[ مشاركة في مسابقة لا شرقية ولا غربية لركن الأطباق الرئيسية الليبية ]بازين بالسمك من مطبخ ام تغريد

[ام تغريد]

اولا اترحم على ارواح شهداء ليبيا الحرة واللهم اجعل متواهم الجنة ودعواتي لكل اخواننا الجرحى بالشفاء العاجل


حبيت انشارك اخواتي في هذه المسابق بقعد بازين ليبي والبازين معروف عندنا في كل ربوع ليبية الحبيبة ومن اكلاتنا الثراتية الشعبية واغلب الليبين يكون غداهم يوم الجمعة

وتختلف وتتنوع طرق تحضيره ولكن هذه تشتهر بها مدينة طرابلس واكيد بعض المدن الساحلية وذلك لموقعها الجغرافي بالقرب من البحر وان شاء الله راح انزل اكثر من نوع في هذا القسم

وبسم الله نبدا

المقادير

قطع من السمك واستعملت في التحضير {قطع من حاشاكم كلب البحر}

زيت ++فصوص ثوم ++2ملاعق طماطم++ملعقة فلفل احمر++تلت ارباع ملعقة بزار++نصف ملعقة كمون حوت++نصف ملعق ملح ++ربع ملعقة فلفل اسود






3قرون فلفل اخضر++بطاطا ++بيض حسب الرغبة

الطريقة

نضع الطنجرة على النار ونسكب كمية الزيت ونتركه يسخن شوية

ثم نضع قطع السمك فيها حتي تعطي النكهة ويتغير لونها شوية ونخرجها ونتركها جانبا












ثم نضع الثوم ونضيف الطماطم على الزيت والفلفل والبزار والكمون والملح والفلفل الاسود

مع التحريك






تم نضيف الماء بالتدريج يعني مش في مرة لما تحسي الماء ناقص ضيفي مقدار كوب وهكذا وبعدها ضيفي البطاطا والفلفل الاخضر ولحين نضج البطاطا اطفي الغاز

وفي هذا الوقت طبعا بنكون نجهز الدقيق الشعير مع حفنة دقيق فارينة ورشة ملح
والحق الصور اللي نازلات في العجين واخدتهم من موضوعي السابق للبازين واكتفيت بتصوير تحضير الطبيخة وان شاء الله ما يتعارضش مع شروط المسابقة





ونخلطهم مع بعض ونعجنهم بمقدار من الماء حتى تصبح العجينة متماسكة











ونضع الطنجرة على النار وفيها كمية من الماء ونتركها حتى الغليان ونضع قطع العجين ونتركها








حتى تنضج ومش اقل من ربع ساعة الى نصف ساعة حسب درجة حرارة النار اللي عندك


ثم نشكلها بهذه الطريقة





ونسكب الايدام {الطبيخ }عليها ويقدم وهو ساخن مع عصر الليمون عليها










وهذا الشكل النهائي وزي ما قلت البيض حسب الرغبة واني اولادي ما يحبوش البيض المسلوق هذا علاش درت شوية

صراحة ولا احلى من هكي

[أم أيوب]

ماشااااااااااااااء الله تبارك الرحمن منظره مرتب ويهبل يسلمو ايديك

أول مرة نسمع عن بازين بالحوت

حوش عمي غداهم كل جمعة بازين الا ماندر يديروا حاجة مسقية

بس نديروه بلحم القعود أو لحم الحولي

موفقة يا قمورة

[أمـ ساره]

ماشاء الله لاقوة الا بالله

أم تغريد بازين جديد عليا لكن ما شاء الله عليه

شكله رووووعه سلم ايدياتك حبوبة

وهذا زي بازين مسلاته هكي ايديروا فيه

وانتي على أي طريقة درتيه قصدي أي مدينة

مشاركة مميزة حبوبة

ونستنوا المزيد والجديد منك

[مغتربة 7]

بسم الله ماااااااااااشاء الله
بزين يهبللللللللللللللللل
حتى اني اول مرة نعرف البازين ايجي بالسمك
بس شكله يجنن واكيد الطعمة
تسلم الايادي حبيبة
وموفقة فى المسابقة

[زهرة البنفسج]

ماشاء الله والله حتى انا اول مرة نسمع بيه لاكن فكرة جديدة ومميزة

[ranaa]

مشكوووووور والله يعطيك الف عافيه

[الساجدة لله]

تسلمي ياغالية البازين يهبل مش عادي ونحب ناكله بالفروج مش عادي فروج البحر طبعا مش فروج زوج الدجاجة هههههههه حلوة زوج الدجاجة ونحب حتى طعمته بالقرنيط تهبببببل بيني وبينك البازين نحبه كيف مكان

بس مادكرتيش اتبعتي اي طريقة يعني اي مدينة ادير فيه هكي

[DREAM]

تسلم ايديك يا غالية
بازين ايسهف وشكله مرتب
موفقة في المسابقة
وبستاهل التقييم

[روح مغتربه]

اول مره نسمع بيه البازين بالحوت بس اهو طلعوا حتي الطرابلسيات ما يعرفوش
ما شاء الله علي ليبيا قداش مطبخها غني ومتنوع وهذي احسن فرصه لابراز هاتنوع
يسلموا ايديك اختي وصحتين عليكم وموفقه في المسابقه

[الساجدة لله]

روح حبيبة من قال مانعرفوه بس احنى نبو في المسابقة الدقة في تفاصيل هوية الطبق اما من ايدير فيه على اظن هو ايديرو فيه سكان طرابلس متع المدينة القديمة اي الحارة وباب بحر وميزران وبغض النظر عن اصولهم اذا كانو من طرابلس او باقي ربوع ليبيا الحبيبة واللي من اصول تركية اللي اشتهرو بالسمك وحبهم لطبخ بالسمك
وكذلك تفننو في كيفية طبخه بالبحريات كالاخطابوط وفواكه البحر بس هذا ابتكار شخصي لكل ربة بيت او طباخة

ان شاء الله فهمتي حبيبة روح مغتربة نحن نبي تثبيت لهوية الطبق فقط لاغير واظن طريقة البازين المعجون هي اللي يسموها الطريقة الغريانية

تقبلي مروري حبوبة مامت تغريد وموفقة