[مشاركة فى مسابقة صاحبة أجمل فكرة مطبخية ] من بنات افكاري من لوبا

[luba]

السلام عليكم ورحمة الله وبركاته




هدي من بنات افكاري يعني مافي شي نرميه وادا ماترمي شي لازم تكوني مرتبه يعني تحطي هالحاجات
في اماكن معينه لمدة قصيرة وادا مااستفدتي منها ارميها لانك لو خليتي كل شي بديري حوسه لروحك
الترتيب اساس الحياة في كل شي

من مدة درت بسكويت علي شكل هلال بسكويت جوز الهند ويبي تزيين خطوط يعني كل مانقدم منه لازم نزينه ولو ماتبي عادي بدون لكن اني عندي بالتزيين احلي ودرت اقماع وتشركن وتبهدلت منهم ماهو صاحبتكم ايديها الاتنين ايسار لين جت هالفكرة علي بالي
نستعمل شرنقه ( متاع استعمال المستشفيات) والله ماعرفتلها اسم ونعبيها شكولاته ونحفظها في كيس نايلون في التلاجه وكل مانبي منها نحطها لتواني في الميكروويف او نخليها برة ونزين بيها وهكدا




وفي بعض الحاجات اللي نشروها ونستفيدوا منها وخليكم مع الصور تشرح اكتر





وهدا صحن عادي ونستعمل فيه لحافظه لي الكيكات وفي منه من الحجم الصغير حتي كبير قريب 6 احجام نحط الكيكه علي الغطاء ونغطيها بالصحن يعني بالعكس




وهده نصيحه من زوجي وين كنت نقطع البصل والله لدرجه ننصاب بالدوخه لين قالي لازم تقصيه تحت الميه علي نصفين بس والباقي كملي بره علي اللوحه والحمد لله معاد نعرف دموووع
وجربوا وقولولي



وهدي شوية دردشه من افكار بنت عمي الله يناولها اللي في بالها
1- مررة ماعندها معدنوس تبي ادير براك دارت بديل له في الاكل اعشاب الجزر وكلوها وعجبهم ولكن ماخبرت حد لو اني مكانها مانديرها علي معرفتي بخوتها
2- تقلب في طاوله بلاستيك صغيره وتزرع فيها في القمح وتضيفه في السلطات مقرض رقيق ( هدي تو تعجب الساجدة لله الامر صحي )
3- تزرع النباتات في احواض تفساس اللي يحمي في التلفزيونات والتلاجات

وســــــــــــــــــــلام

[مغتربة 7]

عجبتني هلبة الفكرة هذه

ماشاء الله عليك يالوبا قاموس افكار
كل فكرة احلى من اختها
يسلموا يااحلى لوبا
مشاركة رائعة وتستحق التقيييييييم
فى انتظار المزيد

[بنت حواء]

ماشاء الله أفكارك حلوة وساهلة........... بالتوفيق ان شاء الله

[sweet nona]

لبنى شكراا عالمشاركات وافدتينا

موفقة

وكل الشكر ليك ...قيمتك

[أمـ ساره]

سلمها يا ربي وسلم افكارها الحلوة

بجد افكار مميزة وبسيطة واغلبها نقدروا نستخدموها

مشاركة مميزة لوبا

ونستنوا المزيد والجديد منك

[om_adnan]

وين يالوبا سرعة صاروخ,انا توا قاعدة نعصرفى عقلى بيش نطلع فكرة,خليتينا لازم نفكروا أكثر,ليك أحلى تقييم.

[بنت الاشراف]

بارك الله فيك افكار رائعة

[luba]

شكرا لكل من قيم ومر وشارك بارك الله فيكن
يا ام عدنان هدا مش مني من التنقل وخيتك ماتبي تشري هلبه حاجات
ووين نتنقل مانرفع في شي والله في بريطانيا خليت وراي دبش لين عيطت عليه
بتقوليلي روحي بيه شنو بتروحي بالملابس والا بالهدايا ولعيلتين وشوفي عددنا اليبيين
اما بالنسبه لفكرة الشرنقه ماجت لين قريب فسدت نص فازو شكلاته
المهم في نتيجه
ماترمي شي اول ماتشريه وخاصه الحاجه المتينه اللي تتحمل
كان تبي افكار العاب صغار لتعليم الحروف والارقام نعطيك هههههه بس فيها هروله
منها رياضه ومنها يشغل دماه

[أم خديجه]

ما شاء الله ايوه طلعن الافكار
بارك الله في صاحبة فكرة المسابقه
والتي عن طريقها اكتشفنا
المختره لوبا

لوبا طلعي مازال عندك اكتبيلنا افكار لعب الاطفال خلينا نستفيدوا من خبرتك
ربي يسلمك لعيلتك

[luba]

هذي الاوراق نعلقوها متلا في حجرة تانيه تكون قريبه من نقطه الانطلاق للهروله



هدي القصاصات نقلبوها ونطلعوا الحرف والطفل يقراه وتجري انت وياه من ايجيبها هو الاول ولما يلقاه تخليه يقراه مرة تانيه
ويقري الكلمه اللي تحت لازم تكون مرسومه وتقوليله شوف الكلمة وين الحرف متلا الف وهوه يحط صبعه عليه وتقولي كلمه اسد تبدي
بحرف الالف
ونفسها الارقام وان شاء الله تعجبكم من بنات افكاري