[ المكدوس ] من مطبخ لوبا

**luba** · 05-13-2012, 08:32 PM

السلام عليكم ورحمة الله وبركاته

المكـــــــــــــــــــــدوس

نقدم اليوم ليكم المكدوس ولاول مرة نديرة في حياتي وان شاء الله حيعتمد
عندي في البيت من بعد النتيجه اللي تحصلت عليها
نشكر صديقه ليا ويسلم ايدين امها اللي دوقوني المكدوس السوري ولكن هما ليبيين
ومنها قررت لازم نديرة ونغير الفكرة السيئه
اللي خديناه عليه من شراء الواتي

المكونات :

بادنجان نوع صغير او متوسط - ملح - زيت زيتون - هريسه عربيه

اومن المحلات اللي يصنعوها في البيت - فازو زجاجي

نرفع راس البدنجان باليد بدون استعمال السكين

نغسله وندير فيه شق في المنتصف ومايوصل للجهه الاخري بعدين بنحشوه

نحطه علي النار ونحط عليه تقاله عشان مايطفو فوق ونخلوه من 20 الي 30 دقيقه

نضغط عليه بصوابعي كان قريب مسيتي القلب ولقيتيه رطب شويه يعني طاب

نغسله بالميه الباردة عشان قلبه يقعد ابيض مايسود ونخليه ينزل الميه ويبرد علي الاخر

بعد يبرد نحشيه في مكان الشق اللي درناه بملعقه صغيرة ملح علي طول الشق

ونردهم للصفاي ونرش عليهم من بره ملح

ونخليهم في الصفاي ونحط عليهم منشفه ونحط عليهم تقل اني حطيت حوالي 7 كيلو ونخليهم يومين او تلاته
وتشوفي الصحن من تحت كل مرة تفرغي الميه اللي تحت الصفاي لين تنتهي ماعاد يطلع تاني

ونحشيهم بالهريسه في مكان الشق ونحطهم في فازو ( برطمان) نظيف زنستفهم كويس ونغمرهم بزيت الزيتون

ونخليها لمده ساعات تحتها صحن عشان تخرج منها الفقاعات الهواء ونسكر عليها ونحطها في دولاب او اي مكان بارد
لمدة لاتقل عن 8 او 10 ايام
شن رايكم تراجو معاي 10 ايام وتشوفوا النتيجه

وبعد 10 ايام من الصبر والمراقبه والخوف

وتعالي دوقي البنه الرهيبه والحمد لله غيرنا الفكرة السيئه وان شاء الله دوم نديره
ارجوا التطبيق وان شاء الله مش حتندموا

**sweet nona** · 05-13-2012, 08:51 PM

لبونة مممممممممم

شن هالمنظر اللذيذ شوفتيني الصراحة

عمري مادرته وانشوف في طريقته هلبا بس خايفة انجربه

ولا شكل الهريسة العربية ماشالله صحتين علي أكل هالصحن

تقييم 5 نجمات لعيون المكدوسات

معنديش صبر نستنى 10 ايام ههه

بس مادام النتيجة هكي باذن الله انجربه

**sweet nona** · 05-13-2012, 08:59 PM

كافهمتش لهني..كيف انحط الصحن هيا مش في فازو وبعدين مش مغطيتيها

..وكم نسبة المية فالاول ياريت اتجاوبيني لولو

**مغتربة 7** · 05-13-2012, 09:13 PM

بسم الله ماشاء الله
شن هاالجمال يالوبا
الصراحة مكدوس ايجي فى الخاطر ماعمري ما ضقته لكن نعرفه
تسلم الايادي الى تلتف بالحرير
الى التقيييييم طول
جاري التطبيق

**أم ميوسة** · 05-13-2012, 10:31 PM

لوبا شن الفن هادا كله

تعرفي خاطري موت نجرب المكدوس

باللوز الخزايمي والهريسة العربية

وانتي شجعتيني

والطريقة اللي في راسي تشبه طريقتك

ومنك استوضحتها اكثر

تسلم ايدياتك لوبا

بصراحة مكدوسات مش عاديات

ياريته الصونية قدامي بس

خيرك عليه اليوم هههههههه

احلى نجيمات للوبا الحبوبة

**ميرولاكى** · 05-13-2012, 10:38 PM

يهبببببببببببببببل تسلم ايديك
نحبه المكدوس وشكله ماشاء الله
صحتين والف عافيه
وممكن تضيفيله الجوز فى الحشو

**ام سحر** · 05-13-2012, 11:34 PM

مكدوس يجي في الخاطر قداش نحبه نموت فيه
الله يسلم ايديك وصحتين على قلوبكم

**luba** · 05-14-2012, 12:54 AM

سويت تغطيه بالزيت مش الميه وتخلي تحته صحن لوكان معبي لفوق . رايتبزع الزيت لما يتفرغ منه الهواء وتسكري عليه وتحطيه في الدولاب اني كلهم 4 بدنجانات هدا مالقيت حجم صغير ومتوسط تغطيه زيت لحد ماعاد يبان بادنجان علي برة