[ مشاركة تشجيعية في مسابقة لا شرقية ولا غربية لركن المعجنات الليبية ] السفنز من مطبخ أمـ ساره

[أمـ ساره]

السلام عليكم ورحمة الله وبركاته


حبيت نقدم لكم طريقتي في السفنز الليبي وما ادراك ما السفنز

زمان أمي ربي يحفظها كانت ادير فيه في الاعياد

وكنت نسهر معاها ونتفرج عليها واني صغيرة

ربي يحفظها كانت ما ترقد ليلة العيد وهي تجهز في كل اللازم

والله ايامات حلوة وكانت ليها طعم ولا أروع


هذه الطريقة طبعاً وأغلب الليبيات فالحات فيه ماشاء الله

حاولت نكيل المقادير بالتقريب


المقادير

كيلو دقيق

ملعقة ونصف كبيرة خميرة

ملعقة كبيرة سكر

ملعقة صغيرة ملح ( أو حسب الرغبة )

ملعقة كركم ( هذه اضافتي )

مرة قابلت وحدة نصحتني باذافة البزار للعجين حتى يقعد رطب ويتحمل لثاني يوم

واني من حبي للبزار ما ترددت وجربته


ماء دافيء للعجن ( حوالي كوبين ) أو حسب نوع الدقيق







الطريقة

نضع الخميرة والسكر في نصف كوب ماء دافيء

ونجهز الدقيق ونخلط معاه الملح والبزار ( الكركم )

بعد ما تتفاعل الخميرة وتفيض في الكوب نضيفها للدقيق

ونعجن مع اضافة الماء حتى نتحصل على عجينة رطبة وتلصق باليد

نغطيها بكيس بلاستيك ونتركها تتخمر في مكان دافيء حوالي نصف ساعة

أو أكثر حسب درجة حرارة المكان









نقوم بتقسيم العجينة لكور متوسطة الحجم أو حسب الرغبة

اني نحبها تكون صغيرة شوي حتى نتحكم فيها

ونضعها في سفرة مدهونة بالزيت وخليك كريمة في الزيت

وتترك لترتاح شوي





نجهز طاجين أو طاوة غارقة ونضعها على النار بعد ما نصب فيها زيت

وطبعا الزيت يكون غزير وسخون حتى نقلي فيه السفنز

وبعد ما يسخن الزيت كويس

ثم نقوم بفرد كل كرة لوحدها في صينية أو سفرة مدهونة بالزيت


( شوفوا شكلها صفراء اتقول مكشخة عليها هههههههههههه )





ونقلي كل وحدة بروحها ولازم يكون الزيت سخون والنار عالية





ولازم تراقبيها وتقعدي تصبي الزيت على الوجه الي من فوق بالملعقة

زمان ادير فيها امي وديما نتسأل نقول علاش

لكن هذه خطوة مهمة في السفنز حتى تكون النتيجة مرضية

واول ما تتحمر من تحت نقلبها ونخليها شوي ونرفعها من النار





ونضعها في صحن مغطي جزئياً بكيس نايلون حتى ما تجف

وهكذا حتى تكتمل الكمية كلها


وتمتعوا بسفنز سخون وحلو وخاصة عالصبح













طبعاً طريقة أكلها منوعه

أما ياكل لوحده مع الشاهي بالنعناع

أو يوزع فوقه العسل أو مربى أو مع الجبن يا سلااااااااااااااااام


وهذه طريقتي ( الطرابلسية ) فيه الي نعرفها من زمان


وبالهني والعافية على قلوبكم

[روح مغتربه]

ام ساره يسلموا ايديك تبي الحق الموضوع ما قريتاش بس عارفه انا حلو مادامه منك ومستعجله نبي انرد اول وحده وناخد السفنز كانه فيه لاول واحد ايرد
موفقه ام ساره وما شاء الله عليك ناشطه تبارك الله

[روح مغتربه]

هذه وين فتحت اعيوني وشفت الموضوع ما شاء الله سفنزات علي قولتك ينفع فطير

وربي يحفظلك اميمتك ويعطيها الصحه وفعلا السفنز كل اليبين يعرفوه وعن قريب ان شاء الله انشارك بيه بطريقه الزمنيه الجنوبيه علي قولتكم لانه الطريقه القديمه فيها اختلاف بسيط لاكن جوهري في الطعم والشكل وربي يقدرني ونشارك بيه في المسابقه

[الساجدة لله]

اوووووه ام سريوة ياسمحة تسلم الايادي ياغالية وسفنزات مميزات لي عودة من جديد لتفصيص الموضوع هههههههههه

[ام تغريد]

هههههههههههه تعرفي علاش ضحكت لما شفته سفهني وخطر علي بالي في ها الصقع والجو الممطر عندنا
قالتلي بتي ما نشبعوش الا لما فيه موضوع جديد
فقلتلها اللي يسمع ايقول امك بايرة واني اليوم بطوله في المطبخ سلامتهم

عموما تسلم ايدياتك ما شاء الله وحلوة منك فكرة الكركم

وان شاء الله موفقة في المسابقة

[ام هداية]

يسلم ايدياتك ام اسراء ما شاء الله يعطيك الصحة سفنزات حلوات منورة

[ليبية]

الله الله على السفنزات السخينات يعطيك الصحة والهني ماشاء الله الله يسلم ايديك الحلوة

[Om Amory]

الله الله يسلموو ايدياتك

[مغتربة 7]

ماشاء الله عليك ام سويرة
سفنز سخون فى ها الصقع يقيم القلب
فكرة البزار جديدة عليا شفتها فى موضوع منونة وموضوعك ان شاء الله انجربها
تسلم الايادي حبيبة

[أم لينه]

تسلم الأيادي يا عسللللللللللللللللللللللللللللللل