يا فالحات يا مدبرات انقدونى من التفكير

[التا ئبه لله]

السلام عليكم
كيف حال الحلوين اليوم ان شاء الله تمام

يا بنات نبى نستفيد من خبرتكم طبعا ولا سيما

المتزوجات اى ربات البيوت الا ما يشتغلويش

كيف حالتى نبى نستفيد او نستفيدو كلنا

كيف الواحد تكون ست بيت درجه اولى

يفتخر بيها زوجها وابنا ئها طبعا لما يكبرو
انها هيا ام عطيمه كرست حياتها من اجل
راحة زوجها وابنائها بمعنى
انها تكون مدبره اقتصاديه تعرف كيف
تتصرف وقت الازمات ما تكونيش منانه
انى حرمتى روحى من كل شى على خاطركم
انى انى وهالو مجره
نجو للمفيد نبى نعرف كيف الواحده تتصرف
بمعاش راجلها و خاصه الزوج المسرف

يعنى كيف تكونه كيف تحافط على تعبه
وشقه زى ما يقولو كيف تحاول تسرف على الحوش وتقتصد من المعاش لوقت الحاجه من
غير ما يعلم
بالله يابنات اعطونى رايكم عارفه كترة الكلام بلا فايده بس هدا الامر متعبنى لدرجه لاتوصف
لانى زوجى وانى مسرفين لدرجه لا توصف
ونبى خبرتكم ما تقولوليش خشى جمعيه
من غيرها نبى اراء تانيه ارجوكم
وتفبلو مرورى اختكم فى الله:d:d:d

[فضااوي]

موضوع مفيد تائبة
لي عوده بأذن الله لاني تو طالعه

[ليبيا قلبى]

بارك الله فيك على الموضوع
لانه مفيد
حتى انا نبى نعرف كيف نستفيد
اشويه من المصروف الحوش

لانى مبذره درجه اوله
هذا كله مازال ماعنديش عيال
لما ايجو العيال كيف ايصير فيه

انا زوجى كل بدايه شهر يعطينى مبلغ نشرى بيه
حاجات الحوش
لما نطلع السوق ماانروح حتى بربع جنيه
مش عارفه اتقول ايبزن فيه

[التا ئبه لله]

موضوع مفيد زهورة

لي عوده بأذن الله لاني تو طالعه

هههههههههههههههههههيعطيك الهنى يا فضفض
مشكوره لمروك يا عسل مش زهوره العتب على النطر خخخخخ

[التا ئبه لله]

لانى مبذره درجه اوله
هذا كله مازال ماعنديش عيال
لما ايجو العيال كيف ايصير فيه

انا زوجى كل بدايه شهر يعطينى مبلغ نشرى بيه
حاجات الحوش
لما نطلع السوق ماانروح حتى بربع جنيه
مش عارفه اتقول ايبزن فيه

مشكوره حبيتى ليبيا قلبى والله العطيم زيك

المشكله اوخيتك مدمنه اسواق تخيلى نمشى لسوق
على خاطر المواد الغدائيه ولا المنزليه
مش باش نترفه لا والله قلت اكيد
الجيران يقولى خيرها كل ما نركب من الدرج امتع العماره خشخش خشخش ههههههههههه
الراجل هبلته ما فيش حاجه تجى خاطرى فيها نسيبها

المشكله اسراف او تبديرمع انى

والله العطيم من النوع الانحب نطيب ونتفنن

بس نحس فيه غلط مش راضيه على ندير فيه
قلت بالك ربى يرزقنا بوخيه مدبره نستفيدو منها

[SwEeT BeBa]

السلام عليكم ورحمة الله

أتشرف اني اكون بينكم أخوات غاليات ... ويسعدني انه يكون اول مشاركة لي في موضوع الغالية التائبه ... اللي ليها وحشـــــــــــــــــــــــــــة وربي العالم

المهم نجوا للموضوع ...


بالنسبة للتسوق شئ والاسراف والتبذير شئ ثاني .. بالنسبة لي اني مدمنة محلات مواد منزلية بشكل لايوصف يعني عندي نتفرج عليهم افضل من محل ذهب ولا ملابس.. هههههههه ممكن تضحكوا لكن هذي الحقيقة

لكن هذا مايعنيش اني لازم نسرف ونشري كل شي ... لا يكفيني اني نتفرج ونشوف شن اخر الادوات اللي موجودة ولو في شي لازمني ويستحق مانتردد ونشريه على طول ...


وفعلا الانسان أحياناً بدون قصد يلقى نفسه صرف كل اللي معاه واحياناً في حاجات متلزمش ...

