بالله فيدوني بيان اختي بعد اسبوعين

[عنود الصحراء]

السلام عليكم ورحمه الله
اخواتي بالله ياريت تساعدوني انا بيان اختي بعد اسبوعين وهي حايره شنو ادير وشنو الضيافه من ا من لما يجو لين ايروحو هههههه طمعه ونبي افكار في الضيافه واللبس والاكسسوارات وربي يحط ايدياتها في الجنه هالي تكتبلي وترد عليا رررررراني والله في حيره من امري

[فنان]

من البدايه الف مبروك علي وخيتك وانشاء الله ربي يتمملها علي خير
منعرفش هل كل منطقه تختلف في اسلوب الضيافه او لا عموما اني عائلتي طرابلسيه وهكي نفرقو في كل حفلات الخطوبه متع بنات العيله
اول مايجو شوكلا نو ع راقي بحكم ان العدد محصور حتي لو غاليه مش حتكلف هلبا
وبعدين رزاطه (حليب او عصير اللوز) معاه عبمبر وفي باكوات (علب)لقطه احلي
وبعدين شاهي او نسكافيه وحلويات او كنافه اني منفضلش الكيكه لو حوش العريس بيجيبو تورته
بعدين العشاء رز بلاو في الي يدير في شعيريه لكن ارز احلي ومعاه 4 حاجات و3سلايط فكك من المبالغه متع 5 او 6حاجات وخليهم 2 بدجاج و2 بلحم
وبعدين بكلاوه في علبه وكوفيتي خليه مفترقين لان في علب متع بكلاوه وكفيتي مع بعض مش حلوات هلبا والورود متع الكوفيتي منظرهم احلي وكان تبو مكسرات احني مدرناهمش
وفي لو تبي اكسوارات لكؤوس الرزاطه زي الشنترو والافضل انا تخلي الوان العلب زي بعض ونفس لون قفطان العروسه لقطه روعه
ولو تبي نعرف محل يبيع في اكسوارات حلوه لتزيين
وانشاء الله انكون افدتك

[عنود الصحراء]

بارررررررك الله فيك اوخيتي .... باه بنسالك معناهاى كان درت كنافه بروحها ممعاها شي... وحاجه تانيه مفهمتش .......بكلاوه في علبه وكوفيتي خليه مفترقين لان في علب متع بكلاوه وكفيتي مع بعض مش حلوات هلبا والورود متع الكوفيتي منظرهم
وشنو هو المحل متع الا كسسوارات وراس اوخيتي
وان شاء الله ربي يعطيك مافي بالك يارررررررررب

[نسمه ليبيه]

تمنيت نفيدك لكن انا من البيضاء واكيد العادات فيها اختلاف
ومبروك على اختك

[Om Amory]

ان شاءالله البنات يزيدو يفيدوك

وماشاءالله فنان ماقصرت

[الكتومه]

حبيبتي انتى من وين بالضبط اي المنطقه كيف ما قالت الأخت ان كل منطقه تختلف ع التانيه وانا من بنغازي لو حابه اي مساعده ابعثيلي رساله ع الخاص وراح انساعدك بكل ما يمكن بأذن الله

[sweet nona]

حق فنان ماشالله ماقصرت

[فنان]

وفيك بارك الله ياأختي
اني نقصد الكنافه متع القشطه الحجم الكبير توضع في صحون ومن العاده تنحط بروحها وكان بيدري حلويات ديري 4 حاجه بشكلاطه وحده تكون معسله زي المحنشيه علي سبيل المثال و2 ثانيا خليهك تقليديات (المقروض _ المالحه بالتمر او العاديه_غريبة_غريبة حلقوم )وانتي وراحتك لكن التنوع يرضي كل الاذواق
وملقيتش صور للعلب بش نوصلك الفكره لكن قصدي انه في علب متع بقلاوه لاصقه فيها من فوق ورده صغيره متع كوفيتي اني مش عاجبيني وميناسبوش مناسبه زي هادي لكن في وحدات زي الورده او عرف الورده للكوفيتي حلو منظرهم وارقي
ومحل الاكسورات نقصد اكسوارت علب البقلاوه والعبمبر وماالي ذلك
وانشاء الله انكون افدتك

[عنود الصحراء]

كتومه ياحبيبه انا من طرابلس وعطينا افكار حتي في التنسيق والاكسسوارات يالغاليه

[أمـ ساره]

ماشاء الله فنان ما قصرت

بالنسبة للتقديم زي المعروف الشوكولاته في الاول وتكون نوعية جيدة مش شرط غالية

وبعدها فيه من يدير روزاته وعبمبر والعبمبر فيه زي الأكياس يوضع فيها قنينة وبسيطة


وبعدها العشاء الأغلب يكون خفيف أرز أبيض بالكبدة والمكسرات

ومعاه مشقشقات حوالي 4 حاجات أنينفضل الحاجات التقليدية

زي الطاجين والبوريك المبطن أو كباب أو حسب ما تحبي

وطبعاً السلطات 2 أو 3 سلطات يكفوا

فيه أشكال ألوان منها زي سلطة الباذنجان وهي مفضلة عندي

والسلطة المشوية وسلطة الجزر وكل يوم يطلعوا حاجة جديدة


أو ممكن اديروا مسقي ومعاه مشقشات حاجتين أو 3 وطبعا المسير والسلطات

أمي ربي يحفظها تفضل يكون العشاء مسقي اتقول عليه القيمة



وبعد العشاء يجي الشاي نحسه أفضل

لأن مرات العشاء يكون على عجلة وديمة تصير عندنا نحن الليبين

تلقي الرجالة راكبة فيهم النار هيا هيا ما عندهم صبر


تقدري اديري شاي وحلويات(( يفضل تكون حاجتين زمنيات والباقي وحدة بالشكولاته

وحاجة معسلة أو مالحة )) أو نسكافيه وحاجة حلوة زي الكيكة

أو الكنافة بالقشطة زي ماقالت فنان لأنها حلوة ونازكة وبنتها مش عادية


وبعدها طبعا ممكن اديري مكسرات حسب رغبتك وحسب التكاليف

وهذا يعتمد على العدد طبعاً



هذا بالعموم وحسب الي معروف بس يا وخيتي مش لازمة كثرة الحاجات

وكثرة المصاريف حتى لو الواحد حالته مرتاحة المهم الهني

وأنكم اديري الواجب مع ضيوفكم


وربي يعينكم ويتمم عليكم بالخير والهني



وننصحك تمشي للمعامل الي تخدم في الحار وتشوفي شنو عندهم

لأن كل يوم تطلع حاجات جديدة ومتنوعه