شنو الغدا اليوم؟

[أم لولو]

صباح الخيرات انا توا كيف روحت من المدرسة وقاعدة نفكر شنوا الغدي اليوم عجبتني ضولمة ام صهيب غير توا ماعنديش خضرة الضولمة وبالنسبة لغدانا امس درت رز بلاو وبوريك وسلاطة مشوية و سلاطة روسية وطاجين دجاج محمر وهادي سفرتنا

[أمـ ساره]

ماشاء الله لاقوة الا بالله

كل سفرة أحلى من الثانة وخياتي

تاكلو بالهني ان شاء الله



مش عارفة اليوم فيه غذي او لا ولو فيه بندير شربة خضرة للشنبير

حاشاكم عندنا حالة برد في الحوش الا بنتي الصغير ربي يحفظها

[ام ساره وعبدالعزيز]

لاباْ س عليك ام سارة بالشفاء ان شاءالله
انا اليو مم درتش غدا وتو افي العشاء نبى اندير معجنات ان شاءا لله نصورهم

[أمـ ساره]

الله لا يوريك باس حبيبة أم ساره وعزو


تعرفي حال الشتاء

وبالهني والعافية المعجنات حلوة في العشاء

[أم لولو]

ان شاء لاباس عليكم اختي ام سارة وان شاء الله ربي يحفضلك النونو الصغيرة وكانك جارتي راني بعتلك من غداي اليوم درت طبيخة بازيليا ورز ابيض وكفتة الاخت ملكة بنقابي

[ام ساره وعبدالعزيز]

صحة وهنا ام لولو

[سمراء الصحراء]

غدانا امس رز بالبصلة وسلاطة خضره وطماطم وخيار وزيتون ،أما اليوم فغدانا رشده جارية بلحم القديد

[mnona]

اهلا اهلا شن اخباركم والله استااااااحشتكم في هاليومين اللي فاتوا

لاباااااااااااااس عليكم ام سرو انتي والعيلة

اليوم غداي رز ابيض وفيليه دجاج مكسيكي ( طريقة منال العالم ) وخبيزة محشية بالهريسة والدجاج والبطاطا المقلية وسلاطة وفلفل ومسير وشربة خضرا وعدس احمر ( حساء السنافر )

صورتلكم الصفرة ولكن ملقيتش الوصلة زكريا اشبح وين تلفها ، غدوة نمشي للعمل ونزللكم الصورة ، وعشاي عالخفيف بكل تاج راسي تغدى متأخر وقالي معنديش نية في عشي ، درت فروتة وتمر ولبن وخلاص والحمد لله ، وغدوة بإذن الله غداي صالصة بالمفروم واكيد سلاطة معاها

هى نشوفكم علي خير ان شا الله

[mnona]

اقتباس:
المشاركة الأصلية كتبت بواسطة نسمه ليبيه
السلام عليكم
منونا صحتين وغريبه البازلاء تديرى فيها من غير طماطم معجون ؟اول مره نشوفها شن طريقتها

روح مغتربه بعد الغداء هذا كله وتقولى غداء خفيف؟ امالا الثقيل شن شكله

اهلا اهلا وعليكم السلام ورحمة الله وبركاته

بالنسبة للبازيلياء مدايرتها بالطماطم الاخضر ( مراعاة لظروف زوجي الصحية ) ونفس الطريقة العادية غير مش مكترة توابل بس وزي ماقلتلك مافيهاش معجون طماطم

[روح مغتربه]

لاباس عليك ام ساره وصحيتي علي الصوره
ما شاء الله علي صفيرتك ام لولو بصحه والعافيه عليكم
نسومه انا كل شي مش مسقي عندنا خفيف هكي قانون الحاج وعاقبني الجمعه قال نبي بازين انويشط معنا يابس زي الحيط حاشاك واليوم غدنا رز مفلفل ومفروم وامبطن ملفوف عجبني طبقته وطلع اسهل من المبطن العادي والاحلي انه يطلع صغيرون وقنين ودرت سلاطه زبادي بالذره