احسن نوع مكانس كهربائية ؟

[# نور #]

بسم الله الرحمن الرحيم

السلام عليكم ورحمة الله وبركاته اللهم صل على محمد وعلى آله وصحبه أجمعين

هذه أول مشاركة وأول موضوع ليا في هذا المنتدى الرائع ماشاء الله ولكني متابعة لأبلة زينب ماشاء الله عليها في المنتدى السابق ونحبها في الله من قلبي ، وبإذن الله ديما في تقدم ورقي

عندي سؤال وان شاء الله نكون في القسم المناسب لاني معرفتش وين نحط سؤالي

نبي نعرف احسن نوع في المكانس الكهربائية لاننا نبو نشرو واحدة للحوش ومحتارين الصراحة نبو نوع يتحمل وعملي ونظيف ، نشوف في الاعلانات عن مكانس تتعبى مية لسهولة تنظيفها بعد الاستخدام لان كان عندنا نوع قديم فيه كيس التراب والغبرة لما تفضيه يحرق الاعصاب وفي نوع شفته في الاعلانات الاوساخ تتجمع كيف الكتلة الواحدة وتلوحيها لكن معرفتش موجودات والا لا ؟ وهل نوعهم ممتاز والا ميتحملوش ..

منبيش فيها هلبة مزايا اهم شي تكنس البساطات وتكون سهلة في التنظيف وتتحمل

نستنى تجاربكم وياريت الاسعار وفي اي مكان في طرابلس .. متردونيش نستنا فيكم

وجزاكم الله خيرا مقدماً

[الساجدة لله]

حبيبة ينقل الموضوع لقسم الاستفسارات المطبخية

نجو للمكانس الكهربائية حبوبة انا ننعتك لمحلات بااذن الله تلقي فيها طلبك بري لمحلات تيفال او مولينكس او

كابريس انا ليا مدة على المنزلية بس ننعتك لمحل تيفال في بن عاشور وهو يدلك مرات تلقي طلبك في مولينكس في محل تبارك في النوفليين وفي واحد تاني وكيل المولينكس في حي دمشق الحق مكانه وين بالظبط مانعرفاش او تمشي لمحلات اللي في غوت الشعال واكيد رح تلقي طلبك عندهم

[# نور #]

بارك الله فيك اختي الساجدة وسامحيني معرفتش القسم الانسب للسؤال

بالنسبة للاسعار ؟ ولو في اي اخت جابت مكنسة من فترة او تعرف حد ياريت تفيدني اكتر .

[الساجدة لله]

والله الاسعار مش عارفة لاكن حتلقي اللي يناسبك بس اهو نقولك من توا راهو تيفال غالي زيه زي المولينكس بس حاجة ماشاء الله تعيش وحتى فيلبس راهو قنينة وااااك تعرفي انا ماعنديش روووح معاهم الادوات المنزلية المهم ديري جولة وبعدين قرري شن بتاخدي

[أم أيوب]

حبوبة انا عندي اثنين

الاولى ماركة سينجر ممتازة قوتها ماشاء الله بس عيبها كيس قماش

من فترة شفت بلاك اند ديكر ماهيش كس

فيها زي الكاس بلاستيك على برة يتجمع فيه حشاك الوسخ

وفيه بطمة تضغطيها يفضى الكاس بسهولة

بس عيبها مش قوية واجد ما تنفعش مع فرش المكرونة

وفي نوعية حلوة خدت منها اختي ماركة بوش المانية ممتازة

[الساجدة لله]

اها ام ايوب ماركة اختك مش عادية وانا عطيتها الخيارات انها تمشي لمحلات طرابلس وتختار هي على عينها وتشوف حتى الاسعار وان شاء الله تلقي اللي يناسبك يانور حبوبة

[أمـ ساره]

السلام عليكم


حبوبة اني شريت مكنسة كهربائية ماركة فيليبس

وبصراحة رووووعة وعملية جداً وفيها هلبة ميزات

وأيضاً تغسل في البساطات والاثاث ومساعدتني هلبة


خذيتها من حوالي 3 سنين من سوق الثلاثاء سابقاً

قبل ما ايهدوه وبصراحة ما نعرف مكان الوكيل حالياً وين


لكن شوفي محلات قرجي متاع المواد الكهربائية

وان شاء الله تلقي عندهم طلبك لأكثر من ماركة

[# نور #]

بارك الله فيكم يا وخياتي ما قصرتو ربي يحفظكم ، مشكورات كلكم اللي ردو عليا استفدت من ردودكم ربي يفرج عليكم .

[الساجدة لله]

اقتباس:
المشاركة الأصلية كتبت بواسطة أمـ ساره
السلام عليكم


حبوبة اني شريت مكنسة كهربائية ماركة فيليبس

وبصراحة رووووعة وعملية جداً وفيها هلبة ميزات

وأيضاً تغسل في البساطات والاثاث ومساعدتني هلبة


خذيتها من حوالي 3 سنين من سوق الثلاثاء سابقاً

قبل ما ايهدوه وبصراحة ما نعرف مكان الوكيل حالياً وين


لكن شوفي محلات قرجي متاع المواد الكهربائية

وان شاء الله تلقي عندهم طلبك لأكثر من ماركة




ام سارة السلام عليكم

حبيبة ياريت تصوريهالنا لاني نبي ناخد وحدة كويسة بس نراجي نرسى على نوع معين وبالنسبة لفيلبس هده اللي تغسل البساطات هده هي الالي ندور عليها بس ماعرفتش وين وين نلقاها اذا تعملي فيا معروف كان صادفك الوكيل متع فيلبس تقوليلي عليه

[# نور #]

نفس طلب اختي الساجدة لله بانتظارك اختي بارك الله فيك