[أفكار] طريقة شراء الخضار وتخزينها

[ريكا]

السلام عليكم ورحمة الله وبركاته

كيف حالكم اخواتى انشاء الله كلكم بخير

كيف تشرو فى الخضرة من السوق هل كل اسبوع ولا امتى ما تستحقى حاجة تبعتى

بالنسبة ليا مدايرة قائمة بالخضرة الاساسية هالى نحتاجوها كل يوم ونشرى فى الخضرة كل اسبوع

و فى ايام خاصة بسوق الخضرة تلقى الخضارين جايبين الخضرة مرات جديدة نشريها وقبل ما نحطها

فى التلاجة نغسلها كلها ونحول فى الاجزاء هالى معاش تنفع زى البصل الاخضر الحواف بتاعه

و طبعا معاد السلاطة الخضرة لايمكن غسلها . ونجفف الخضرة بعدين نصنفها فى التلاجة كل نوع

يفضل بروحه وهكى خضرتك نظيفة فى تلاجتك وتقعد حتى خمسة ولا ستة ايام وما يصيرلها شى.

[دانة ليبيا]

سلمت حبوبة على النصيحة
جعلها الله في ميزان حسناتك

[لوتي]

مشكورة علي النصيحة فعلا غسل الخضرة قبل وضعها في الثلاجة يوفر عليك الغسل في وقت تحضير الطعام وبالتالي الطبخ يبدا عندك ساهل ومتستصعبيش موضوع الطبخ أني أنأيد الفكرة علي الأقل لما خضرتك واتية يبدا طبق السلطة عندك يوميا علي المائدة بدون تعب ومعروفة السلطة قديش مهمة وفيها فوائد لكن العديد من النساء عندهم طبق السلطة ياخد وقت وخاصة العاملات لذالك ميحضروش فيها طولت عليك لكن حبيت انوصل المعلومة

[شروق الشمس]

مشكورة حبوبه عالطرح الرائع
و جزاك الله خيرا

[om_adnan]

بارك الله فيك ريكا على المشاركة,فعلا التنظيم مهم.

[أمـ ساره]

موضوع حلو أختي ريكا وفعلا

نستفيدوا من خبرات بعضنا في موضوع الخضرة

بالنسبة لي زيك تقريبا

الاساسيات ناخد فيها كل اسبوع

زي البصل والبطاطا والطماطم الاخضر والفلفل الحلو و

الباقي حسب ما نحتاج او ما نبي نطيب

لكن في الاسبوع نخضر مرة بس الا لو جوني ضيوف


بالنسبة للخضار الورقية ننضفها لكن ما نغسلها لو كنت بندير بيها محشي

لكن لو نعرف نفسي ما نستحقها نغسلها بعد تنظيفها ونحطها بالفريز

وكل ما نحتاج نستخدم منها شوي

هدا الي في بالي توا ولو اتفكرت شيء نرجع ان شاء الله

[مغتربة 7]

ماشاء الله موضوع رائع حبيبتي ريكا

نفس الشي حتى اني اسبوعيا نشري الخضار
وعندي ليكم نصيحة تغليف الخضار بالبلاستك الخاص يحفظها وتقعد فرش
والنعناع نلفه فى منديل ونحطه فى حافظة نفس الشي يقعد فترة طويلة

تقبلي مروري حبيبة

[luba]

تقريبا زيك وزي مغتربه في اللف بنايلون البلاستيك
ولو بستعملي. المعدنوس بعد 4 ايام يفرم ويوضع في حافظات مفروشه بالورق الابيض ورق السحب
ويكون المعدنوس مش مغسول ويغطي بورقه بيضاء يبقي فرش
وادا غسلتيه حطيه في حافظات بلاستيك ويبقي اخضر لمدة طويله

[مغتربة 7]

يسلموا لوبا على الافكار
ايه حتى اني المعدنوس زيك بس لو نبيش نستعمله نغسله ونقرضه وانحطه فى ساندوش باق وفى الفريز نلاقه وقت ثاني

[ريكا]

السلام عليكم ورحمة الله وبركاته
اخواتى العزيزات
دانة ليبيا
لوتي
شروق الشمس
ام عدنان
ام سارة
مغتربة 7
شكرا على كلماتكم الرائعة

تحياتى على مروركم الكريم