[دشيشة ]lمن مطبخ أم يمنى

[أم يمنى]

السلام عليكم :

أمس المغرب حسيت بشوي الجو بارد , خشيت المطبخ وقلت : هذا يوم الدشيشة .
بتقولوا : وين لقيتها .
وانى نتمشى ممكن من اسبوعين فاتوا فى السوق فجأة طلعتلى وكان أخر شئ نتوقع نلقاه ,





وطبعا خذيتها , ولكن لما روحت انحطت فى الدولاب ونسيتها , الى أمس صممت نديرها , ومن فترة مادرتها ممكن سنة , لما جبتها معاي من ليبيا , وكملت .





المقادير :
4 طماطم أخضر
2 رؤؤس فلفل حار
4 فصوص ثومة
2 بصلة
نصف كوب مية





خلطيهم فى الخلاط
خوذى الطنجرة حطى فيها 2 ملعقة دهان القديد




وبعدين ضيفى الخليط وخليه يغلى .







توا ضيفى المقادير :
ملعقة ملح
نصف ملعقة كركم
نصف ملعقة فلفل
2 ملعقة طماطم معجون
مية

خليهم يغلوا وضيفى لو حبيتى :
2 ملعقة بقدونس
2 ملعقة حبق
خضروات مشكلة





وكرافس ( ماحبيت طعمته فى الدشيشة )




وضيفى الدشيشة ’ وهدى النار ع الاخر وخليها تطيب .




لما تطيب حطيها فى صونية لوح , وكلى بالهنا والشفاء.










وسلامتكم .

[أم ميوسة]

الله يهبل منظرها وخاصة مع الخضار

هذا وقتها في الصقع

يسلموا ايدياتك

وصحة وعافية

[الساجدة لله]

يعطيك السلامة ياغالية تعرفي نشوف فيها وقريب نيبس من الصقععععععع

وهي الدشيشة مش عادية تنفع في هالقجمبري او السميطري او السقوطري تعددت الاسماء والصقع وااااحد

هههههههه احلى تقييم لاحلى ام يمووون في الدنيا

[مغتربة 7]

ماشاء الله عليك يا ام يمني
دشيشة اتجي فى الخاطر
نموت فيها الدشيشة ودشيشتك سهفتني مزبوط
ربي يعطيك صيحيتك ويمتعك بيها يارب
تسلم الايادي الى تلتف بالحرير

[Om Saga]

دشيشة عندنا يامرحبا يامرحبا
رياقتي نزلت هههههههههههههه
الصراحة تبان مش عادية بسم الله ماشاء الله
تستاهل التقييم هي وموضوع وإنتي
ومنورة كاعادتك أم يمونة

[أم أيوب]

ماشاء الله يسلم ايديك

ياريت منها توة صوينية في هالزمهرير اللي عندنا

صحتين على قلوبكم

تستاهلي التقييم حبيبة

[أم رانيا]

محلاها الدشيشة تهبل قداش ليا عليها شن اسم المحل يلي لقيتيها فيه يسلموا ايديك ما شاء الله

[ام تغريد]

فكرتيني فيها ام يمنى

قداش ليا عليها واني حايرة شني اندير الوجبة

بسم الله ما شاء الله كاملة وسخينة من نارها الله عليها

[ام بوفة]

الأحد 14 صفر 1433


سلم ايديك

بس الدشيشة هذه لا فيها لحم ولا قديد؟

[guidona]

ماشاء الله اسلم ادياتك