[ الكعك الحلو والمالح ] من مطبخ mnona

**mnona** · 01-16-2012, 11:22 AM

اهلا اهلا وشن اخباركم ان شا الله تمام
اليوم جبتلكم طريقتي في الكعك الحلو والمالح وطبعا ملحقتش نصور الخطوات كلها
لانه قعدت نجري ولا ندري اني واختي نبو نكلموا المقدار قبل لا الضي يقولنا بااااااااااي
وعجنا كمية كبيرة قعدنا فيها لليل

او شئ نبدو بمقادير الكعك الحلو

كوب زيت - كوب زبدة سائحة - كوب نشا - 1/4 م ص B.K
1/4 م ص منياكة - كوب سكر ناعم - نصف كوب ماء - بيضتين - فانيليا
تخلط المقادير مع بعضها كلها وأخر شئ ضيفيه الدقيق ( حسب العجن ) ومديرهاش العجينة يابسة

طريقتي هدي الطريقة الوحيدة عندي والمعتمدة ومية مية ، ننصحكم تجربوها

وهدي ايد زيكو يرعش رعيش عالعجينة يموت فيها

وبعد لا تشكيله زي مافي الصورة ترشي عليه سكر خشن من فوق وتستفيه في طاجينك
ولما تحطيه في الفرن ردي بالك عليه متخليشي لين يستكحل دوبك دوبك مايولي اصفر ويطيب

نجو للكعك المالح

كوب ماء دافئ - 2 كوب زيت - ملح - م ك خميرة بيرة - جلجلان محمس ( سمسم ) - م ك B.K

دقيق حسب العجن

تعجن المقادير السابقة وتخليها لين ترتاح مابين درتي كعكك الحلو وطاب

وتبدي تشكلي فيه زي مافي الصورة

وهدي شكله لما طاب وهى تفضلوا دوقوا وتبننوا وان شا الله يعجبكم

**ام ساره وعبدالعزيز** · 01-16-2012, 11:38 AM

ماشاء الله عليك ما يبوا غير طويسة شاهى سلم يديك انتى وخيتك

**أم لينه** · 01-16-2012, 11:50 AM

السلام عليكم ورحمة الله وبركاته
ماشاء الله تبارك الرحمن عليكم إنتي واوخيتك ايسلم ايدياتكم عسوووووولات
وصفه جديدة عليا وعجبتني هلباااااااااااااات وبما إني ماعمريش درت كعك بإذن الله حنجرب طريقتك أول مره
وأكيد حتطلع حلوه لأن أكلاتك دائما رائعة
وسامحيني طوللللللللللللت عليك حبوبه

سلااااااااااااااام

**sweet nona** · 01-16-2012, 05:01 PM

علا قولت ام سارة والله حق يبو طاسة شاهي تسلم ايديك وايدين اوخيتك واحلى تقييم

**مغتربة 7** · 01-16-2012, 07:07 PM

بسم الله مااااااااشاء الله
فالحات انت ووخيتك
الكعك يهبل وايجي فى الخاطر
وبصراحة الكعك الحلو طريقتك جديدة عليا تختلف على طريقتي
وفى كندا ما قدرناش انديروه لان الدقيق يختلف بس راح انجرب طريقتك
وتسلم الايادي يا احلى منونة واختها
موضوع يستحق احلى تقييم
تقبلي مروري