[مشاركة في مسابقة أفضل طبق كسكسي]كسكسي بالحوت من مطبخ sweet nona

[sweet nona]

المقادير:

كيس كسكسي

سمك بالكمية المطلوبة

تتبيلته[بصل مفروم+ثوم مدقوق+ملعقة خل+عصير ليمونة+كمون حوت+فلفل أكحل أو أخضر+ملح]

3 حبات بصل

4 قرورن فلفل أخضر+4 حبات بطاطا+3 حبات باذنجان

زيت ذرة

1 ملعقة من[كركم+كمون حوت+كروية+زنجبيل ناعم+ملح]

2 ملعقة معجون طماطم

الطريقة:

تبلت الحوت قبلها في الليل وطيبته فالكوشة بعد طلعت منه سمكتين للكسكسي





واستخدمت الحبة المتوسطة من الكسكسي




نرش على الكسكسي شوية مية وملح وزيت حوالي اقل من ربع الكوب

تكبر الحبة شوي بهالشكل



وانخليه 10 دقايق ايجف وانكون حاطة المية ومجهزة الكسكاس وانصبه



خديت السمكتين وحولت الشوك امتاعهم والراس والذيل



قطعت البصل جوانح وفي طنجرة فيها ربع كوب زيت ذرة حطيته



ومعاه السمك



بعد قليتهم شوي ضفت معجون الطماطم والبهارات والملح



ونحرك لين نقلي الطماطم مع البهار ويتغير لونه ويطلع الزيت



نصب المية كيف ماتبي المقدار امتاعك



الخضرة رشيتها بشووية زيت وملح وطيبتها فالكوشة



بعد تكونك طبقة من الدهان ايكون الكسكسي شبه طاب انسقيه بشوية من الطبيخة

ونصبلها الحمص الواتي وانغطي الطنجرة




ونعاود انحطه في الكسكاس لين ايطيب



الفلفل فتحته من النص ورشيته الملح وشوحته فالزيت هكي عندي فيه بنه زايدة



وتوا كل شي طاب نبدا في تجهيز الصفرة

انصب الطبيخة والخضرة والحوت فوق الكسكسي




وصحتين



درت معاه شربة بالحوت وهادا كسيكسو بالحوت على قولت أم سارة




وكل وحدة فينا وطريقتها ويارب تعجبكم


**تقييمكم**

[مغتربة 7]

اه ياسويت عيونيييييييييييييييييييييييييييييي طلعووووووووووووووووووو وخديت السفرة كلها
شن انقول بس تبارك الرحمن على ايدياتك
كسكسي يهبل ماشاء الله وقعد فى خاطري
تسلم الايادي الى تلتف بالحرير
منورة بمشاركتك الرائعة
الى التقييييييييييييييييييييييييم طوووووووووووول

[مغتربة 7]

قيمتك انتي والموضووووووووووووووع تستاهلي والله

[om_adnan]

انا عزمت نفسى عند مغتربة,بصراحة ابداع وخصوصا الفليفلات ,صحة وهنا يارب,ليك أحلى تقييم.

[luba]

ماشاء الله تبارك الرحمان ولا حول ولا قوة الا بالله يعطيك الصحه وطووول العمر
سوسو يا سوسو شن درتي فيا وووك عليا عمري ماكليته
لازم نجربه اكيد الليله بنحلم بيه شرح واضح صور حلوة طريقه رااااائعه
طبعا قيمتك قبل مانشارك واحد يشوف هالجمال كله ومايحط الخمسه ماعنده دوووق بعدين
ومعاها قعدت ربع ساعه نتفرج راكبه نازله
قولي ان شاء الله وخيتك تصيد سمكات حلوات زي هدومه في رحله الصيد قريبا ونوريك تطبيقي
عمري لاكليته ولا درته

[luba]

غروبه 7 تميتي علينا كل الصحون اللي في المنتدي سادك
قريب تريحي 6 في 6 يالله اعزمي البنات معاك قوليلها يا سوسو

[مغتربة 7]

هههههههههههههههههههههه يعطيك الهني يالوبا
ماني نبي نقعد 6 فى 6 حق هذا علاش نازلة ليه ليه

[ندى]

سهفتيني بهل الحوتات والكسيكسو يعطيك الصحه وسلم الايدين

[بنت الاشراف]

ماشاء الله يسلموا ايدياتك يستحق التقييم

[ام سحر]

​حرام عليك تحطيلنا كسكي بالحوت طول..الطبق من احلى الاكلات عندي وما شاء الله جاي منك مش عادي وياخد العقل

الله يسلم ايديك وموفقة بادن الله وتستاهلي احلى تقييم