[الكمأ..الترفاس..الكمى.الفقع]من مطبخ خدوج

[خدوج]

طريقة تنظيف الكمأ
الكمأ بالعربى الفصحى
الترفاس بالعافيه
الفقع
الكمى

تعددت الاسماء والصنف واحد

ماكلته بنه وصنه

يقول الرسول صلى الله عليه وسلم
الكمأةُ من المنّ وماؤها شفاءٌ للعين" رواه البخاري ومسلم.

وقد اثبتث الدراسات العلميه شفاءه للعديد من امراض العين
والحمد لله

الترفاس عندما تنزل المطر فى نهاية10 وبداية 11 يكون مؤشر لوجود الترفاس شتاء ذلك العام
وهذه السنة والحمد لله نزلت المطر بالرغم من نذرته عندنا لان بيئتنا صحراوية قليلة المطر
واكثر وجوده يكون بعيد عن المناطق السكنية (الترفاس)
ولم يكثر فى منطقتنا تحديدا
بل فى المناطق المجاورة
وسعره هذه السنة وصل حتى الثلاثين والاربعين دينار للحجم الكبير
ويوجد منه احجام الكبير جدا بحجم البرتقالة الكبيرة الى الصغير زى الحمصة

الترفاس ينمو كالبطاطا ليس له ساق ولااوراق ولونه زى لون الارض يعنى حسب الارض
الموجود فيها

يكثر فى المناطق الصحراوية
طيب المذاق ولذيد جدا بالنسبة لى
وللكثيرين
وتستطسعين ان تطهى به اى وجبه مبكبكة ..كسكسى.. اللى يخطر على بالك
وطهى لايحتاج اكثر من 10 دقائق
بس من اهم الوصفات التى يدخل فيها الترفاس بالدرجة الاولى هو
بازين الترفاس والمرفوسة التى وتعتبر من المقبلات
وان شاء الله احاول نزل موضوع عليهم

المهم نجوا لطريقة تنظيفه
فى من يقشر فيه تقشير زى البطاطا وهذه الطريقة خطأ
الجدر اللى فيه فقط نقطعوه زى البطاطا

شوفو شكله قبل التنظيف

ناخد الكمأ او الترفاس ونحطوه فى صحن به ماء دافى(تنقيع) لينزل التراب الذى به
تقريبا 10 دقائق

وهذا التراب نزل او ترسب فى القاع

نحتاج الى ليفة بلاستيك رطبه
وزمان كنا نظفو فيه بشكارة البلاستيك متع الخضرة اللى يجى فيها الليم والبصل
عرفتوها

وحاولى تدعكى بشوى لين تحسيها تنظفت واذا فى مكان صعب تنظيفه حاولى
تزيليه شوى بالسكين
وبعد ماتكملى اغسيلها بالميه كويس

وهذه بعد التظيف

وهذه اقرب

وبعد التظيف استخدميها بالطريقة اللى تعجبك فى الطهى وصحتين وهنا على قلوبكم

[مغتربة 7]

بسم الله مااااااااشاء الله
معلومااات مفيدة جداً على الترفاس
وقريته الموضوع بالحرف مشوق
اول مرة نعرف البازين ايجي بالترفاس والمرفوسة
واول مرة نعرف طريقة تنظيفه هني ايجي انظيف فى علب و اكياس
مشاء الله عليك ياخدج
نظفتيه خلتيه زي الفلة
تسلم الايادي
ربي ما يحرمنا من مواضيعك المشوقة ولا يحرمنا من ابداعاتك
احلى تقيم للموضوع الرائع وصاحبته

[ام تغريد]

واااااااااااااااو خدوج موضوعك حساس جدا لاني مدمنة ترفاس ولما نشريه كان نلقى ما يشاركني فيه حد لاكن اولادي طالعين لاامهم يعني ما نلحقش معاهم

وتسلمي علي الموضوع القيم بعد الغيبة

ونبي نقولك بنبعتلك رسالة علي الخاص ما بتش توصل لان بريدك معبى ياريت تمسحي منهم باش توصلك

[أم لولو]

بالفعل معلومات مفيدة على الترفاس وانا نموت فيه الف شكرخدوج

[الساجدة لله]

حي عليا انا على الترفاس رعاش في رعااااااش ورعاش بالدبل يادجدوج ههههههههههه

بسم الله ماشاء الله لاقوة الابالله حبيبة

موضوع مميز زيك ياغالية ويستحق التقييم

[ام ليبيه حره]

من احلى الاكلات

بارك الله فيك

[DREAM]

بارك الله فيك اختي عالموضوع الاكتر من رائع
بصراحة نموووووووووووووووووووووووووووت في الترفاس
وخاصة مع المبكبكة
تستاهلي التقييم

[روح مغتربه]

ررررررررررررروعه خدوج موضوع يداعب المشاعر هههههههه
تعرفي من فتره وانا موصيه الحاج ايجيبلي منه بس قال ناقص شويه السنه هذه
لان الناس معادش ايخشو لرمله خايفين اشويه من كثره السلاح

[خدوج]

اقتباس:
المشاركة الأصلية كتبت بواسطة مغتربة 7
بسم الله مااااااااشاء الله
معلومااات مفيدة جداً على الترفاس
وقريته الموضوع بالحرف مشوق
اول مرة نعرف البازين ايجي بالترفاس والمرفوسة
واول مرة نعرف طريقة تنظيفه هني ايجي انظيف فى علب و اكياس
مشاء الله عليك ياخدج
نظفتيه خلتيه زي الفلة
تسلم الايادي
ربي ما يحرمنا من مواضيعك المشوقة ولا يحرمنا من ابداعاتك
احلى تقيم للموضوع الرائع وصاحبته

اهلا مغتربة
منورة بوجودك وكلامك الحلو
الله لايحرمنى من طلتك الحلوة
تعرفى البازين يجى بالترفاس والدشيشة
شى حطير والله
وعن الفقع هو اكيد يجى نظيف
بس نعلمك ان المعلب غير الجاهز
واظنه انواع
انى نعرف الفطراللى يجى فى الحكة نديرو فيه للبيتزا
بس هذا(الترفاس)غير اطيب واحلى
وان شاء الله يكتبلك ربى وذوقيه قولى امين
منورة مغتربة

[خدوج]

اقتباس:
المشاركة الأصلية كتبت بواسطة ام تغريد
واااااااااااااااو خدوج موضوعك حساس جدا لاني مدمنة ترفاس ولما نشريه كان نلقى ما يشاركني فيه حد لاكن اولادي طالعين لاامهم يعني ما نلحقش معاهم

وتسلمي علي الموضوع القيم بعد الغيبة

ونبي نقولك بنبعتلك رسالة علي الخاص ما بتش توصل لان بريدك معبى ياريت تمسحي منهم باش توصلك

اهلا باام تغريد
والله كلك ذوقك
ترفاس ادمان وياريت فيه له علاج
انى ولادى مايحبوش الا الكبير فيهم
فشوفى الحظ
انى والاب ولدى الكبير منافسات على حب الترفاس ههههه
تسلمى عالمرور ورسالتك وصلت
الله يحفظك