لكن أختي تائبه نقولك على حل ممكن يساعدك مع انه يعتبر فيه نوع من التضييق لكن المهم النتيجة ومع الوقت حتكوني مرتاحة وتلقي نفسك موفرة مبلغ لابأس بيه وهذا شئ نقوم بيه أحياناً وعن تجربة

الخطة
... يوم اللي تعرفي انك بتطلعي للتسوق خودي ورقة وقلم واكتبي الحاجات اللي محتاجتيها وناقصاتك وحاولي أنك تقدري ثمن كل سلعة حوالي تقريبياً ... وعلى هذا الاساس خودي معاك مجموع المبلغ اللي طلعلك وزيدي عليه من 10 الي 20 دينار للاحتياط فقط ونكرر للاحتياط

صدقيني كل ماتجي بتزيدي شي تفكري انه المبلغ اللي معاك مش حيكفيك وبالطريقة هذي حتوفري

وأن شاء الله ربي يوفقكم جميعاً

ويجعلنا من القانعين

[أم أيوب]

حبيبة موضوعك حلو ومفيد لكل ست بيت

أنا زوجي مش موظف

تاجر ومسؤؤل على حوشين

يصرف عليا وطلبات حوشنا

ويصرف على أهله وأهله ماشاء الله أسرة كبيرة منهم عيال أخوه متوفي

زوجي مبذر بشكل لا يوصف

بس أنا الحمد لله عندي قناعة ما ناخدش الا اللي يلزمني

من فترة بديت في خطة معاه

ناخد منه مبلغ كل شهر وندسه

زي الحصالة

بسبلة اني نبيهم لعيالنا لما يكبروا

وهي تبي الحق مخليتهم للطوارئ

الواحد مش ضامن الحال مرات تنوضي في يوم ما تلقيش حق الخبزة في جيبك

فكويس ان الواحد يكون موفر للوقت

مش معنى هذا اني حارمة نفسي من شي

بس نقسم في حاجاتي على شهور

مثلا الشهر هذا ناخد كذا وكذا

الشهر الجاي ناخد وهكذا...

ومصروف الحوش لما كان يطلع بروحه للسوق يجيب في حاجات أكوام مش متاع نفرين فالحوش

والله مرات نين يفسدوا ونرميهم

عودته اني نطلع أنا معاه وناخد اللي نبيها لقينا ان ميزانية الحوش وفرنا منها

وخديت الحاجات المفيدة اللي نبيهم

التوفير في يدك انتي حبيبة الا الرجالة ما يوفروش في حاجة

[ليبية]

موضوع ممتاز جدا
يعطيك الصحة عليه
بالنسبة ليا اني يا غالية عندي نقاط اساية نعتمد عليها باش نوفر:
تبدأ هذه النقاط من اول مايجي المرتب نقعمز اني وياه ونقسموا المرتب الى 7 اقسام
1 لزوجي(يصرف شن يبي منهم من غير مايولي على المال المدخر)
2 ليا
3 للصغار
4 للتليفون والكهرباء
5 للسيارات
6 للحوش (غذائية ومنزلية)
7 الباقي يندس (مال مدخر)
التليفون والكهرباء كل شهر نقيم في 20 دينار في ظرف بروحهم و20 ينصرفوا على النت
وبالنسبة للغذائية نحط قائمة بللي نبيه وعندي طلعتين للسوق في الشهر طلعة اول الشهر وطلعة نص الشهر والخضرة نشري فيها كل اسبوع او عشرة ايام
ومدايرة لروحي بقيمة 10 دينار نشري لروحي اي حاجة خاطري فيها في السوق خاطي القائمة (شكلاته ,حلوة,تشيبس اي حاجة)
ومبلغ تاني لمواد التنظيف كل شهر نجرب حاجة
اما المنزلية اذا كان فيه حاجة ضرورية اوك وكان هذا مانخشش اصلا

وبالنسبة للحوايج مالقيتلهمش حل خصوصا انه التييرات وقفاطين السهرة بدت اسعارهم تعلى اكثر واكثر والله المستعان

يارب نكون افدتكم اكثر واكثر

اللهم بارك لنا في مارزقتنا اللهم انا نعوذ بك من الدين والفقر وغلبة الرجال

[ابريكه]

التائبة موضوعك جداً مهم
انا نحب نستعمل الورقة معاية
نكتب حويجاتي الناقصات ونجيبهم واروح معاية فلوس زايدات
فكرة انك تكتبي في ورقة حاجاتك مهم جداً
وجربيها وح تعجبك جداً
ربي يوفقنا جميعاً

[أمـ ساره]

السلام عليكم

موضوعك جداً رااائع أختي التائبة

والله معاك حق مشكلة المصروف مشكلة كبيرة والله والتبذير مصيبة

واني زيك لما نطلع نحب نشري وخاصة المواد المنزلية

لأني نعتبر في نفسي مازال جديدة وما عندي كل شيء نبيه وخاصة للمطبخ

لكن الحمد لله بديت الفترة الاخيرة نحاول نقص على قبل هلبة

يعني قبل ما نشري الحاجة نفكر ستين مرة ونشوف لو ضرورية او لا

لكن مازال والله نبي نشد اكثر

من ناحيتي وناحية زوجي لأنه يحب يشري الحاجات الكويسة ديمة

وما يدور في الاسعار وهذه عقدتي اني نحب نشوف الاسعار باش نعرف شنو نشري


وربي يرزقنا ان شاء الله ويغنينا بحلاله عن حرامه


ومثل ما قالوا الاخوات قبل ما تطلعي من السوق اكتبي ورقة

وحطي فيها الاشياء الضرورية فقط

وان شاء الله ربي يفتح عليك ويوفقك