[ مشاركة في مسابقة لاشرقية لا غربية لقسم المعجنات الليبية ] الفتات المصراتي من مطبخ أم أيوب

[أم أيوب]

السلام عليكم ورحمة الله وبركاته
حبيت نقدملكم أولى مشاركاتي في مسابقة لا شرقية لاغربية
مشاركتي هي الفتات أو زي ما يسمى في بعض المدن الفطيرة
بس في مصراته الصمود نسموه فتات
هالأكلة معروفة في الناحية الغربية والجنوبية من ليبيا الحبيبة
بس كل مدينة وليها طريقة في تحضيره وأظن ان الأشهر في اعداده هي مدينة مصراته
يعتبر صنف رئيسي من المعجنات في كل مناسباتهم أفراحهم وأتراحهم
وياما حرائر مصراته دعموا بيه رجالها وشبابها اللي يدافعوا عنها في حربنا ضد الطاغية
للأمانة الفتات درناه في مطبخ عزوزتي والحق الجهد الأكبر كان منها
بس خيتكم أم أوبي تعرف تديره بروحهاوساعدت فيه عزوزتها
المهم نعطيكم الطريقة والمقادير من غير كتر دوة
المقادير : دقيق + ماء + ملح وبس
الكمية حسب افراد العائلة ونحن درنا 4 كيلو دقيق
الطريقة :
يكون دقيقك منخول ومخلوط مع الملح حطيه في العجانة أو اعجنيه بيدك
بس ملاحظة يبي عجن كويس بكل عشان يجيك سمح ولازم يكون نوع الدقيق ممتاز
ضيفي المية بالتدريج واعجني لعند ما تطون معاك عجينة لاهي رطبة ولا يابسة
تكون شادة روحها رشيها بشوي دقيق وغطيها وخليها ترتاح ربع ساعة
بعدين تعالي عاودي عجنها لو حسيتيها رخت ورطبت هكي يصير مع بعض انواع الدقيق
رشي شوي دقيق واعجنيها وخليها ترتاح مرة تانية بس هالمرة ادهنيها زيت
ولازم تغطيها كويس عشان ما تنشف من الخارج وخليها عالاقل ساعة الاربع ترتاح
وهذا شكل العجينة بعد ما رتاحت



جهزي سفرة ورشيها بالدقيق وخليك كريمة مع رش الدقيق عشان يجيك تمام
وكوري العجينة كور صغار نوعا ما زي مافي الصورة



وغطيها ترتاح ربع ساعة تانيات ولازم ماتريحي العجينة عشان تنفرد معاك كويس
توة خودي كورتين وحطيهم على كف يدك (( اليد اللي باينة يد عزوزتي ))
وفطحيهم شوي بروس اصابعك وحطي عليهم دقيق في الأول بعدين زيت



ولصقيهم بعدين على بعضهم



تكوني داهنة سفرة تانية بزيت وخليك كريمة فيه عشان مايلصق
وحطي فيها اللي لصقتيهم
هنا بعد ما المقدار انتهى



غطيها وجهزي الطاوة متاعك وللعلم في مصراته صنعوا طاجين خاص للفتات
وفي منه أحجام وأشكال الدائري والمستطيل واللي يرمي فردة واللي لاثنين
حطي الطاجين على نار قوية يسخن كويس وتكوني مجهزة جنبك فنجان كبير زيت
خودي طرف من اللي لصقتيهم وافرديه بين يديك لو فالحة
خيتكم تفرد فيه في سفيرة مدهونة زيت
افرديه رقيق من غير ما يتمزق منك وكل مارق كل ما احلى ولو الدقيق ممتاز
حينفرد معاك بسهولة من غير ما يتمزق .... ادهنيها بزيت باصابعك وهوب للطاجين
أم أيوب مازالت ماتحكمت فيها عشان تجي منها دائرية بالضبط



اول ماترميها طول هدي النار خليها متوسطة حتشوفيها انتفخت وانفصلت الطبقتين
من بعضهم ... قلبيه للجهة الثانية بعدين افصليهم من بعضهم وحطيهم شوي عالنار
طبقيهم مثلثات لو تحبي او خليهم دوائر المهم تحطيهم في صونية غريقة فيها
قطعة قماش كبيرة تلفيه بيها وهدي فتاتة من أم أيوب بعد ماطابت



