[ المثرودة الشرقاوية ] من مطبخ أم أيوب

[أم أيوب]

ا

لسلام عليكم ورحمة الله وبركاته

كيف حالكم يا غاليات

نبي نحكيلكم قصة سريعة قبل ما نبدا

ايام العيد صورت كم أكلة من عاداتنا

للاسف تصويري كان بالموبايل وصار خلل كل الصور امتسحوا

وجعوني الصور بس أكثر حاجة صورة أيوبي مع خروف العيد

وصور المثرودة لأنها بخد طبق غير عادي

اليوم حملت برنامج استرجاع الصور رجعوا شوية من صور العيد

ولله الحمد صور ايوبي وصور المثرودة كانن موجودات

وفي مجموعة للأسف ما طلعوش

المهم نخشوا على جو الوصفة

المثرودة بطريقة عرب الشرق اللي انا ساكنة وسطهم

هي بالوصف تشبه الطبق المفضل عند سيد الخلق عليه أفضل الصلاة والسلام

طبقه المفضل الثريد

وفي وصف الثريد انه عبارة عن خبز مفتت ومروي بمرق اللحم يؤكل مع اللحم

وكانت عليه الصلاة والسلام لحمته المفضلة هي لحمة الكتف

وعند ناس الشرق اللحمة اللي تكرم بيها ضيفك هي لحمة الكتف

أنا قدمتها لأهلي لما زاروني في العيد في مزرعتنا

طريقة المثرودة ساهلة بس تاخد وقت

تتكون من خبزة تنور مفتتة ومبوخة على مرق لحم ومسقية بالزبدة



المقادير :

للخبزة دقيق حسب كمية المثرودة + ملح + ماء للعجن

تعجن كويس كويس كويس بكل (( الخطوة هدي قام بيها أبو الشباب ما عنديش لها جهد ))

تخليها ترتاح ربع ساعة وتعاودي تعجنيها من جديد

المهم بعد تقريبا ثلاث عجنات ديريها اقراص وغطيها كويس ترتاح

سخني تنورك كويس (( برضوا أبو الشباب تكفل بالمهمة قولولي انتي شن درتي ))

في هالوقت حطيت اللحم عالنار نجهز بيه المرق

اللحم مع مية وملح وبزار وورق غار بس بدون بهارات

ولو كان اللحم مش طازج ممكن تحطي شوي من حرارات الرز اللي مش مطحونة

وخليه يغلي نص ساعة لعند ما تطيب الخبزة

توة نمشوا للتنور

يكون الحطب اللي حطيتيه فيه قعد جمرات في قاع التنور

تعالي رشي شوية مية على ساس التنور من جوة

وارمي خبيزتك بالفردة

من تحت نحب نحط حيطات صغار عشان النار ما تحرقش الخبزة من تحت

(( هالخطوات صنع ايديا وحياة عينيا ))



وغطي تنورك خلي الخبيزة تطيب

في هالوقت جهزي مفرش او اي قطعة قماش نظيفة (( نخصصة لهالمهمة رداء ))

ولما خبيزاتك يتحمروا حوليهم ولفيهم كويس عشان ما تيبسش من الهواء

هنا بعد ماطابوا وتحمروا



بعدين نفتتها قطع صغيرة بكل ونحطها في كسكاس على مرق اللحم تبوخ لعند ما تطرى

ما نسقيهاش بيه نخليها مغطيه لعند ما تقعد طرية



وقت ما تبوخ نسلق دحي وندير شوي تمر معصد عالنار زي البسيسة

نشكله كور ونخليه

نحمر شوي لوز مقشر في زبدة

ندوب الزبدة ويفضل تكون وطنية

نرفع المثرودة من الكسكاس ونحطها في صونية التقديم

نسقيها بشوي مرق مش واجد والزبدة

نزينها بالتمر والدحي المسلوق نقطعة شرائح أو ارباع زي ما تحبي

ونرش عليها اللوز



نصفي المرق في فنجان

ونرفع اللحم في صحن بروحه

وهادي سفيرتنا تفضلوا معانا



وما يطيبش أكل المثرودة الا مع كباية لبن رايب تكون مصنعة من الستيل هههههههه

تفضلوا



ملاحظة صغيرة تقدري ما تديريهاش باللحم ويسموها المثرودة الحلوة

تبوخيها على مية وليمون وقرفة وقرنفل

وتسقيها بحليب مع عسل وطني وزبدة

وقدميها بالمكسرات والتمر

[الساجدة لله]

ام ايوبي تسلم ايديك على المثرودة بس مش هذه اللي نعرفها يديرو فيها في درنة المثرودة اللي نعرفها هي زي الفطيرة وفيها عسل وزبيب ولوز وتمر ومفتتة ومسقينها بالعسل.
ندكر مرة سويت دايرتها والحق مثرودتك عجبتني ربي يعطيك صحيحتك وااااه هكي عليك حق معقولة صور ايوبي مع الخروف مانشوفوهاش ههههه لالا توا اول ماتجيبي البيبي التاني خليه يصور مع خروف البيبي ووريهولنا والا صوريه من النحلات هههههههههههه لاكن وقت يكونو راقدات مش فايقات هههههههههههههههههه.


