[ البريمة بالقديد ] من مطبخ أم أيوب

[أم أيوب]

السلام عليكم ورحمة الله وبركاته

كيف الحال يا غاليات

اليوم حبيت نوريكم طريقة البريمة بالقديد

وللأمانة الاكلة تعلمتها من عزوزتي مصراتية وقعدت ادمان عليها لانها غير عادية

المقادير :

دقيق + شوية مية + ملح للعجينة

قديد حسب عدد العائلة + طماطم معجون + بازيلاء + ثوم تقريبا 8 فصوص

كسبر مفروم + حلبة حسب الرغبة + حبق مفروم + رشة زعتر مطحون + ملح

الطريقة :

خودي طنجرة حطي فيها مية مش واجد تقريبا كوبين بس وخليها عالنار

اول ما تفور المية حطي فيها القديد مع الشحم متاعه والبازيلاء والطماطم المعجون والحلبة والثوم

وخليها تغلي لعند ما تبخر المية والطبيخة تتسبك او تعقد



بعدين زيديها مية وخليها تقريبا ساعة عالنار يطيب القديد والبازيلاء كويس ورشي الملح

نجو توة للعجينة خودي دقيق المقدار على عينك وعدد افراد العائلة

نحن العشاء كان تقريبا 10 أشخاص ممكن استعملت كيلو دقيق أو أقل كباية

غربليه ورشي عليه شوية ملح وجيبي حداك مية

خودي رشي المية بكميات بسيطة وخلطي بروؤس الاصابع في الدقيق

لعند ما تكون عجينة مفتتة من بعضها ونقولك ما تعجنيش

ابرمي الدقيق بالمية بروس الاصابع من هنا سموها بريمة

حسيتي الدقيق خش في بعضه وقفي المية

واقعدي فتتي في العجينة المبرومة بين أصابعك

لو حسيتيها رطبة رشي شوي دقيق وتنحل معاك

شوفوا الصور توة تعرفوا كيف يقعد شكلها



وهدي من قريب



لما تحسوها تفتت بالكامل تعالي لطنجرتك

ولازم ماتكون النار عالية لحظة ماترمي البريمة في الطنجرة

خودي ملوة يدك ورشيها بشويش وباليد التانية قلبي الطنجرة

خودي بشوية وارمي وقلبي لعند ما يتم مقدارك وحطي الكسبر المفروم والحبق والزعتر



بعدين غطيها وخليها تقريبا ربع ساعة

ولعشاق الفلفل الحار حطو قرينات منه قد ماتحبو لانها لذيذة وهي حارة تحرق

وانتي تقلبي فيها لو حسيتي المية واجدة زيدي شوي بريمة لعند ما تحسيها

غلظت معاك وقتها هدي النار وخليها تكتك على مهلها



وبعد ماتحسيها غلظت والعجينة طابت واطيها عالنار واستمتعي باكلة تبي الشتاء والصقع



هي تفضلو عشان تدفوا من هالصقع

[الساجدة لله]

اشيه اشيه عليها اشيه اشيه سخينة في هالصقع ماشاء الله رغم اني مصراتية الاصل بس مانعرفهاش لاني مولودة في طرابلس ومانعرفش الا القليل على مصراتة والحمدلله التورة هده ردتنا ليها وتعرفت عليها اكتر وعلى بعض اكلاتها التراتية بس ام ايوبي ياريتك راجيتي شوية عشان انزلوها في المسابقة والله حرام اكلة كيف هده ماتشاركش في المسابقة بس عشان هالاكلة تستاهليهم النجيمات ههههههههههه

[أم لينه]

تسلم الأيادي أم أيوب
روعة تهبل في هالصقع
وشكلها نويشطة ومحبركة
وياعيني على الفلفل اللي ينادي فيا عيوني قريب يطلعوووووووووووو فيه
احني نقولوله بركوكش ماعنديش الروح معاه

[أم أيوب]

تسلم الأيادي أم أيوب
روعة تهبل في هالصقع
وشكلها نويشطة ومحبركة
وياعيني على الفلفل اللي ينادي فيا عيوني قريب يطلعوووووووووووو فيه
احني نقولوله بركوكش ماعنديش الروح معاه

ههههههههههههههه سلامة عويناتك ام لينة يا عسل

الفلفل ما نتحركش الا بيه قريب ناكله مع الحليب

تفضلي يا قمورة سمي وكولي صحتين

البركوكش نسمع بيها الأكله هادي بس مانعرفش هي شني

[أم أيوب]

اشيه اشيه عليها اشيه اشيه سخينة في هالصقع ماشاء الله رغم اني مصراتية الاصل بس مانعرفهاش لاني مولودة في طرابلس ومانعرفش الا القليل على مصراتة والحمدلله التورة هده ردتنا ليها وتعرفت عليها اكتر وعلى بعض اكلاتها التراتية بس ام ايوبي ياريتك راجيتي شوية عشان انزلوها في المسابقة والله حرام اكلة كيف هده ماتشاركش في المسابقة بس عشان هالاكلة تستاهليهم النجيمات ههههههههههه

نورتي سجودة
اسالي عليها اميمتك البريمة لأنها أكلة قدييييييييمة من مصراته

عمي وقت نحطوها له يقعد يدندن

بريمة فيها كريكيبات فطور خوالك عالغيات ههههههههه

ان شاء الله عندي ياما حاجات نحطهم في المسابقة أولهم الفتات المصراتي

[ام ساره وعبدالعزيز]

ماشاء الله عليك حرة وشاطرة
عارفة ياام ايوب نموت على حاجة اسمها قديد لكن راجلي مايحبش عشان هكي امى ديمة تخليلى حصتى من القديد ابتاعهم لم نجيها اطيبلى علية
لكن المرة هذي توا انجيك انتى وخلاص

[أم أيوب]

ماشاء الله عليك حرة وشاطرة
عارفة ياام ايوب نموت على حاجة اسمها قديد لكن راجلي مايحبش عشان هكي امى ديمة تخليلى حصتى من القديد ابتاعهم لم نجيها اطيبلى علية
لكن المرة هذي توا انجيك انتى وخلاص

اهلين ام سرورة

مرحبتين يا عسل تفضلي وندوقها لكي من ايدين عزوزتي لانها مبدعة فيها الصراحة

تعرفي عمري ماكليت القديد في حياتي لعند وأنا حامل بأيوبي

توحمت عليه منها قعد هو اعيوني وراجلي احرف مني يعشق حاجة اسماها قديد

[مغتربة 7]

بسم الله مااااااشاء الله
ههههههه حتى اني مصراتية وما نعرفهاش لاني طول فى طرابلس
روعة الصراحة تسهف
جت فى خاااااااطري
تسلم الايادي
وصحتين على قلوبكم
احلى تقييم لعيونك

[أم أيوب]

بسم الله مااااااشاء الله
ههههههه حتى اني مصراتية وما نعرفهاش لاني طول فى طرابلس
روعة الصراحة تسهف
جت فى خاااااااطري
تسلم الايادي
وصحتين على قلوبكم
احلى تقييم لعيونك

منورة كالعادة غوغو

حتى خيتك مصراتية في الاصل بس عمري ماشفتها هالأكلة الا لما جيت لأهل راجلي

لأنهم متمسكين بعادات مصراته وأكلاتهم تعلمتها منهم

ماما تراجي فيا امتى نجي عشان نديرها لهم ههههههههه

[DREAM]

ما شـــــــ الله ــــــــــــاء
جوعتيني في هالليل
شكلها انويشطة اتهبل
يسلمو ايديك