[مخلل الليمون] من مطبخ سحابه صيف

**سحابه صيف** · 12-17-2010, 12:26 AM

السلام عليكم

جايبتلكم طريقه روووووووعه للمخلل اليمون

انا اول مرة انطوقه في تونس جابوهولنا في الفندق مع العشاء بصراحة

روعه روعه وعجبني ومن هداك اليوم وانا اندور في طريقته جربت اكتر

من طريقة بس مجوش نفس البنه لين حصلت الطريقة هادي وبدت

معتمدة عندي وميخلاش حوشي منه هو ومخلل المشكل والمسير

المهم انجو للطريقة والمقادير

المقادير

ليمون العدد حسب الكمية الي انت تبيها +ملح +زعفران او

عصفر +كمون اسود (حبة سوداء ) والكل ببمقدار متساوي

الطريقة
ناخد اليمون الاصفر ونضعه في طنجرة فيها

ماء وانخليه يغلي لمدة عشرة دقائق

مدة الغليان تتوقف علي نوعيةاليمون

المهم بعد عشرة انشد اليمونة بين اصباعنا

لو حسينا انه اليمون بدت القشرة امتاع تلين طول انطفي

عليه لان لو خلينه زيادة يبدا ايلين هلبة ومعاش ايكون متماسك بعدما ايطيب

وبعدين نبدا انغيرله في ميه 4ولا 5 في اليوم لمدة تلاته ايام

باش تتحول المرارة امتاعه وكلما اتغيرت المية في اليوم اكتر كلما احسن

وبعد ميفوتو تلاته ايام ناخد اليمون ونشقها بجنب

يعني انديللها فتحه ونكون مجهزين الحشو وهو ملح وكمون

وزعفران وانخلطهم جميع وناخد حوالي ملعقه من الحشو

ونحشي بيه اليمون اندير نفس الخطوات لكل ليمونات

ونبدا انستفهم في البرطمان

انصب عليه المية وملح ونعصر عليه ليمون وفي وجه

انصب زيت زيتون باش ميفسش وانحط نص ليمون معصورة في الوجه

ووانسكر البرطمان وانخليه
لمدة اسبوع

يمكن المهم لين لما اطوقيه اتحسيه مفيشي مرارة وملحه

كويس طاب وبعدين صحيحة علي قلوبكم اعدروني

مصورتاش وهو طايب لانه اليوم بس درته

جربوه مش حتندمو
متنسوش تدعولي
وان شاء الله يعجبكم وتقيموني

**نوارة ليبيا** · 12-17-2010, 12:28 AM

شكله قنين

تسلم ايدياتك يالغالية

ان شاء الله نجربه ^_^

**أمـ ساره** · 12-17-2010, 12:34 AM

ماشاء الله سحابة

شكله ايهبل سلمت ايدياتك

**أم أيوب** · 12-17-2010, 12:43 AM

تسلم ايديك سحابة

عادي لو نضيفوله فلفل أو هريسة في الحشوة؟؟؟

**سحابه صيف** · 12-17-2010, 12:53 AM

اقتباسالمشاركة الأصلية كتبت بواسطة زهورة الأمورةتسلم ايديك سحابة

عادي لو نضيفوله فلفل أو هريسة في الحشوة؟؟؟

نورتي الموضوع زهورة
عادي حبوبة انا مرات اندير معاه في روس فلفل حار وايجي طعمته روعه