[ مشاركة بملف الحمضيات والحلويات ] الدونات بقشر البرتقال من مطبخ mnona

[mnona]

ياصباااااااااااااااااااح الخيرات والفلات علي حلوات كوجينتنا

بصراحة امس درت دونات وجت بنته خفيفة وقنين ودرت فيه بشر برتقال بدل الفانيليا وقلت باش نشارك بيه في ملف الحمضيات مع ناني

المهم خلونا مع المقادير

اول حاجة تخلطي المقادير الجافة قبل واللي هى ( 2 ك ونص ( واحتمال تنقصي منهم دقيق - م ك خميرة بيرة - ظرف B.K - م ك سكر - م ص ملح - م ك ونصف برش برتقال )

وبعدين اضيفي البيضة - وربع كوب الزيت ونصف كوب الحليب - كوب ماء دافئ

ادمجي المقادير كلها مع بعض كويس لين تتكون عجينة متماسكة ومش يابسة
وتاخدي تفردي العجينة ، كأنك بديري بيتسا وتقطعيها دوائر دوائر بالحجم اللي تبيه ( ولاني رفعته معاي لطلعة عشية هدراااااااااازي درتها حجم صغير )

وبعدين ديري فيها دورة من الوسط صغيرة مش كبيرة بالنسبة ليا اني استخدمت مغطة ( شيشة الزيت ) الصغيرة باش جتني الدورة صغيرة ومتساوية ، وبعدها خودي صفرة وفرشي فيها طرف قماش ( بخشة ) وابدي ستفي في الكعيكات في السفرة وغطيها بعد لا تكملي المقدار

وبعدها خليها ترتاح من ساعة لساعة ونص ، وبعد لا يرتفعوا الكعكات سخني زيتك وابدي اقلي

وبعد لا تكملي مقدارك كله ، تحطي في صونية شكلاتة بيضاء مبشورة + كوب كبير عصير برتقال فرش + نصف كوب حليب مركز محلي
تخلطي المقادير السابقة مع بعض لين يتكون خليط متجانس وثقيل شوية وابدي غطسي وجه الدونات بس وقيمي بسرعة ورشي عليه شكلاتة سودة ( الخاصة بالتزيين ) وبعدها خليه لين يبرد وتاكليه بالهني عليك ، وسااااااااااااااامحوني هلبا هلبا ملحقتش صورته بعد لا زينته لانه الضي حاشاكم دارها فيا وتاج راسي مستعجل ومخلانيش نصوره ولما رفعته الحق تحشمت نصوره

ان شا الله يارب يعجبكم

[مغتربة 7]

بسم الله ماشاء الله
دونات ايجووووو فى الخاطر
تسلم الايادي ياعسل
احلي تقييم لعيونك

[الساجدة لله]

بسم الله ماشاء الله لاقوة الابالله حبيبة دوناتات يهبلو ماشاء الله ويجو في الخاطر عسل في عسل ياعسل

ويستاهلو احلى نجيمات

[امتنان]

يسلمو ايديك يهبلن
واحلي تقيم
والله يعطيك الصحة

[mnona]

[أمـ ساره]

ماشاء الله لا قوة الا بالله

ابدااااااااع بصراحة

وفكرة عصير البرتقال في الاخير عجبتني

سلم ايدياتك حبوبة

ومشاركة مميزة

[ام زكريا]

ماشاء الله تسلم ايدياتك

[mnona]

اقتباس:
المشاركة الأصلية كتبت بواسطة أمـ ساره
ماشاء الله لا قوة الا بالله

ابدااااااااع بصراحة

وفكرة عصير البرتقال في الاخير عجبتني

سلم ايدياتك حبوبة

ومشاركة مميزة




الله يسلمك ويخليك حضورك شررررررررررفني

يسلموااااااا عالمرور الرائع والرد الاروع ياغالية

[mnona]

اقتباس:
المشاركة الأصلية كتبت بواسطة ام زكريا
ماشاء الله تسلم ايدياتك


الله يسلمك ياحلوة انستي ونورتي

[lola9670]

تسلم الايادي