قلي البطاطا والبادنجان

[زهرة البنفسج]

السلام عليكم ورحمة الله وبركاته

ارجو من الاخوات اللي تعرف طريقة مجربة لقلي البادنجان بدون مايمص الزيت

وكدالك طريقة لقلي البطاطا تكون مقرمشة من برة ومن الداخل طرية وماتمصش زيت وبارك الله فيكم

[نسمه ليبيه]

وحتى انا معاك نستنى فى الرد

[الساجدة لله]

زهورة توا في الالة متع قلي البطاطا بملعقة زيت واحدة وهي من تيفال وتلقيها في المنتدى في الركن الخاص بالادوات والمنزلية وتقدري اديري فيها الباذنجان او انك اديريه في الفرن بس مايجيكش زي المقلي وممكن الاخوات يفيدوك

[أم أبرار]

انقولك أهم حاجة نوعية الزيت وبعدين البطاطا أنقعيها مية باردة وشوية ملح
والباذنجان رشيه ملح وبعد ايدير ميه جففيه بفوطة

[أم لولو]

بالنسبة للبطاطا المقلية يعتمد على موسم البطاطا ونوعها في نوع البطاطا اللي تكون قشرتها رقيقة هلبة ممتازة للقلي لكن مش ديما متوفرة ويفضل انك بعد ماتقصيها اصابع تسلق 5 دقايق ثم تقلي باش تطلع مقرمشة ولكن الاساس نوع البطاطا هادي معلومة اكيدة ومجربة اما الباذنجان يفضل انك ترشي عليه شوية ملح وبعدين تنشفيه من ماءه وتقليه في زيت حار وما يكونش خفيف هلبة الزيت ومش غزير هلبة المهم حار وان شاء الله نكون افدتك

[أمـ ساره]

حبوبة بالنسبة للبطاطا تقدري اديريها في الكوشة

تجي مقرمشة من برا ومن الداخل رطبة وحلولة

واني اندير فيها مبهرة مع دهن الطاجين بشوي زيت وندخلها الكوشة



اما الباذنجان فحسب ما نعرف

انك اديريله ملح وتخليه اينزل ميته وبعدين جففيه كويس واقليه

[وردة الربيع]

مرحبا ....
بالنسبة للبطاطا انا نسلقها 5دقائق وبعدين نقليها
والباذنجان ناخد الباذنجان نغسله ونقعه فى ماء وملح
وبعدين نحطه فى المصفى حتى ينشف من الماء
ثم ناخذ الدقيق وكل قطعة نغمسها فى الدقيق
ونحطها فى الزيت ...
وبصراحة والله تطلع شئ روعة ومافيهاش زيت تماما
وجربيها وقولى ام مرام قالتلى ..