[مشاركة تشجيعية فى مسابقة صاحبة أجمل فكرة مطبخية ] أفكار من مطبخ أمـ ساره

**أمـ ساره** · 05-15-2012, 08:40 PM

السلام عليكم ورحمة الله وبركاته

هده مجموعة أفكار بسيطة وان شاء الله تفيدكم

الفكرة الأولى

طريقة عمل بشر برتقال او ليمون مجفف

ويستخدم في الكيكات كنهة

طبعا مافيه مقادير حسب الموجود وحسب الرغبة

قشور برتقال توضع في سفرة الجهة البيضاء تكون من فوق

وتنشر يوم او يومين في الشمس حسب الوقت والجو ثم تقلب على الجهة الاخرى

وتنشر داخل البيت او في مكان فيه ظل حتى لا تسود القشور في الشمس

وتترك حتى تجف جيداً جيداً

ثم ترحى في مفرمة اللوز أو السكر وتوضع في حافظة في الدولاب

يعني مكان جاف وبارد وتستخدم وقت الحاجة

الفكرة الثانية

طريقة حفظ الجزر وعصير الجزر

كمية الجزر الي تحبي تحفظيها بالفريز

يقشر الجزر ويغسل جيداً ثم يقطع حسب الاستعمال

مثلا اني قطتعه بطريقة نستخدمه فيها في طبخ الكسكسي او

الارز المسقي بالخضرة وحتى المكرونة المبكبة

ثم حطيته في كسكاس فوق طنجرة فيها ماء يغلي ويغطى

لمدة 5 دقائق او حتى يطرى قليلاً ثم يرفع من على النار ويترك ليبرد

ثم يوزع في أكياس بلاستيك الخاصة باللحم أو حافظة أو حسب الرغبة

ويوضع بالفريزر ويستخدم وقت الحاجة

أما عصير الجزر

الي تبي طريقته طبعا للأخت زينب محمد ربي يبارك فيها وفي وقتها وجهدها يارب

بعد ما نطبخ الجزر مع السكر ونخليه يبرد شوي

نقوم برحيه في خلاط العصير أو محضرة الطعام

ونضيف له عصير ليمونة وشوي زهر ثم نوزعه في اكياس اللحم أو اي نوع بلاستيكي

حسب عدد افراد الأسرة بكميات متساوية

ونحطه في الفريزر يجمد في يوضع في حافظة

ووقت الحاجة يخرج من الفريزر ويضاف له البرتقال او الليمون حسب الرغبة

وآخر فكرة تقريبا أغلبكن تعرفها بس طرحتها للفايدة

وهي للسلطة المشوية

لو نفس طريقتي في السلطة اني نحط الخضرة بالفرن بقليل جدا من الزيت

ونفتح عليها النار من فوق وتحت حتى تحمر زيادة ويصير لونها أسود شوي

وقتها نوسع فتحة في وسط الطاجين ونصب فيها زيت زيتون

ونطفي فيها فحمة والعة جمرة ونسكر عليها الفرن ونخليها حوالي

5 دقائق ثم نطلعها ونضعها في محضرة الطعام ونتبلها بالملح

والفلفل الاسود او حسب الرغبة

وتمتعوا بسلطة شهية ولا أحلى زي المشوية بالفحم

ان شاء الله افكار تعجبكم ونستنوا منكن أفكار مميزة

ثتروا بها القسم والمنتدى فلا تبخلوا علينا

**الصابرة** · 05-15-2012, 09:18 PM

افكار حلوة ويعطيك الصحة

اصلا المسابقة هذه بغض النظر من يفوز فيها

فهي فيها فائدة للجميع

بارك الله فيك ويعطيك صحيحتك

**luba** · 05-15-2012, 09:18 PM

بارك الله فيك يا ام سارة وربي يخليلك سارة وكل العويله
تسلمي علي هالافكار وخاصه فكرة الجزر عجبتني متاع الفريز
لانه مرات يفضل لين ييبس ومربي مايحبوه بس يحبوه مطبوخ شكرا شكرا شكرا
بارك الله فيك ويارب مايحرمنا من طلتك علينا

**luba** · 05-15-2012, 09:20 PM

صحيح كلامك يالصابرة لولا هالمسابقه راهوا
كل وحده ماطلعت اللي عندها ودساته في صريرتها
ولا استفدنا ولا فدنا وبارك الله في صاحبة المسابقه
والاحلي تميزالمنتدي بالاشياء اللي نطلعوها
واكيد تستاهل التقييم دايما اللي يعجبني نقيمه قبل مانشارك

**بنت حواء** · 05-15-2012, 09:26 PM

ماشاء الله ياأم سارة أفكار حلو
ووالله متاعة بشر البرتقال المدة اللي فاتت درتها وكان خاطري بنشارك لقيت روحي مش مصورتها الله غالب
مشكورة على الأفكار الحلوة........... وتسلم الأيادي

**مغتربة 7** · 05-15-2012, 09:35 PM

بسم الله ماشاء الله
افكار تهبببببببببببل
يسلموا على الافكار الرائعة
منورة
احلى تقيييييييييم لعيونك

**luba** · 05-15-2012, 09:45 PM

بالنسبه للبرتقال اني نبشر فيها طازجه ونحطها في الفريز
وفي الخارج البرتقال مرات حاله حتي كان نشروه مش بكميات اللي في ليبيا لانه مرات لافيه طعم ولا رائحه
فلهادا الجا الي البشر والفريز
ماعندكش فكرة علي حفظ التوم

**أمـ ساره** · 05-15-2012, 11:00 PM

الله يسلمكن ويبارك فيكن وخياتي

وهده افكار بسيطة حتى نشوفوا ابداعاتكن وافكاركن انتم

يالا ورونا شطارتكن حبوبات

لوبا

ياريت والله نعرف طريقة حفظ الثوم

لكن للأسف ما نستعمل فيه أبداً في بيتي زوجي ما يحبه