[ مشاركة بملف الحمضيات والحلويات ] كوكيز البرتقال من مطبخ mnona

[mnona]

مشاركتي بملف الحمضيات للغالية ناني 2007 "" كوكيز البرتقال "" اللي بنته جت تهبل
واللي شحورني فيه الضي يهرب ويجي وتعفلقت هلبااااااااااااااا وقريب مصارش منه واكيد لما مايصيرش منه معروف شن مصيره حاشى نعيمة ربي

نبدو بالمقادير اللي مصورتهمش

2 صفار بيض / كوب زبدة / كوب سكر / 2 كوب ونص دقيق / فانيليا / رشة ملح

الطريقة
اولا نخلط الزبدة مع السكر وبعدها نضيفلهم صفار البيض زي ماموضح بالصورة

ونخلطهم كويس كويس لين يتجانسوا مع بعض وبعدها نضيف الدقيق ورشة الملح ، طبعا اطريت اني نخلطهم بالمضرب اليدوي وزي ماقلت قبل البركة في شركة الكهرباء اللي كل ليلة مدايرتلنا عيد ميلاد ، وعلى فكرة ايد فيها الموبايل نصور بيها والايد الثانية شادة البيلة باش تطلع الصورة واضحة
شفتوااااااااااااااااااااااااااا قدااااااااااااااااااااااااش تعذبت فيه

ااااااااااااااااااااااااه ولكن الحمد لله طلعت النتيجة مية مية


وبعد العجن حطيتها في حافظة لانه بسلامته الضي مازال مجاش ولانه العجينة ضروري ترتاح ساعة في الثلاجة ، واني الحق محطيتهاش في الثلاجة لانه الجو بروحها تقول فاتحة باب الفريز في وجهك وواقفة ، المهم خلونا في موضوعنا

وماشا الله الضئ جانا متأخر ولكن نضت نضت على خاطر البنيات اللي يستنوا فيا
وقلت والله لما نديرها ، ياحنة سخنت الفرن وخديت طاجيني وفرشت فيه ورق الزبدة وبديت نكور في العجينة زي مافي الصورة

وبعد التكوير درت فيها حفرة وردي بالك عالحواشي لازم يكونوا مسكرات باش الحشوة ماتسيحش منهم

وأبدي ستفي في الطاجين لين تكلمي العجينة كلها

وبعد لا تكملي عجينتك وكورك تحطي في الحفيرات الحشوة متاعك واللي تتكون من
1/3 كوب سكر / م ك دقيق / بيضة / م ك بشر برتقال / كوب عصير برتقال فرش / رشة ملح
تخلطيهم مع بعض كويس لين يدوب السكر

وهدي هني بعد ماطابت

وبعدها خليتها لين تبرد ورشيت عليها سكر ناعم

وتاكلوها بالهني عليكم ان شا الله
وان شا الله تعجبكم وتنال اعجاب ورضا وخيتي الغالية ناني

ومش ناقص الضئ اللي حرقلي دمي باش درتها زادني المنتدى كل مانبي نضيف الموضوع يطلعلي خطأ في الصفحة وينمسح وجاب ربي اني مدايراته في ملف وورد الصبرررررررررررررررررررررر ياااااااااااااااااااااربي


وهدي ليكم مع طويسة شاهي والا قهيوة عربية

وان شا الله فيكم وحدة تخش وتقولي معجبنيش حيه عليها حيه ، حتى علي خاطر التبهديل العفو ههههههههههههههههههههههههه

[sweet nona]

ياسلام اني اول وحدة عجبني والصراحة طعمته في فمي مع اطويسة قهوة عربية
وبعون الله حنطبقه ..وتعبك مامشي عالفاضي شكلهم حلوااااات..تسلم ايدياتك الي تعبو.

[الساجدة لله]

ياسلام هده اخرتها ههههههههههههههه مايعجبهمش تي من هي اللي مايعجبها بالار بي جي يعجبهم هههههههههههههههههههههههههههه التقييم التقييم ياامورة يهببببل على هاديك الطويسة اللي بالي بالك

[مغتربة 7]

بسم الله ماشاء الله
عجبنا ونص وخمسة ههههه
كوكيز ايجي فى الخاطر
تسلم الايادي
مشاركة مميزة

[ام ساره وعبدالعزيز]

عجبنى ويهبل لكن نبية مع طويسة شاهي وحليب معليش بسرعة قبل الضي ما ينقطع

[mnona]

اقتباس:
المشاركة الأصلية كتبت بواسطة sweet nona
ياسلام اني اول وحدة عجبني والصراحة طعمته في فمي مع اطويسة قهوة عربية
وبعون الله حنطبقه ..وتعبك مامشي عالفاضي شكلهم حلوااااات..تسلم ايدياتك الي تعبو.

سلمها هالبنية ، وصحتين على قلبك اهم شئ انه عجبك واني ننصحك انك اديريه ساهل اقوي وبنته تجنن هذا كان الضئ مدارهاش فيك

[mnona]

اقتباس:
المشاركة الأصلية كتبت بواسطة الساجدة لله
ياسلام هده اخرتها ههههههههههههههه مايعجبهمش تي من هي اللي مايعجبها بالار بي جي يعجبهم هههههههههههههههههههههههههههه التقييم التقييم ياامورة يهببببل على هاديك الطويسة اللي بالي بالك

ار بي جي و14 نص والدخيرة متوفرة بكثرة ماشا الله غير حد فيهم يشبح هكي والا هكي بس
ويقول حتى بينه وبين نفسه مش حلو

صحيت هلبا سجودة على مرورك وياريتك جارتي راه شربنا معاه هديكة طويسة الشاهي السخينة

[mnona]

اقتباس:
المشاركة الأصلية كتبت بواسطة مغتربة 7
بسم الله ماشاء الله
عجبنا ونص وخمسة ههههه
كوكيز ايجي فى الخاطر
تسلم الايادي
مشاركة مميزة

ربي يحفظك ويخليك ويعليك على مني يعاديك ( هدي دعوة امي ليا ربي يحفظها ان شا الله وتوا دعيتلك بيها )
الله يسلمك ومروردك وردك هما اللي ميزوا الموضوع

[mnona]

اقتباس:
المشاركة الأصلية كتبت بواسطة ام ساره وعبدالعزيز
عجبنى ويهبل لكن نبية مع طويسة شاهي وحليب معليش بسرعة قبل الضي ما ينقطع

الله يسلمك ياحنة ، ايه ياوخيتي والله مداير فينا حالة الضئ ، الحمد لله على كل حال
مع انه مافيش مرة روحت للحوش ولقيت فيه ضئ ( ياوالله عليك حالة وخلاص )

صحتين علي قلبك ياغالية طويسة الشاهي بالحليب

منورة ياكعكة مدورة

[ليبية]

يا عيني يا عيني ماشاء الله على الكوكيز اللي يجنن

منونا تعبك مامشاش على الفاضي

واني ندير في نفس طريقتك غير بدال الخلطة اللي صبيتيها في الفتحات نحط في مربى

وفكرة الخلطة جديدة عليا

الله يسلم ايديك الحلوة وصحة على قلوبكم

وربي يفرج علينا


لا ضي لا مية ............ المجلس الأنتقالي يعز عليا


الحمدللله حتى الضي مافيش المهم افتكينا من معمر وان شاء الله اللي جاي احسن من اللي فات