[خروف محشي] من مطبخ Loly_ly

[Loly_ly]

بسم الله الرحمن الرحيم

شوف كيف درت الخروف المحشي .. فى البداية خفت ليفسد منى لكن أصريت أنى أجرب والحمدلله نجحت التجربة وعجبهم العويلة .

خودى سقيطة خروف صغير أنى هكى درت


وتبلته بالاتى : ـ


(ملح - فلفل أسود - زنجبيل مرحى - طماطم أخضر مرحى - طماطم معجون - قرفة - حرارات - حبل الهيل - كركم (بزار) - فلفل أحمر - بصل مفروم)
خديت صحن كبير (ليان) وحطيت فيه الخروف ونقعته فى هالخليط السابق وغطيته لثانى يوم
طيب الرز البلاو أمتاعى العادى اللى كلنا أنديرو فيه وضفتله المكسرات وهيا الزبيب والكاجو واللوز الاحمر وخليته على جنب
خديت الركاب (الغاز الكبير) وحطيت عليه الطنجرة والكسكاس الكبار عرفتوهم أمتاع العراس ولفيت الخروف بالسلفر كله وحطيت فى الكسكاس لين خدى تبويخة باهى لين ولا نص طياب


فى هذه الاثناء ولعت الفرن وخليته يسخن ولما شلته من الكسكاس حطيته فى الفرن حتى أستوى ونحيت من عليه السلفر وخليته يتحمر
صحيح هو يتأخر شوية فى الاستواء لكن جى بنى وصنى


والله يابنات جى مش عادى وبنته زى العسل

ديرو زينى وجازفو وتوا تشوفو النتيجة

[mnona]

عارفة جي بنة وصنة واني مهناش وخليتوه في خاطري ووخيتكم حامل

والله والله لتوا قاعد في خاطري


عموماً تسلم ايديك ياحنة وربي يحفظك ان شا الله في حوشك الجديد ديريه وناكل منه

[Loly_ly]

اقتباس:
المشاركة الأصلية كتبت بواسطة mnona

عارفة جي بنة وصنة واني مهناش وخليتوه في خاطري ووخيتكم حامل


والله والله لتوا قاعد في خاطري

عموماً تسلم ايديك ياحنة وربي يحفظك ان شا الله في حوشك الجديد ديريه وناكل منه

ولا يهمك منونا والله على خاطرك فى أول فرصة
الا مانديره ولا تاخدى على خاطرك

بوسيلى زيكو

[الساجدة لله]

منونا ولولي اقارب طلعتو ياعيني ياعيني ههههههههه

ومنونا طلعت حامل وانا نقول كل يوم ادير في حلو من غير اسم اتاريه البيبي يبيه ههههههههههههه

والخروف ماشاء الله صنة وبنة مش عادي حي عليا انا اللحم ماعنديش روووووووووح معاه لابالك خروف بذاته

[mnona]

اقتباس:
المشاركة الأصلية كتبت بواسطة الساجدة لله
منونا ولولي اقارب طلعتو ياعيني ياعيني ههههههههه

ومنونا طلعت حامل وانا نقول كل يوم ادير في حلو من غير اسم اتاريه البيبي يبيه ههههههههههههه

والخروف ماشاء الله صنة وبنة مش عادي حي عليا انا اللحم ماعنديش روووووووووح معاه لابالك خروف بذاته

ايه ريتي ريتي سجودة ، اختى لولي والخروف داروه واني مهناش مش في طرابلس تخيلي
ولما جيت وروني الصور وحكولي عالجو اللي داروه

لا لا مش حامل ، نحكي علي حملي الاول حتى وليدي طلعت فيه شوفه من الخروف

[Loly_ly]

تسلمى ياسجودة
على فكرة أنى ومنونا خوات وهيا اللى حاكيتلى عليكم
وشجعتنى أن نشترك معاكم فى المنتدى
ولقيتكم أحلى قروب تسلموووووووووووووووووووو

[أم ميوسة]

ما شاء الله

خروف مرة واحدة صحة ليك بصراحة إبداع

موضوع مميز ويستحق التقييم

سلم اياداتك السفرة كلها مش الخروف بس صنتها وصلت لعندي

[Loly_ly]

شكرا يأم ميوسة تسلمى حبيبتى
على فكرة حتى أنتى أكلاتك حلوة ويعجبو فيا
يسلمو إيدياتك

[أمـ ساره]

والله الا صحة ليك قلبك قوي ماشاء الله عليك

خروف مرة وحدة تجازفي بيه


لكن الصورة تتكلم على ابداعك حبوبة

بالهني والعافية على قلب الي كلوه



وربي يسلم ايدياتك الحلوة

وتستحقي أحلى تقييييييم

[Loly_ly]

تسلمى يأم سارة .. صحيح هيا مجازفة لكن صدقينى فرحت لما نجحت .
هو صح لما تسمعى كلمة خروف تحسي فيها حاجة كبيرة
لكن صدقينى ساهل جدا الحاجة الوحيدة المتعبة فيه الوزن
تحتاجى لحد معاك يشيل وينزل معاك والباقى سهل
والتجربة خير برهان جربى ومش حتندمى.