احلى تقييم للمثرودة وانا فرحانة ان الاكلات متع مدننا الشرقية بدينا نعرفوهم واكيد رح نتعلموهم وانا الاولة منك ومن للاهم تعلمت اكلات واجدة عن الشرق الليبي ياريت انديرو ملف للكلات متكم خلي نتعلموهم ونعرفوهم ونطبقوهم . صحة وهنا ياغالية

[مغتربة 7]

بسم الله مااااااااااشاء الله
تهبل تهبل
عشت الجو معك ومع التنور
والحمد لله ان الصور رجعوا
بصراحة مثريدة مش غير اتجي فى الخاطر عيوني طلعوا عذاب
واللبن ياخد العقل
تسلم الايادي
وصحتيين على قلوبكم
احلى تقييم

[أم أيوب]

ام ايوبي تسلم ايديك على المثرودة بس مش هذه اللي نعرفها يديرو فيها في درنة المثرودة اللي نعرفها هي زي الفطيرة وفيها عسل وزبيب ولوز وتمر ومفتتة ومسقينها بالعسل.
ندكر مرة سويت دايرتها والحق مثرودتك عجبتني ربي يعطيك صحيحتك وااااه هكي عليك حق معقولة صور ايوبي مع الخروف مانشوفوهاش ههههه لالا توا اول ماتجيبي البيبي التاني خليه يصور مع خروف البيبي ووريهولنا والا صوريه من النحلات هههههههههههه لاكن وقت يكونو راقدات مش فايقات هههههههههههههههههه.


احلى تقييم للمثرودة وانا فرحانة ان الاكلات متع مدننا الشرقية بدينا نعرفوهم واكيد رح نتعلموهم وانا الاولة منك ومن للاهم تعلمت اكلات واجدة عن الشرق الليبي ياريت انديرو ملف للكلات متكم خلي نتعلموهم ونعرفوهم ونطبقوهم . صحة وهنا ياغالية

سجودة ربي يسلم قلبك حبوبة

نبي نعطيك فكرة على عرب الشرق

في منهم من يقال عنهم البدو وفي اللي هم الحضور

بالنسبة للبدو كرمهم غير وأكلهم غير بصراحة

وهادي مثرودتهم المتعارف عليها

حتى لما وحدة تجيب تديرها بس الحلوة

وعلى فكرة أفضل ما يكرموا بيه الضيف هنا هي مثرودة اللحم

النوع اللي تحكي عليه زينا في بنغازي هكي نديروا فيها

فطيرة مورقة ويفتتوها ويبوخوها ويديرولها زبدة ومكسرات وعسل حقاني

بس بالنسبة للبدو هذي مثرودتهم والصراحة رهيييييييييبة طعمتها

مالح مع حلو الله الله ما نسهفك عليها

تعالي عندي في البيضاء ونديرهالك ودوقيها

صور ايوبي توة نبعتهم لكي مع خروف العيد ههههههههه

سلمتي عالمرور والتقييم حبيبة يارب ما نفقد طلتك

[أم أيوب]

بسم الله مااااااااااشاء الله
تهبل تهبل
عشت الجو معك ومع التنور
والحمد لله ان الصور رجعوا
بصراحة مثريدة مش غير اتجي فى الخاطر عيوني طلعوا عذاب
واللبن ياخد العقل
تسلم الايادي
وصحتيين على قلوبكم
احلى تقييم

بارك الله فيك حبيبة عالمرور والتقييم

وعد مني لو تجينا هنا من عيوني نديرها ليك وتشبعي منها

واللبن نجيبه لكي في نفس الكاس الستيل

نورتي حبيبة وصحيتي عالتقييم

[فضااوي]

ماشاء الله ام ايوب

الله يسلم ايديك وايدين ابو الشباب ((خمسة وخميسة على الشراقة))

لكن عندي ملاحظة صغيرونة

نحن عرب الجبل الاخضر مثرودة المرق مانحطوش معاها تمر
بس لوز ودحي

والمثرودة الحلوة هي اللي ينحط معاها التمر

[أم أيوب]

ماشاء الله ام ايوب

الله يسلم ايديك وايدين ابو الشباب ((خمسة وخميسة على الشراقة))

لكن عندي ملاحظة صغيرونة

نحن عرب الجبل الاخضر مثرودة المرق مانحطوش معاها تمر
بس لوز ودحي

والمثرودة الحلوة هي اللي ينحط معاها التمر

فضفوضة نورتي يا حبيبة

تعرفي دقتها من قبل عند اتنين شرقاويات ما يحطوش معاها في تمر

بس لما شفت أخوات زوجي وحدة منهم اهل راجلها شراقة

تعلمتها منهم بالتمر

بس تعرفي التمر هو اللي داير النكهة المميزة اللي فيها

نحب طعمتها مالح حلو

بارك الله فيك يا غالية

[ranaa]

[Om Saga]

ماشاء الله عليك ياأم أيوب
مثرودة أول مرة نشوفها
بصراحة مع إني مادقتهاش منك ياقفاصة
بس تبان متقنة الصراحة
ربي يباركلك في صحتك وأحلى تقييم ليك ولموضوع الرائع
موااااااااااااااااااااااااااااااة ياحلوة

[أم ميوسة]

الله الله يا ام ايوب

على المثرودة وعلى الشرح على التنور وعلى عاداتكم الرائعة

انا المثرودة نسمع بيها بس

أول مرة نعرفها وبصراحة رائعة

والمثرودة هادي والمثرودة الحلوة جت في خاطري

وبم أني ماعنديش تنور حنجربها بأذن الله المثرودة الحلوة

بصراحة موضوع رائع مش بس في الوصفة حتى لأنه يخلينا نتعرفوا على أكل الجانب الشرقي الرائع من ليبيا

ربي يحفظك وعويلتك وربي يعطيك الصحة أنتي وزوجك

موضوع يستحق التقييم بجدارة