[مسابقة أفضل طبق مكرونة]مكرونة مبكبكة من مطبخ أم يمنى

[أم يمنى]

السلام عليكم :




هذا قلت ماخشش حد من الحلوات وطيب مكيرينة كل الليبيين يحبوها فى الزرادى ’ وأخف وأسهل أكلة وأول أكلة نتعلموها .
علاش , علاش ماطيبتوش مكرونة مبكبكة وخشيتوا بيها المسابقة .
شمرت على ايديا ودرت صونيتين , وحدة سباقيتى والثانية حلزونة ,

المقادير:
زيت
بصلة
طماطم معجون
طماطم أخضر
لحم
ملح
فلفل
بزار
مية
الطريقة:
حطى الزيت فى الطنجرة , وقرضى بصلة خليها شوية بعدين حطى اللحم حتى يولى لونه أبيض






ضيفى الطماطم والملح والبزار وشوية مية وخليه يغلى .





ضيفى المية وخليها ع نار متوسطة .



بعد نص ساعة أرجعى حطى مكرونتك وهدى النار ع الاخر .







بعد ربع ساعة تكون طابت , قبل طيابها بشوية حطى قرنين فلفل حار وشوية حبق.






توا شن فيها من صعوبة , حطيها فى صونية وقدميها .















هذه الطريقة علمتها جاراتى اماراتيات وعجبتهم , كانت طريقتهم ,
يطيبوا فى الصلصة بروحها ويسلقوا المكرونة بروحها , وبعدين يخلطوهم
مع بعض , ولما جربوا طريقتى عجبتهم , واعتمدوها .
وهكى طابت المكرونة , علاش مادرتوهاش .
أهى صوينية خاشة تداعك وتنافس وان شاء الله تفوز .

[فضااوي]

ماشاء الله

رووووعة

تسلم الايااادي يالغلا

[الساجدة لله]

هههههههههههههه ضحكتيني ياام يمون على التفنيصة ههههههههههههههههه احنى الليبيات وين مانمشو لازم المبكبكة فجرتنا ههههههههههههههههههه ان شاء الله تفوز في المسابقة ياغالية واحلى مبكبكات من يدياتك حبيبة

[مغتربة 7]

اشيه ماشاء الله على البكبوكي الفايحة
تسلم الايادي
مشاركة مميزة
موفقة حبيبة

[ليبية]

ممممممممممممممممم

جت في وقتها


يعطيك الصحة والله يسلم ايديك

[loen]

اممممممممم والله ماعندكم ماتقولو على البكبوكى
وخاصه فى الشتاء تهبل
سلم دياتك

[أم أيوب]

تعرفي تنوعت طرق المكرونة واشكالها

تضل البكبوكي هي معشوقتي ولما بالدات تكون سباجيتي

وتكون على لحيمات حولي وفيها قرينات هداك الفلفل الحاااااااااااااااااار

يسلمو ام يمون

[ام تغريد]

وين بنهربو من المبكبكة لما نحير في الوجبة نريح روحي ونمشيلها طوالي

احلى وافضل وجبة للشعب الليبي بصراحة ما شاء الله وخاصة الاولى

وتسلم ايديك وصحتين لكل من داقها

[أم ميوسة]

تسلم ايدياتك أم يمنى

بكبوكي تهبل من ايدياتك

وأنا نموت فيها البكبوكي ولا يعلى عليها

صديقتك في السراء والضراء في الزرادي نمشولها نجروا

وقت الاستعجال وقت الشتاء نبوا حاجة سخونة

ومرات عشى وغيرهم غيرهم

فعلا البكوبكي احسن واسهل طبق ليبي ولا مكرونة تعلى عليها

أحلى تقييم لأحلى أم يمنى واحلى بكبوكي

[أمـ ساره]

ماشاء الله أم يمنى بكبوكي مقومة

وخاصة في الشتاء مش عادية

سلم ايدياتك حبوبة ومشاركة مميزة

وأحلى تقيييييم للموضوع السخون واللذيذ