اني نحط معهم شوية ملح ، وبزار و حراراتوفيه اللي يحطك فلفل احمر رشة
اني مندريش فيها

و تحت مع القديد نجهز خضرتي ،قريعة خضراء (كوسا) ، و بطاطا و باذنجان اللي عندك

بعدين ناخذ شوية من مرة القديد مش هلباو معها حرارات و بزار

ونحطها على البصلة و الحمص شوية على النارونطفيء

و نبوخ الكسكسي هني درت الواتي

كان في ليبيا راهو متع الحوش اللي صنته من وين و ين

المهم يمشي حاله

وبعد تبويخه هو شمسي معطلش هلبافي تطبيه
ناخذ شوية زهر و حرارات و دهان البصلةزمان عاد شوية سمن
و نسقي بالبصلة و نحط عاد القديات و الخضرة

اني حطيت شوية فلفل على الوجه
هههههه
المسير معنديش في هداقة اليوم
والصوينة الثانية من غيره
راهود نتسنى من زيارتكن حبيات

**للاهم** · 12-21-2011, 11:22 PM

انا نموت في الكسكسو بالقديد مستعدة نديره كمية ونسخن منه كم يوم
نحنا - عرب شرق ليبيا - نديروه في راس السنة الهجرية ونديروه بدف حولي العيد المقدد ونقلوه علي بعضه في المرقة البصلة والحمص والخضار
طريقتك كيف الكسكسو العادي بالبصلة وباين لذيذة سلم ايدياتك

**ام زكريا** · 12-21-2011, 11:43 PM

يا محلا كسكسه ورب يصب لخير عليه

**sweet nona** · 12-21-2011, 11:52 PM

ياعيني ياعيني اول مشاركة وكسكسي بالقديد طووول ياسلام انموت فيها الحاجة بالقديد...تسلم ايديك مع انه الصورة ماطلعتش لكن من الخط طلعت ريحة القديد ههههههههههههههههههههههه

**مغتربة 7** · 12-22-2011, 12:10 AM

تسلم الايادي حبيبة
بس خسارة الصورة ما طلعتش معاي

**أم أيوب** · 12-22-2011, 01:02 AM

يسلمو ايديك نسوبة

بس اسمحيلي يا عسل ننقل موضوعك لقسم الأطباق االرئيسية الليبية

القسم هنا مخصص للأطباق العربية والعالمية

والكسيكسو بالقديد من مطبخنا الليبي الروعة

**الساجدة لله** · 12-22-2011, 11:40 PM

اللــــــه يانسيبة جيتي على الجرح هههههههههههه قديد مرة وحدة هههههههههه

نسيبة حبيبة لقيتك داكرة جماعة الريجيم في القديد ياريت توضحيه وكتر خيرك كان تنزليه في ركن الدايب عندي بالتفصيل , بعد اذنك طبعا هههههه واحلى تقيييم للقديد

**Om Saga** · 12-23-2011, 04:29 PM

يسلمووووووووووووو إيدياتك
أمي تحب إديره كسكسي بالقديد
بس عندك الصور صغاااااااااااااار هلبة
بس يسلمووووووو إيدياتك

**خدوج** · 12-23-2011, 06:06 PM

يسلم ايدياتك عالكسكسى بالقديد
انى مش من عشاق الكسكسى
بس ريحة القديد واصلة من عندك
نسيبة صورك صغيرات
لوكان جبنا زرقاء اليمامة مش حتشوفهم هههههههههه
عالعموم يسلمك طيابة ياحنة
ومنتظرين جديدك