[ بليشنك] من مطبخ المصراتيه

[المصراتيه]

السلام عليكم ورحمه الله

المقادير******
كوب سكر
كوب زبده
5 بيضات
2كوب دقيق
ظرف خميره Bp
فانيليا
رشه ملح
فواكه ( تفاح ـموز ـ عنب ـ اي نوع تحبيه )
برش ليمون
كاكاو


نجي للطريقه خطوه بخطوه
اول شي نفصل الصفار علي البياض ونخلط البياض بالخلاط الكهربائي تم انضيفلا رشه الملح وكوب الا ربع سكر ونخلط لما يصير كيف الكريمه نحطه في التلاجه ( الفريز)..





الخطوه التانيه
ناخد الصفار ونخلطه مع الزبده وربع كوب السكر والفانيليا تم نضيف الدقيق والخميره ونعجنها ( شكلها نفس عجينه الغريبه)

نحول منها قطعه صغيره (كيف عبود الزميته ) ونحطه في الفريز نخليه يجمد شويا



نطرح العجينه في الطاجين ونخليه نهايه العجينه مرفوعه شويا حوالي سانتي او اكتر



نقطع الفواكه قطع صغيره ونحطها فوق العجينه ونرش فوقه برش اليمون او فانيليا للنكهه.. بالنسبه ليا كان عندي تفاح وموز بس وزدت عليهن شويت زبيب.



ناخد البياض من التلاجه ونصبه فوق الفواكه نغطيها كويس ،،



ناخد قطعت العجينه ونغمسها في الكاكاو



ونبرشها فوق البياض " البرش يكون ابيض وقهوي لان العجينه من برا بس تكون مغطيه بالكاكاو"..



واخيرا اندخلها الكوشه وتولع من لوطا بس
وهدا شكلها بعد ماطابت



وخليها تبرد في التلاجه
طبعا اني مستعجله علي قصتها جت مفرفشه

هيا تفظلو معايا وصحتين وعافيه



وان شاءالله تجربوها وتعجبكم يارب،،،

[خدوج]

يسلموا يالمصراتية
تفتح الشهية بشكل مش عادى
اليوم عاجنه بريوش ام ابرار
كان ماهذا طول للمطبخ ودرتها
ونحس فيها بنينة صح
يسلموا ايديك وايدين مرات خالك
واحلى تقييم
وتم الحفظ وجارى التطبيق قريبا باذن الله

[خدوج]

مصراتية
عدلى العنوان
يعنى ديرى[بليشنا] من مطبخ المصراتية
يعنى بين قوسين
وشكرا لك

[المصراتيه]

يسلموا يالمصراتية
تفتح الشهية بشكل مش عادى
اليوم عاجنه بريوش ام ابرار
كان ماهذا طول للمطبخ ودرتها
ونحس فيها بنينة صح
يسلموا ايديك وايدين مرات خالك
واحلى تقييم
وتم الحفظ وجارى التطبيق قريبا باذن الله
[font=comic sans ms][/fnt]

سلمك يارب
ورينا البريوش انراجو في تطبيقك
بنينه صح
بارك الله فيك علي التنبيه في العنوان والتقيم خدوجه

[ام جنى]

مشاء الله مصراتيه
شكلها تسهف
توا انديرها اكيد

[لولو]

تسلم أيدياتك

[الساجدة لله]

ماشاء الله لاقوة الابالله

تسلم ايديك ياغالية ووصفة جديدة عليا واكيد المطبخ البولندي مش عادي

اسمعي عندهم وصفة اسمها دمبلنغ بالبطاطا ومحشية مربى وفي سلاطات يهبلو قولي لمرت خالك تعطيك وصفاتهم وجيبيهملنا هههههههههههه حبيبة وصفة مميزة وتستحق التقييم

[أم ميوسة]

ما شاء الله

أكلة روعة وجديدة علينا

تسلم ايدياتك المصراتية وصفاتك تهبل

نستنوا منك مزيد من الابداعات تثري القسم والمنتدى

موضوع رائع ويستحق التقييم بجدارة

تسلمي

[مغتربة 7]

اكيد راح نجربوها وعجبتنا هلبة
بسم الله ماشاء الله
حلى ايجي فى الخاطر
تسلم الايادي حبيبة
تستاهلي احلى تقييم

[ranaa]