[مشاركه في مسابقة لا شرقيه لا غربيه]كيكة الطواسي من مطبخ روح مغتربه

[روح مغتربه]

بسم الله الرحمن الرحيم

مشاركتي اليوم مشاركه اتعز عليه ياسر لانها تدكرني
بايام الطفوله وبالدروس الي علمتها ليه امي في اعداد الكيك
وكنت نستمتع بتعلمها ومن تم باكلها وياما درتها مع امي
ايام الدراسه لما كنت ندرس ابتدائي ورفعتها امعايه للمدرسه
وكنت نفخر باني انا الي درتها
وبطلة الموضوع هي الحلوه الي اتشوفو فيها
طنجرة الكيكه وعمرها يا عزيزاتي تجاوز الاربعين عام
قولوا ما شاء الله

واتلاحضو ان اسم الكيكه غريب ماليش علاقه بالطنجره
بس الاسم ماخود من ان المعيار الي تنقاس بيه الكيكه
هو الطاسه الي اتشوفو فيها في الصوره
ومقادير الكيكه هذه هي مقادير معتمده من زمان
من حوالي اربعين عام يعني من عمر الطنجره ههههههه
والطنجره معروفه قبل الغاز يعني كانو ايطو فيها في التنور
بعد ما يكملو رمي خبزة التنور او علي السطوفه
وكانت النساء يعدو الكيك
في قرية[ اقار] في الجنوب الليبي بهذه المقادير
وهي
6بيضات [استعملت البيض الوطني من دجاجاتي ]
طاسه سكر
طاسه لبن [زمان كان يستعملو اللبن الممخوض ]
طاسه دهن[استعملت 2ملعقه كبيره سمن وطني والباقي زيت ]
3طواسي دقيق منخول
باكو بيكن بودر
ملعقه كبيره قرفه مطحونه
حبات مستكه حره مطحونه

الطريقه
نخلط البيض مع القرفه والمستكه الحره
ونضيف السكر ثم اللبن ثم الدهن ونخلط كويس

تم نضيف الدقيق ونخلط ونضيف البيكن بودر
ونخلط باليد فتره ممكن دقيقتين او ثلاثة

ونجهز الطنجره ندهنها بالزيت ونرش الدقيق
ونصب خليط الكيكه في الطنجره ونغطيها ونسكر بعض الفتحات الي في الغطاء والحق ما نعرفش ليش
نحط الحديده متاعة الطنجره علي نار هاديه
ونحط الطنجره ونخليها حوالي نصف ساعة

ويكون الكيك جاهز نخليه يبرد
ويقدم مع طاسة شاهي منعنعه

مانوصفلكمش الطعمه الخياليه
و بنه القرفه والمستكه مش عاديه
وان شاء ايكون الموضوع اعجبكم
تقبلو تحياتي

[أم ميوسة]

أنا أول رد ههههههههههه

فرحانة الطويسة المنعنعة والكيكة السمحة هادي من نصيبي

تسلم ايدياتك روح مغتربة موضوعك يهبل والكيكة صنتها وصلت من الجنوب للغرب الليبي

مواضيعك كل موضوع احلى من التاني

ومافيش حاجة احلى من طرق زمان وبنة ماكلة زمان

تسلمي روح مغتربة وتستحقي التقييم والفوز

ربي يحفظك أن شاء الله وينولك ما تتمني ويدوم عليك صحيحتك

[أم الرجال]

كيكة حلوة يا روح مغتربة

وحانجربها بإذن الله

[روح مغتربه]

الله ايسلمك ام ميوسه والصراحة اخجلتيني
وربي ينولك ما في بالك حتى انت ويعطيك من خيري الدنيا والاخره

[روح مغتربه]

اقتباس:
المشاركة الأصلية كتبت بواسطة أم الرجال
كيكة حلوة يا روح مغتربة

وحانجربها بإذن الله
الله ايحلي ايامك ام الرجال
وفي انتظار تطبيقك بس ما تتفاجايش ان الكيكه مش خفيفه زي الكيكات الي توه ولما اتبات اتكون احلي

[sweet nona]

كيكة حلوة
علاقولت ام ميوسةماحلاهم
حاجات زمان
وباهي كان بنجربها بنجي للحوش
بناخد منك هالطنيجرة المسخوطة
والله كان انشوفها مانقول ادير بيها كيكة
ولا تخطر عليا
ماشاللله تسلم ايدياتك دائما مميزة
وتستحقي التقييم

[مغتربة 7]

بسم الله ماشاء الله
دائماً مميزة بطرحك الرائع
كيكة تهبل وماشاء الله على الطنيجرة
تسلم الايادي
وموفقة فى المسابقة
احلى تقييم لعيونك

[أم ميوسة]

كيكة حلوة
علاقولت ام ميوسةماحلاهم
حاجات زمان
وباهي كان بنجربها بنجي للحوش
بناخد منك هالطنيجرة المسخوطة
والله كان انشوفها مانقول ادير بيها كيكة
ولا تخطر عليا
ماشاللله تسلم ايدياتك دائما مميزة
وتستحقي التقييم

ههههههههه والله صدقتي هالطنجرة المسخوطة ما يطلع منها

تعرفي شدتني حتى أنا الطنجرة وقعدت نفكر وين بنحصلها هههههه

بجدياتت كان تنباع ألا لما نشريها نحب أدوات زمان ولا يعلى عليهم اصراحة

روح مغتربة جبتي الدوة لروحك بموضوعك هادا دبري هالطنجرة كيف تبعتيها لينا

[روح مغتربه]

اقتباس:
المشاركة الأصلية كتبت بواسطة sweet nona
كيكة حلوة
علاقولت ام ميوسةماحلاهم
حاجات زمان
وباهي كان بنجربها بنجي للحوش
بناخد منك هالطنيجرة المسخوطة
والله كان انشوفها مانقول ادير بيها كيكة
ولا تخطر عليا
ماشاللله تسلم ايدياتك دائما مميزة
وتستحقي التقييم

اقتباس:
المشاركة الأصلية كتبت بواسطة أم ميوسة

ههههههههه والله صدقتي هالطنجرة المسخوطة ما يطلع منها

تعرفي شدتني حتى أنا الطنجرة وقعدت نفكر وين بنحصلها هههههه

بجدياتت كان تنباع ألا لما نشريها نحب أدوات زمان ولا يعلى عليهم اصراحة

روح مغتربة جبتي الدوة لروحك بموضوعك هادا دبري هالطنجرة كيف تبعتيها لينا
ههههههههههههههههههههههه
والله ضحكتوني ربي يسعدكم
حرام عليكم هالغزيل مسخوطه
مسيكينه يا خسارة تعبها راهي عزيز من عهد الملك ادريس وبعد هالكلام تبوني نبعتها ليكم ههههههههههههههه

[خدوج]

ماشاء الله ياروح قداش تعز عليا هاالطنجرة
بس اول ماتزوجت كنا نستعير فها من جارتى قداش تهبل
بس كيكتى مختلفة عنك
وبعدين لمن حوش بوى فضى خديتها
بس للاسف طيرت غطاها والحديدة الوطية ودرتها
قعدت غير الطنجرة ونحط فيها فى الكوشة
حتى منظر الكيك يهبل
والقديم قديم
يسلم ايديك وايدين الماما
وتستاهلى التقييم