[ الهريسة الليبيه ] من مطبخ لوبا بالتفصيل والصور

**luba** · 05-02-2012, 12:46 AM

السلام عليكم ورحمة الله وبركاته

اليوم نقدم لكم الهريسة الليبيه من مطبخي وفي الغربه و في الخارج الفلفل بارد وقشرته غليظه ولكن لا يأس مع الحياة الا ناكلوا هريستنا
نغسلوا الفلفل وهما روس قبل مانفتحهم

نشقهم بالموس ونشيلوا منهم الزريعه اللي بالداخل

انملحهم و نخليهم يسقطروا يعني يصفوا اميتهم بعد امتصاص الملح حوالي 4 ساعات او ليله عادي وهنا طريقتين للتصفيه بالصور وحدهبالصفاي والتانيه بكيس البصل بعد غسله

نرفعهم وننشرهم في الشمس لمده 24 ساعه او اكتر علي حسب انت ماتشوفي جفافه وكيف تحبيها ناشفه او لا
انا هنا بسبب الوضع الزمني نشرتهم في دار وفتحت عليهم الشبابيك الطقس لايسمح بالخروج

يتم رحيها في الماكينه مفرمة اللحم مع التوم

وبعد الانتهاء من الكميه من التوم والفلفل نخلطهم بالكرويه المرحيه وكمون الحوت المرحي و الكسبر المرحي وتشوفوا الملح كلن حسب دوقه

وصحتين وهناء

بالنسبه للمغتربين اللي يعانوا نفس معاناتي من قله الفلفل الحار في الخارج الفلفل اللي عندي بارد مافيه اي حراره وقشرته غليظه فقررت نخليه حااااار
ناخد طنجره ونحطوا فيها زيت كميه واجده يعني تغطي نص اللي تحطيه من الفلفل المرحي ونحطوا عليها فلفل اللي رحيناه و الفلفل الاحمر البودره الحار وهدا اختياري
ونخلوها تغلي لحد ماتتخلص من الميه ويطفح الزيت فوق في الاول النار متوسطه مع التحريك مره مره وبعد ماتنقص الميه متاع الفلفل نخلي النار هاديه ونخليها 3 دقايق مع الزيت
ونرفعوها وبعد تبرد تحفظوها في الفريز

وتسلملي يارب ست الحبايب اللي علمتني هالطريقة

وان شاء الله تعجبكم

**مغتربة 7** · 05-02-2012, 01:43 AM

بسم الله ماشاء الله لاقوة الا بالله
محلالالالالالالالالالالالالالالالاها تهبل وجت فى خاطري
وياريتني نحصله الفلفل هذا حتى كان بارد عادي
بصراحة هريسة مش عادية من تحت ايدياتك
تسلم الايادي
وتستاهلي احلى تقييييييييييييييييييييييييم
وقوليلي حبيبة شن اسم المحل الى خديتي منه الفلفل هذا

**أمـ ساره** · 05-02-2012, 01:59 AM

ماشاء الله لاقوة الا بالله

هريسة اتهبل وتجي في الخاطر سلمت ايدياتك

والله الليبيات فالحات وين ما ايحطوهم يديروا حل ما يحتاروا بكل

بالهني والعافية حبوبة

وأحلى تقييييم لك وللموضوع

**تسنيم** · 05-02-2012, 02:13 AM

هريسة تجي في الخاطر ابدعتي اختي الكريمة

**sweet nona** · 05-02-2012, 02:17 AM

مممممممممممم

صدقت مغتربة الغالية اتهبااااااااااااااااااااااااال
خاطري فيها غير قلة فضوة بس

تسلم ايديك ويعطيك الصحة عالمنظر الحلو والي يشهي

احلى تقييم لبنى النويشطة

**دانة ليبيا** · 05-02-2012, 03:45 AM

سلمت يداك لبنى
وصحبتي ع الافكار الرائعة

**أم خديجه** · 05-02-2012, 07:11 AM

تسلم ايدياتك علي الهريسه

ويعطيك الصحه

**sozy** · 05-02-2012, 09:13 AM

يسلمن الايادي شكلها يشهي مفيش احلي من الهريسة العربية امتاعنا

**زينب محمد** · 05-02-2012, 09:38 AM

ماشاء الله لاقوة إلا بالله

هريسة تسهف وتستحق التقييم

رياقتي سالت معنديش الروح معاها

الله يسلم ايديك ويعطيك الصحة والعافية حبيبتي

صحتين وهناء على قلوبكم

ننتظر منك مزيداً من المشاركات والموضوعات والتطبيقات