[ كيكة الدجاج ] من أم لينة

**أم لينه** · 01-23-2012, 12:22 PM

السلام عليكم ورحمة الله وبركاته

بسم الله الرحمن الرحيم
حبيت نوريكم طريقتي في كيكة الدجاج وتقدري اتديريها حتى باللحم
يارب تنال إعجابكم ورضاكم
أولا المقادير :
مفروم صدور دجاج
بصل حسب كمية المفروم
جبنة موزريللا
جبنة شرايح
فستق مهروش أو مرحي
مايونيز
صلصة باشاميل
بيض حسب الكمية
سبيناخ
فلفل أسود +فلفل أبيض+ملح

نبدو في الطريقة
ناخد البصل ونبشره ونحطه في طنجرة مع شوية زيت على النار نخليه لين
يدبل ونضيفله مفروم الدجاج ونحركه ونضيفله ملح وفلفل أسود وأبيض ونخليهم لين يطيبو
بعدها ناخد ورق السبيناخ وندبله في شويه زيت ونرش عليه ملح ونحطهم على جنب
ونجهزو صلصة الباشاميل واللي هي 3ملاعق دقيق نحمرهم في 3ملاعق زبدة
ونضيفلهم كوبين حليب باكو ورشة ملح ورشة فلفل أبيض
ونحرك لين يختر وأول مايبدأ يغلي نطفي النار
نجيب طاجين بايركس وندهنه بالزبده و بعدها ناخد المفروم ونضيفله كمية من
الباشاميل مضروب معاه بيضتين وجبنة موزريللا مبشوره ونخلطهم ونقسمهم
إلى قسمين ناخد قسم ونفرده في الطاجين البايركس ونفرش فوقه طبقة من جبنة
الشرايح وبعدها نضيف السبيناخ فوق الجبنة حتى تتغطى بالكامل ونقوم بتوزيع
طبقة من جبنة الموزريللا وطبقة من جبنة الشرايح و اخر شي نوزع آخر طبقة واللي هي
المفروم حتى تتغطى بالكامل وندخلها للفرن حتى تنضج وبعد إخراجها من الفرن نتركها تبرد تماما وندهن وجهها بالمايونيز ونرش عليها الفستق
صحتين على قلوبكم
وسامحوني لأني ما أضفتش الصور لأني مانعرفش وبإذن الله أول ما نتعلم نوريكم الصور

**أمـ ساره** · 01-23-2012, 12:29 PM

ماشاء الله أم لينة

شكلها كيكة تجنن سلم ايدياتك

وزوري ركن الدعم الفني وان شاء الله تتعلمي منه تنزيل الصور

بالهني والعافية حبوبة

**أم لولو** · 01-23-2012, 12:34 PM

تعرفي ياام لينة شكلها الكيكة مش عادية بس ياريت في صور وتقدري تشوفي قسم الدعم الفني اكيد حتستفيدي منه ويسلم ايديك وانا عندي لمة المدة الجاية ممكن نطبقه ونصوره وننزل الصور في المنتدى

**bent libya** · 01-23-2012, 12:57 PM

عجبتني هلبا ايسلم ايدياتك .......علي قولت ام لولو لو في صور بسسسسسسسسسسسسسس

**أم لينه** · 01-23-2012, 01:00 PM

بارك الله فيك عسوله أم ساره كلك ذوووووووووووق

**أم لينه** · 01-23-2012, 01:03 PM

بارك الله فيك حبيبتي أم لولو وإنتي اللي مش عادية ويسلموووو على كلامك الحلووو وننصحك تجربيها لأنهافعلا رائعه وراقيه

**أم لينه** · 01-23-2012, 01:08 PM

سلمك bent libya بإذن الله أول ما نتعلم تنزيل الصور حننزلهم ومشكوره على تعليقك

**نسمه ليبيه** · 01-23-2012, 02:23 PM

ام لينه يسلموا ايديك

يعنى الباشميل تخلطيه مع المفروم بس وماتحطيش فوقه

وهى تجى طروف يعنى نقصصها مربعات؟

**مغتربة 7** · 01-23-2012, 03:35 PM

سلموا ياعسل
فى انتظار الصور

**أم لينه** · 01-23-2012, 03:40 PM

السلام عليكم
إي حبيبتي نسمه تخلطي الباشاميل مع المفروم والبيض ولو حبيتي في آخر طبقة تقدري تضيفي باشاميل على وجهه قبل ما يخش الفرن باش يتحمر وبعد ما يطلع من الفرن ويبرد تدهني وجهه بالمايونيز وترشي عليه فستق مرحي
ولو عندك أي استفسار تاني تدللي حبيبتي
وقصيها زي ماتحبي حبوبه مربعات أو زي قصة البكلاوة

الموضوع: [ كيكة الدجاج ] من أم لينة

أدوات الموضوع

عرض

[ كيكة الدجاج ] من أم لينة

معلومات الموضوع

الأعضاء الذين يشاهدون هذا الموضوع

المفضلات

المفضلات

ضوابط المشاركة