[فطيرة ليبية محشية] من مطبخ مهاجرة ليبية

[مهاجره ليبيه]

هلا وغلا
منشارك معاكم في اول وصفه ليا

وطبعا من اختراعاتي الخاصه

ومعرفتش شن منسميها الحق يلا
المهم عباره عن الفطيره الليبيه العاديه
بس انا عجنتها بخليط من دقيق ابيض
ودقيق الاسمر
مرعاه للظروف الريجيم


المقادير

دقيق نوعين وملح ونعجنهم بالميه لين
تكون عجينه لينه ومتماسه
يعني زي الفطيره العاديه
ونخليها ترتاح فتره نصف ساعه مش اكثر
لانها تولي تتمزق بعدين


عادي نجنوها ونقرصوها ونخلوها ترتاح



وبعدين نحطوا في الوسط كيمه لحم مفروم
زي الصورة



درت نوعين والتانيه دهنتها بجبنه
فيلادلفيا وهريسه عربيه


وبعدين نطبق الطرفين المتقابلين على بعض
زي هكي
والجناب زي الصورة نحطوا جهه وحده والثانيه
نثنوها تحت باش مايكونش طبقه وحده بس



ونفردوها باليد مرة ثانيه على قد ماتقدروا
المهم ماتتمزقش



ونطيبوها في الطاوه عادي زي الفطيره العاديه
وهده منظرها بعد ماطابت





هذه حصه عود قرفه المختفيه



والله مش نشكر فيها بس والله جت تهبل
وبديت ندير فيها شبه يوميا لانها ساهله


وان شاء الله يعجبكم طبقي الاول
ونبي تشجيع راهو

[أم أيوب]

حبيبة تسلم ايديك

بس ياريت حطيتي مقادير العجينة

[نوارة ليبيا]

ماشاء الله تسلم الأيادي ^_^

[مهاجره ليبيه]

حبيبة تسلم ايديك

بس ياريت حطيتي مقادير العجينة

هلا زهورة
المقادير دقيق نوعين وملح ونعجنهم بالميه لين
تكون عجينه لينه ومتماسه
يعني زي الفطيره العاديه
ونخليها ترتاح فتره نصف ساعه مش اكثر
لانها تولي تتمزق بعدين
ومشكورة على المرور حبوبه

[مهاجره ليبيه]

ماشاء الله تسلم الأيادي ^_^

الله يسلمك نواره
مشكورة على مرورك يا غاليه

[Rose Petals]

تسلم ايديك
فعلا بسيطة وشكلها سريعة
وحاجة اخرى عجبتنى هو توقيعك
بارك الله فيك

[سحابه صيف]

يسلمو شكلها اتهبل

[السمحة]

مشكورة حبيبتى فطيرة تجى فى الخاطر وان شاء الله نجربها علشان الوزن فى الزيادة

[ابريكه]

يسلم يدياتك مهاجرة

[مهاجره ليبيه]

تسلم ايديك
فعلا بسيطة وشكلها سريعة
وحاجة اخرى عجبتنى هو توقيعك
بارك الله فيك

الله يسلمك روز
تسلمي يا رب هذا من ذوقك
بس مش عارفه خيره التوقيع مايطلعش طول
عموما مشكورة حبيبتي على مرورك