[تطبيق المقروض] من مطبخ saliamr

[saliamr]

السلام عليكم

كل سنة وانت طيبات وان شاء الله ايامكن كلها اعياد
بطولت عمري اول مرة ندير المقروض، وديما نقرا انه يندار بمية العطر واللي مالقيتهاش عندنا، بس قبل العيد بكم يوم طلعت للسوق وتفاجأت لما لقيتها جنب مية الورد والزهر وخذيتها وعلى طول قررت ندير المقروض وشفت كم طريقة في المنتدى للأخت زينب والأخت هديل وفي مقدار كان عندي من موقع اجنبي خاص بالاكل الليبي، المهم درت ابرا كادبرا وتميت نكيل بالضعف
وقعدت فوق الساعتين ونا ندير في هالمقروض اللي مابا يكمل
ومع الاخير جا كويس بس مش كيف ما نشوف فيه، بس وراه وراه نين يضبط معاي
وهذي صورة لمقروضي، ونبي تقييمكن، وإن شاء الله كل ما نجربه من جديد توا نحطه نين يجي كيف ما نبي



نبي نسأل الخبيرات فيه، كيف المفروض تكون العجينة بعد نعجنها بمية العطر، قصدي تكون رطبة واجد ولا ناشفة شوي؟ وكيف تقعد النقشة ثابتة لأني كل ما ننقش تتفتت العجينة من فوق؟

إن شاء الله يعجبكن.. بالهناء

[سيدة ليبية]

يسلموا

[تجويد]

تسلم الايادي لكن العجينة حبيبتي تكون رطبة شوية مش يابسة وتساعدك في النقش والمرة الجاية زيدي عدد النقشات لانها شوية وان شاء الله المرة الجاية يظبط معاك .

[ام تغريد]

ماشاء الله عليه بالنسبة لوحدة اول مرة اديره
وبالنسبة للعجينة متوسطة ومتماسكة بحيث اضيفي الماء والعطر بالشوية مش في مرة
والنقش خودي المنقاش الرقيق وعلي دوب متمسكي العجينة اظغطي عليها شوية وافتحي وقيمي المنقاش ومش مشكلة بتكرار التجربة تبقي خبرة

[saliamr]

تسلمن وان شاء الله ناخذ بنصائحكن، وان شاء الله المرة الجاية تكون احسن

[الكتومه]

ماشاء الله وانشاء الله العاقبه عندي انتعلمه

[الساجدة لله]

تسلم يدياتك ياغالية كانك مني انا عمره ماظبط معاي بالك يهديني ربي ونتشجحع ونديره تاني

[ام ليبيه حره]

يسلموووووووووووووووووووووووووووووووووووووووووووووو وووووووووو

[saliamr]

السلام عليكم
ليبية حرة والساجدة لله، ديرن كيفي وخلن هالشهر شهر المقروض هههههه
نين نوصلوا للنتيجة المطلوبة، نخاف هلي يكرهوه من كثر ما ياكلوا فيه كل يوم

تسلمي على مرورك ام ليبية
بارك الله فيكن

[خدوج]

يسلموا ايدياتك ياحبيبة
عن المقروض
هو مش صعب وبتكرار العمل يصبح حاجة عادية
وحاولى ديما ديرى مقدار صغير باش ماتعبكش الخدمة والنقشة
لان النقشة هى اللى تشد فى اليد(تطول)
والعجينة وسط تمشى معاك بسهولة ماهى رطبة وماهى جافة بعد ماتسبكيها(مرحلة اضافة الماء للمقروض
والنقشة تثبث عادى بس لازم تريحى المقروض قبل ماتطيبه افضل على الاقل
انى عن نفسى نعطيه اربع ساعات لان مانحبش نطيبه طول
زى مايقولوا باش يشد روحه
وتفضلى اى سؤال
ويسلموا ايديك