[ البيض الصيني أو البيض الملبس ] من مطبخ أم أيوب

**أم أيوب** · 01-16-2012, 11:56 PM

السلام عليكم ورحمة الله وبركاته

حبيت نوريكم طريقتي في البيض الصيني أو الملبس

زمان ماما الله يحفظها كانت تدير فيه لنا

وكنا نسموا فيه بيضة العنقاء

تدكروا رسوم سندباد زمان مش فيها طير كبير اسماه العنقاء

عنده دحية عملاقة تدكرتوها

هي هدي بيضة العنقاء اللي سمينا عليها هالأكلة لما كنا صغار

المقادير حسب أفراد العائلة

أنا درتها عشاء لشخصين اللي هم أم أيوبي وأبو أيوبي

مقاديري كالتالي :

عصاج مفروم أو دجاج وعن نفسي نفضلها بالدجاج

العصاج نحطله بصلة متوسطة مفرومة وشوي كسبر ومعدنوس مفرومات وتومة

ونتبله بملح وفلفل أكحل وحرارات وهريسة عربية

رز مطبوخ في مية وملح وبهار من دون اضافة زيت نبيه يكون معجن شوي

بيض مسلوق عن نفسي سلقت ثمان بيضات لبست أربعة لنا والباقي لحوش عمي

اربع بيضات من غير سلق عشان التلبيس من برة

خبزة مرحية مخلوطة مع دقيق وفلفل أكحل وشوي زنجبيل

الطريقة :

عصاجي جاهز و دحيتي جاهزات والرز جاهز

ناخد بيضتين مش مسلوقات ونفصل الصفار عن البياض

البياض نضيفه للرز عشان يتماسك والصفار للمفروم

نمسك الدحية المسلوقة ونلبسها بطبقة مفروم

بعدين ناخد كمية من الرز في كف اليد نفردها ونغلف بيها المفروم اللي غلفنا بيه الدحية

نغلفها من جميع الجهات كويس بكل ونضغط شوي عشان ما يتفتت في القلي

وبهالشكل لعند ما نتم الكمية المطلوبة

نغمس البيض الملبس في بيض مخفوق مع ملح وفلفل أكحل

بعدين نمرغه في الخبزة المرحية المخلطة مع الدقيق

نجهز كل الكمية قبل ما نبدا القلي لأنها في القلي سريعة ما تعطلش

نجهز زيت غزير ويكون سااااااااااااااااخن وهوب نرمي الدحيات فيه ونقلب بشكل مستمر

عشان تجينا حمرة من جميع الجهات وما يصيرش فيها تشققات

وقدميها زي ما تحبي عن نفسي نحبها مع البطاطا المقلية والسلاطة الخضراء

وهدا شكلها من جوة بعد ما قصيتها

يارب تكون عجبتكم

**نسمه ليبيه** · 01-17-2012, 12:39 AM

سيف الله وسيف محمد انا الاولى

بيض يهبل سلم اللى داراته
طريقتك عجبتنى لان المفروم طايب
انا مره درته والمفروم نى والقلى فى الزيت حسيته ماطيبش المفروم فماعجبنى ومعش درته مره تانيه
ومنى احلى تقييم

**sweet nona** · 01-17-2012, 01:09 AM

الله هالصحن كله ليا اني تسلم ايديك تسلم ايديك تسلم ايديك وتقييم للدحيات الفايحات..ههههه

**مغتربة 7** · 01-17-2012, 01:40 AM

بسم الله ماااااشاء الله
دكرتيني بدحية العنقاء يا ام ايوبي
طريقة جديدة عليا اني طريقتي لحم ني
طريقتك تهبل ومنظرها اتجي فى الخاطر
تسلم الايادي ياقمر وربي يحفظلك ميمتك
وان شاء الله راح انجربها فى اقرب وقت
تستاهلي احلى تقييم

**امتنان** · 01-17-2012, 01:43 AM

يمممممممممممممممممممي

روعة ام ايوبي

ابدعتي ويجنننننن ومنظره يسهف الله يعطيك الصحة جوعتني

واحلي تقيم لعيونك

**بنية بوها** · 01-17-2012, 01:57 AM

روووووووووووووعة ياام ايوبيي يسلموا ايدياتك بصراحة ماجربتش منك حاجة الا وطلعت رووووووووووووووووووووووووعة

**DREAM** · 01-17-2012, 02:13 AM

ما شاء الله عليك يا ام ايوب
نفس طريقتي غير اني من غير رز
والمرة الجاية بالرز لعيونك يا ام ايوب
يسلـــــــــــــــــــــــ ايديك ــــمو

**ام ساره وعبدالعزيز** · 01-17-2012, 02:17 AM

موش قتلك حرة عينى ماتضرك في الشرقاوى في المصراتى وخشيتى حتى على دحي سندباد يا سعدودها مرات ايوبى وخلاص

**الساجدة لله** · 01-17-2012, 02:28 AM

حي عليا العنقاء ههههههههههههههههه والله مفروض تسميها من العنوان بيض العنقاء ههههههههههههههههههههه
تسلم الايادي ياغالية واحلى تقييــــــــم

**أم ميوسة** · 01-17-2012, 10:23 AM

شن الطرق الحلوة هادي أم أيوب

كل وصفة احلى من اللي قبلها

وفعلا الوصفة هادي مميزة

نعرف أنا البيض الملبس بالرز وبيض باللحم

لكن الطريقة هادي أول مرة نشوفها

تسلم الأيادي يا غالية

فعلا شكله البيض يجنن

صحة وعافية

الموضوع: [ البيض الصيني أو البيض الملبس ] من مطبخ أم أيوب

أدوات الموضوع

عرض

[ البيض الصيني أو البيض الملبس ] من مطبخ أم أيوب

معلومات الموضوع

الأعضاء الذين يشاهدون هذا الموضوع

المفضلات

المفضلات

ضوابط المشاركة