تشيز كيك بالفرن
المقادير:
1 بكيت بسكوت دايجستف
اصبع زبدة 100 غم
12 حبة جبنة كيري أو علبة جبنة فيلادلفيا 200 غم
1 كوب كريمة حامضة (الكريمة االسائلة الخاصة بالحلويات الموجودة في قسم الألبان مكتوب عليها سور كريم)
1 بيضة
1ملعقة صغيرة فانيلا
3/4 كوب سكر
3 ملاعق كبيرة طحين
الفراولة أو البيري الخاص بالتشيز كيك
الطريقة:
1) بتذوبي الزيدة على نار هادية وبتجيبي البسكوت وبتطحنيه بالخلاط وبعدين بتخلطيه مع الزبدة لعند ما كل البسكوت ياخد الزبدة بس ما يصير دهني كتير يعني مو شرط تستخدمي كل الزبدة وبتفرديه بصينية التشيز الكيك (الصينية يلي بتنفتح عن جنب).
2) أول شي في الخفاق بتخفقي الجبنة لتصير لينة وطرية وبعدين بتضيفي السكر وبعدين البيض والفانيلا وبعدين السور كريم والطحين وبتخفقيهم منيح وبتصبيهم فوق البسكوت في الصينية.
3) بتحمي الفرن قبل 10 دقائق من الخبز وبتدخلي الصينية في الفرن على درجة حرارة 180 وبتخبزيه متل الكيك مدة 45 دقيقة.
4) بتطلعيه من الفرن وبتستني عليه ليبرد ساعة وبندخله للتلاجة مدة لا تقل عن 6 ساعات ويفضل لتاني يوم وبتفتحي القالب من جنب وطبعاً قبل ما تفتحي القالب من جنب بتمرري سكين عشان لو فيه شي ملزق من الحواف ووبتحطي عليه بلو بيري وأنا هو حطيت عليه مربى فراولة لأنه ما كان عندي بلو بيري.
ملاحظة: يمكن مضاعفة الكميات للحصول على قالب بسماكة أعلى مع المحافظة على سماكة البسكوت 1 سم..
وصحتيـــــــــــــن وعافيـــــــــــــــــــــة
المفضلات