وهدي كمية ليكم حبيبات دوقوه وقولولي شني رايكم فيه



ومن الأكلات المعروفة باستخدام الفتات هي الفتة عيلتنا تقدم فيها كطبق
تراثي يوم عقد قران البنت يقدموها غداء للرجالة اللي يبو يحضرو عقد القران
وهي عبارة عن فتات مفتت ومسقي بشريبة عربية أو طبيخة حمص



وهنا سقيناه شريبة عشاء لعمي



يارب يكون عجبكم والخطوات والشرح واضحات

[guidona]

ماشاء الله روعه ياام ايوبي عيني مضرك وسلميلي علي عمتك بس طريقة اهل زوجي في الجبل تختلف تماما ان شاء الله انحاول انديره في اقرب وقت ونزله اهني يالغلا منوره جدا علي المشاركه

[guidona]

ماشاء الله ياام ايوبي عيني مضرك وسلمي علي عمتك بس سبحان الله كل واحد وطريقته زي مقلتي اهل زوجي من الجبل تختلف تمامي ولو احياني ربي حنديره في اقرب وقت ونزله

[DREAM]

ما شاء الله حبوبة
طبعا اول مرة انشوف فتات مصراتة
وان شاء الله انفكر اندير فتات الجنوب طبعا مش بنفس الخبزة لان خبزتنا لازم من تنور
ويصير خير ان شاء الله
موفقة في المسابقة واكييييييييد يستاهل التقييم

[Om Amory]

ماشاءالله روعه

يسلمو ايديك ام أيوبى

موفقه ان شاءالله

[أم أيوب]

ماشاء الله روعه ياام ايوبي عيني مضرك وسلميلي علي عمتك بس طريقة اهل زوجي في الجبل تختلف تماما ان شاء الله انحاول انديره في اقرب وقت ونزله اهني يالغلا منوره جدا علي المشاركه

سلمها ياربي سلمها

كل مدينة تدير فيه بطريقة صدقتي غيدونا

نورتي يا حبوبة

[أم أيوب]

ما شاء الله حبوبة
طبعا اول مرة انشوف فتات مصراتة
وان شاء الله انفكر اندير فتات الجنوب طبعا مش بنفس الخبزة لان خبزتنا لازم من تنور
ويصير خير ان شاء الله
موفقة في المسابقة واكييييييييد يستاهل التقييم

نراجو في افتاتك دريم

مشكورة ياغالية على المرور والتقييم

[أم أيوب]

ماشاءالله روعه

يسلمو ايديك ام أيوبى

موفقه ان شاءالله

بارك الله فيك أم قموري السمح

نورتي حبوبة

[الساجدة لله]

اااه يابنت بلادي فتاتات مش عاديات بس قصة الفتة والشربة هده اول مرة نعرفها
نعرفهم يديرن فيها بالعجة او القلايا اما الشريبة هده نيوووووو عليا
ماشاء الله لاقوة الابالله حبوبة خديت حصتي تعرفي نقرا في السطور نقول بالك كاتبة اسمي بالكدب اهئ اهئ موفقة ياسمح

[أم أيوب]

اااه يابنت بلادي فتاتات مش عاديات بس قصة الفتة والشربة هده اول مرة نعرفها
نعرفهم يديرن فيها بالعجة او القلايا اما الشريبة هده نيوووووو عليا
ماشاء الله لاقوة الابالله حبوبة خديت حصتي تعرفي نقرا في السطور نقول بالك كاتبة اسمي بالكدب اهئ اهئ موفقة ياسمح

نورتي سجودة يا عسل

وعدتك بيه وهدي حصتك يا سمحة

الفتات ناكلو فيه بجميع الطرق عزوزتي في رمضان كل يوم تدير فتات وعجة وقلايا

يوميا عالفطرو هالاصناف الثلاثة رئيسيات

بس نحبوه حتى بالشربة وغير عادي

ونحبوه بالدحي المسلوق واااااااه منه مع العصيبينات بالدات مصيرينات الشحم

وياعيني عليه مع الجبنة وتحمريه فوق الغاز لين يقرمش