[المقروض المقلى على الطريقة التونسية والعادى بالطريقة الليبية] من مطبخ خدوج

**خدوج** · 12-23-2011, 08:29 PM

المقروض المقلى التونسى

وهذا العادى الليبى

المقادير

4 أكواب سمدينا (واللى يحبه احرش شوى يقدر يخلط كوب سمد مع 3 أكواب
سمدينا)
2كوب دقيق
2ملاعق كبيرة بيكنج بودر(2ظرف ناقص شوى)
2كوب زيت
نصف ملعقة صغيرة ملح

يخلط السمدينا مع الملح والدقيق جيدا ثم يضاف الزيت قليلا قليلا(يبسس)
ويترك ليلة كاملة
واذا ماعندك وقت عادى لو قعد فى الزيت يوم يومين 3 اسبوع اسبوعين
المهم بدون خميرة
لمن تحسى انك بتبدى شغل المقروض ضيفى البيكنج بودر

نحتاج الى تمر معجون..(قرفة..جلجلان..وزيت لعجن التمر)
وحاولى تجهزى التمر قبل خدمة المقروض
حطى التمر مع القرفة والجلجلان والزيت وخلطيهم كويس
ولو حسيت التمر كاسح شوة حطيه شوى فى المكرويف يرطب حاجة صح
وهذا التمر

ونحتاج ماء عطر للعجن
وماء دافى
ناخد شوى من العجينة المبسسة بعد ماضفنا لها الخميرة
ونضيف لها ماء دافى وعطر ونسبكها كويس(والكمية هذه نعجن فيها مرة وحدة وكل مرة ناخد شوى ونخدم عليها)

والحق انى مرات منضيفش فى العطر مع العجن لانى نضيف فيه مع الشراب
وحنزل طريقته ان شاء الله
وهذه العجينة بعد ماسبكناها وتوا بنخدموا عليها

حاولى تلميها كويس لين تولى زى الصورة

وتتبعى الصور

وسكرى عالتمر

وحاولى تخلى التسكيرة لاالاسفل لانه لو خلينا التسكيرة لفوق حينفتح المقروض
ويضيع شكله

وسوى الشكل وقصى المقروض قطع متساوية

واذا كان بديرى مقروض مقلى حاولى تخلي القص صغير صغير يعنى يدوب لقمة وحدة
وبعدى ماتكملى القص حاولى كل قطعةتسويها من كل الجهات وتعطيها شكل مربع
صغير وبدون نقش

وجيبى الطاجين سخنى الزيت ولمن يسخن هدى النار وحطى قطع المقروض وقلبيها لين تتحمر

بدون نقش والمنقوشات اللى فى القلى فضلو من المنقوش قلتيهم

وهى ساخنة طول عالعسل وخليها حسب ماترغبى
وتقدرى حتى تقدميها بعد التعسيل طول
وقطريها فى الكسكاس

ورشى عليها جلجلان (سمسم)
وكلى احلى مقروض مقلى

زززززززززززززززززززززززززززززززززززوم

وهذه قصة المقروض العادى

وطبعا ننقشوه بالنقاشة
وسماح ماصورتش هالنقطة
والمقروض العادى بعد ماتنقشيه مادخليش الفرن على طول خليه يرتاخ على الاقل اربع او
خمس ساعات باش النقشة تشد روخها وتطلع بارزة كويس

ونحطوه فى طاجن الفرن ويكون المقروضات متباعدات لانهاتنتفخ فى الفرن
ويكون الشراب جاهز وبارد يعنى محضر قبله بيوم
وبعد مايطلع من الفرن نصب الشراب البارد عالمقروض السخن
وهذه افضل طريقة لتشريب المقروض يتشرب لين خاطرك يطيب

واذا مستعجلة بيه تقدرى من غدوة الوقت اللى سقيتى فيه المقروض تنحيه وتاكليه وصحتين

واذا مش مستجلة براحتك خليه يومين 3 فى الشراب احسن

وهذه صورته بعد 3 ايام تشرب وتنفخ ماشاء الله

وهذا فى الحافظة

واهى مقروضة ام سجى فى الوسط مقروض الوردة
ريتها ام سجى

زززززززززززززززززوم

والف صحا وهنأ لحبوبات المطبخ الليبى لزوبة

**أم ميوسة** · 12-23-2011, 09:08 PM

ما شاء الله تبارك الرحمن

شغل متقن ومرتب

وصونية المقروض المقلي كلها ليا لاني نموت فيه وبالذات من يديات خدوج

ونبي معاه مقريضة الورده

ههههههههههههه واحدة طماعة

عموما طريقتك تشبه طريقتي بس المقروض المقلي نزيد معاه في منياكة حتى يكون هش

صحيتي خدوج وبارك الله فيك

**ناني2007** · 12-23-2011, 10:51 PM

يسلمو ايديك خدوج المقروض طالع روعة ويجي في الخاطر

**مغتربة 7** · 12-23-2011, 11:24 PM

مااااشاء الله لاقوة الابالله
اشيه على الفالحة بنت بلادي
المقروض هذا اول مرة نسمع بيه اكيد مش عادي
منظره يسهف
تسلم الايادي الى تلتف بالحرير
احلى تقييم لعيونك

**فضااوي** · 12-24-2011, 12:39 AM

ماشاء الله تبارك الرحمن علي ايدياتك ياخدوخ

الله يسلم هاليديات ويبارك في صحتك

لا وقال تريد تنقص سيبي الكوجينة ههههههههههههههههه

**الساجدة لله** · 12-24-2011, 02:37 AM

ههههههههههههه صار ريجيم بالتفصيل ياخدوج ههههههه انت تبي تبعدي على المطبخ اسبوع اتنين تلاته هههههههههههه

تسلم الايادي ياغالية والحق المقروض غالي عليا بس للاسف جربته مرة وممشاش معاي وخاطري انديره لاني انمووووووووووووووت فيه والمقروض التونسي هذا ليا معاه ذكريات في الطفولة تو مرة تانية نحكيهالك

ههههههههههه بس احلى تقييم لعيون دوجتي الغالية

**زهرة البنفسج** · 12-24-2011, 10:36 AM

ربي يبارك ماشاء الله

**ليبية** · 12-24-2011, 11:40 AM

خدوج الله يسلم ايديك الحلوة والله جبتيلي النية في ديرانه بس خايفة منه الحق

درته مرة وجاني حاشا النعمة مأساة
بس قوليلي لازم ن
خلي العجينة ترتاح يعني مانقدرش نديرها في نفس اللحظة