[مشاركة في مسابقة أفضل طبق معكرونة ]مكرونة الاصداف ( محشية ) من مطبخ mnona

[mnona]

يسعدلي صباااااااااااااحكم ياحبوبات وش حالكم ان شا الله تمام التمام وبصحة وعافية



هذه مشاركتي الاولى في مسابقة الغالية أم أيوب ( مكرونة الاصداف ) وان شا الله يارب تنال اعجابها واعجابكم ، صح هى خطواتها طويلة شوية وبتاخد شوية وقت ولكن والله بنتها في الاخر تجنن


هي نبدوا مع بعض في المقادير ( الكمية هدي لي 3 اشخاص )

على فكرة هدي مش كل المقادير بس هذا اللي لحقت عليه وصورته



اولا مقادير الصالصة


نصف علبة فقاع ( فطر ) - راس بصل كبير مفروم - 6 فصوص ثوم مفروم - طماطمة خضراء مقطعة مربعات لو كان حجمها كبير ولو صغير اديري 2 حبات - م ك عصير طماطم - زعتر مرحي ( مجفف ) - حبق مرحي ( مجفف ) - 2 م ك زيت زيتون - ملح - فلفل اسود - بزار


أول شئ تاخد الزيت وتحطيه عالنار وضيفي عليه البصل والثوم المرحي وتخليهم لين يدبلو وبعدها اضيفيلهم الفطر وتخليهم شوية عالنار ، والصور توضح ان شا الله

وبعدها ضيفي الطماطم الاخضر المكعبات وعصير الطماطم وتخلطيهم مع بعض وتخليهم عالنار ياخد قليتهم شوية وبعدها اضيفي شوية مية باش اطيبي عصير الطماطم وتخليهم على نار هادئة لمدة 5 دقايق ، وبعدها اضيفي الزعتر والحبق وشمي عاد الريحة الفاااااااااااااايحة اااااااااااه ياسلالالالالالام

وطبعاً ماتنسيش اضيفي التوابل متاعك وهذا شكلها النهائي الصالصة ، وتوا نجو نوتوا المكرونة ، تاخدي طنجرتك وفيها مية وم ك زيت زيتون ورشة ملح وتخليهم عالنار لين يغلوا كويس وبعدها تحطي فيها المكرونة لمدة 7 دقايق بس يعني متخليهاش اطيب هلبا دوبك دوبك

وتوا نجو نوتوا الكيمة ، مابين مافاتوا 7 الدقايق



خودي ياحنة 3 م ك زيت زيتون عالنار وبعدها ضيفي البصل المفروم والفقاع وخليهم عالنار لين يدبلوا ويطيب اللحم



وبعدها ضفيله توابلك

ولما يفوتوا الـ 7 دقايق عالمكرونة حوليها من عالنار وصفيها كويس من المية

وتوا وتي بضاعتك اللي بتخدمي بيها وابدي خودي المكرونة واحشيها بالكيمة المجهزة ، مع العلم انك بعد لا اطيب الكيمة وتخليها تبرد اضيفيلها جبنة مبشورة واني هني لغيتها لانه تاج راسي ميحبهاش فلهذا اطريت اني نفوتها ولكن انتم لالالالالا تعطي بنة زايدة للمكرونة وللحشوة

خودي طاجينك وادهنيه بشوية زيت الصالصة وبعدها ضيفي شوية صالصة للطاجين وابدي ستفي المكرونة المحشية

وبعد لا تكملي خودي باقية الصالصة ووزعيها علي المكرونة كلها اللي في الطاجين ورشي عالوجه جبنة مبشورة ( حتى هنى الغيتها وقلتلكم السبب فوق علاش ولكن انتم ماتفوتوهاش )





وبعدها غطي طاجينك بورق الالمنيوم ( السلفر ) وحطيه في الفرن لمدة 30 دقيقة

وبعد لا تفوت النصف ساعة طلعيها من الفرن وقدميها مع الصالصة وتاكليها بالهني عليكم والعافية يارب



وان شا الله مشاركتي في المسابقة تكون عجبتكم



وهى تعالوا ضوقوا وتبننوا من ايديات وخيتكم منونة

[الساجدة لله]

تسلم الايادي يامنونا ياسمحة مشاركة متميزة جدا الله يحفظك ويهنيك يارب

وصحة وهنا هلى قلبك انت وتاج راسك ياغالية مشاركة مميزة وتستحق التقييم

[أم أيوب]

منونا مشاركة مميزة يا عسل

بس سامحيني المسابقة تامة ليها أيام واليوم ان شاء الله نبي نعلن عالنتائج

تأخرتي يا قمر

كسبنا وصفة لذيذة من ايديك الحوة

تستحقي التميز

[أم ميوسة]

وصفة رائعة ولو جت متأخرة

المهم كسبنا وصفة جديدة معانا

تسلم ايدياتك حبوبة مكرونة روعة

وأنا نموت فيها الجبنة ولو انا أنتي نحشي نصف الطاجين بالجبنة ونرشها عليه

والباقي نخليه من غير جبنة يعني قسمة خوت ههههههه

وصفة متميزة وصحتين

[مع الحبيب]

الله يبارك فيك فكرة حلوة وشكلها بنتها مليحة تسلم ايدك

[ليبية]

الله يسلم ايديك يا منونة فكرة جديدة وحلوة مشكورة عليها

[mnona]

اقتباس:
المشاركة الأصلية كتبت بواسطة الساجدة لله
تسلم الايادي يامنونا ياسمحة مشاركة متميزة جدا الله يحفظك ويهنيك يارب

وصحة وهنا هلى قلبك انت وتاج راسك ياغالية مشاركة مميزة وتستحق التقييم

الله يسلمك ياغالية ان شا الله ربي يحفظك
تميز موضوعي بمرورك الكريم وردك الجميل

[mnona]

اقتباس:
المشاركة الأصلية كتبت بواسطة أم أيوب
منونا مشاركة مميزة يا عسل

بس سامحيني المسابقة تامة ليها أيام واليوم ان شاء الله نبي نعلن عالنتائج

تأخرتي يا قمر

كسبنا وصفة لذيذة من ايديك الحوة

تستحقي التميز

مشكوووووووورة ياحلوة على مرورك وردك وعادي مافيش مشكلة نهائي المهم شاركت معاكم والجايات اكثر من الرايحات ان شا االله وبالتوفيق للكل

[mnona]

اقتباس:
المشاركة الأصلية كتبت بواسطة أم ميوسة
وصفة رائعة ولو جت متأخرة

المهم كسبنا وصفة جديدة معانا

تسلم ايدياتك حبوبة مكرونة روعة

وأنا نموت فيها الجبنة ولو انا أنتي نحشي نصف الطاجين بالجبنة ونرشها عليه

والباقي نخليه من غير جبنة يعني قسمة خوت ههههههه

وصفة متميزة وصحتين

الله يسلمك ياعسل ، نورتيلي موضوعي بمرورك وردك اللطيف

والله غالب يا ام ميوسة هكي اتعودت اي حاجة ميحبهاش تاج راسي حتى اني نفوت فيها ونلغي فيها من قاموسي المنزلي

طبعا ولو مشيت لحوش اهلي او اهله ندير اللي خاطري فيه

[mnona]

اقتباس:
المشاركة الأصلية كتبت بواسطة ليبية
الله يسلم ايديك يا منونة فكرة جديدة وحلوة مشكورة عليها

انتي اللي مشكورة على مرورك ياغالية والله فرحت هلبا بجيتك عندي هني

تسلمي ياعسلللللللللللللل