[مشاركة في مسابقة فنانة الخبزة الليبية] خبزة ليبية في الفرن من مطبخ لوبا

**luba** · 05-13-2012, 04:27 AM

السلام عليكم ورحمه الله وبركاته

الخبزة الليبية في الفرن

بسم الله نبدأ

مكونات العجين :

4 كوب دقيق - 2 كوب ماء دافي - 2 ملعقة كبيره خميرة سريعه

- 2 ونصف ملعقة كبيره سكر - نصف ملعقه صغيرة ملح - زيت زيتون

طريقه العجن :

السر هنا في هده الطريقه

نخلط المكونات الجافه مع بعضها تم نضيف الماء ونعجن

ونخلي العجينه رطبه زي المستكه يعني تلصق في الايدين

نجي نصب عليها كميه كبيره من الزيت

اعتقد حولي النصف كوب زيت زيتون ونعجن ونسبك

وحتلاقي الزيت امتص ترجعي تصبي كميه قليله تانيه

وتحسي العجينه ماعاد بتشرب وتسبكي زين ووتلفيها كويس ونخلوها تتخمر

بعد التخمير

نقرصوها بحيت ناخد من العجينه قرص بدون مانسبك القرص

يعني دوب نلفه وتتكون كوره صغيره بدون ضغط قوي ونخلوها ترتاح ربع ساعه

ونفرد العجينه بالشكل اللي نبيه

ونخلوها تتخمر حتي تلاحطي الانتفاخ

وندخلوها لفون حرارته 230 درجه مئويه من تحت وهنا السر التاني بالنسبه ليا

نطلع الخبزة من الفرن لما نشوفها نشفت من فوق ودارت طبقه جافه

عليها ندهنها بزيت الزيتون علي الوجه كله

ونرجعها للفرن لاكمال الخبز والتحمير

وبعد اطيب من تحت نحمروها وبالهنا وهيا زي النشافه يعني تتنفس

وماتغسيش بيها حتي لو اكلت لوحدها وان شاء الله تعجبكم طريقتي

**om_adnan** · 05-13-2012, 04:34 AM

خبز ايسهف ,مشاركة مميزة وخصوصا سلة الخبزة مع الاسم فكرة عجبتنى,بعد أذنك حنطبقها,أحلى تقييم ليك لوبا.

**luba** · 05-13-2012, 04:37 AM

هدا شرف لينا ام عدنان انك اطبقي اي شي في المنتدي
وشكرا للتشجيع والمرور والتقييم

**مغتربة 7** · 05-13-2012, 04:45 AM

بما ان سلفتي ماتعرفش تاخد الصورة خديتها نقسمها اني وياها الخبزة

بسم الله ماشاء الله لاقوة الابالله
شن انقول يالوبي عيوني طلعووووووووووووووووووو
شن ها الجمال والرعايش
بصراحة خبيزة تاااااااااخد العقل
تسلم الايادي الى تلتف بالحرير
احلى تقيييييييييييم لعيونك
موفقة فى المسابقة