[مطلوب ] انقلاب محبة فى مطبخنا ..من معى؟

[om_adnan]

طلبى غريب ولكن.......المطبخ الليبى من أغنى المطابخ ,

وواضح أعتمادنا على اللحوم بأنواعها وبكميات ,المطبخ الليبى كريم وسخى كأصحابه,والحق يعنى فى بداية القرن الماضى,لم يكن هذا روتينهم اليومى ,نفكر كيف يمكن نفكر نأكل بطريقة صحية ليس للريجيم أو أسباب مرضية,نبيكم تقترحوا أفكار تكون نظام حياة متكامل,

نبدأ بفكرتين,الاولى نشوفى لصحنى هل يحتوى على سلطة وخضرة ..كم نسبتهم وليس ملعقتين,دائما التفكير بصوت قبل ما تضعى اللقمة فى الفم..هل أحتاجها؟,فى انتظار تعليقاتكم.

[الصابرة]

على حسب ما فهمت
الفكرة حلوة وهي الاكل الصحي دائما وليس بسبب الرجيم او لمرض معين
ياريت حبيبتي ام عدنان اتوضحي لي عشان اشارك اذا فهمت صح او خطاء

[luba]

م عدنان كلامك مزبوط تعرفي مرات ندير فيها لمانزيد شويه قرامات علي وزني ننتبه للصحن وقداش كليت وشنو كليت وخاصه لوكنت نلعب في رياضه لازم ننظرلكمية الكربوهيدرات وكمية اكلي يعني ناكل اي شئ حتي الشكولاه بس بمقدار كل شئ نقسم فيه الا شكولاته كيندر بيينو نحبها حتي صغاري ممنوع ياكلوها معاي

[مغتربة 7]

كلامك صح ام عدنان خاصة احني ماشاء الله اكلنا كله مركز لحم خروف ديمة متربع فى اكلنا والمقليات
مفروض الواحد ينتبه لى الاكل الى ياكل فيه من غير رجيم او مرض لاقدر الله
بارك الله فيك

[om_adnan]

شوفوا يابنات فكرتى,مطبخنا أيام أجدادنا كان أحسن ,أنا الحق غير راضية عن نظامنا الغذائي اليوم ,يعنى الا لم تصير حاجة انغيروا وخصوصا أعتمادنا على الكربوهيدرات وأنا وحدة إذا ما كليتش رز او مكرونة نعتبر نفسى ما تغديتش,نحن خلاص لكن الفايدة فى الاجيال القادمة,موضوع صعب صدقونى,مثلا لما نتلاقو فى بيت العايلة ,لاننا نتحشموا من الضيوف,اللى تجى يطلبوا منها صحن صحى.للحديث بقية...فهمتونى ؟؟؟لانى أنا عندى الفكرة بس مش عارفة كيف نبدأ

[om_adnan]

شكرا لاخواتى الصابرة, لوبا,مغتربة على ردودكم,الصابرة فعلا حتى لو كلامى ما كانش واضح أنتى فهمتى,كلامك صح لوبا,أنا لم ابتديت لما نبى نحط حاجة فى فمى,نفكر أولا تفأجات بكمية الاكل اللى ما كانش في له داعى,فى انتظار مساعداتكم.

[luba]

تعرفي امي علي كبر سنها ولكنها شاطرة جدا في السعرات الحراريه وحسابها احيانا تصدمني
وتجيب في رقم متلا لحبة الزيتون مرة قالتلي علي رقم السعرةو كم فيها طبعا ولا ندكر ولا هامني الموضوع عيووووني في الزيتون
وتطييبها احيانا صحي دايما تقول ماتقلي الاكل يعني البدايه متاع الطبيخه لا هيا تحط الميه مع البصل تغلي وبعدين اضيف المكونات
وصدق من قال الام مدرسة ادا اعددتها اعدت شعبا طيب الاعراق
ياااارب يخليكي ليا يا امي
وعندها هلبه حاجات ان شاء الله لو تفكرت منها نقولك
علي فكرة ياريت كلنا نتبعوا الرياضه وتقدروا تلعبوها حتي في البيت والله علاج للامراض المفاصل والعضلات الله لايوريكم الم المفاصل

[om_adnan]

الم المفاصل أصحاب انا وايه وله علاقة مباشرة بأكلنا,ماتنسي السلام لماما,فعلا الام مدرسة عفوية,فى انتظار أفكارها ونحن علينا ننشرها..

[الصابرة]

انا توا فهمت
والله انا دايرة رجييم من غير رجيم بحكم عمل راجلي نلقى في روحي اكثر اكلي
السلاطة الجزر ماعنديش معاه روح والخيار بالدات كان اللي زارعته ماما معاش ناكل حاجة معاه لاني مانحبش ناكل بروحي
واللحوم انا عودت راجلي من يوم ما اتجوزنا ان ناكلو ا يومين في الاسبوع لحوم حمراء
ويومين لحوم بيضاء {سمك و دجاج}
ويوم دايرتها للوجبات السريعة المجهزة في البيت واكثرها تكون في الفرن
وهكذا وبالنسبة للضيوف انا ماعنديش ناس هلبة
ولما ننعزم انحاول اني ناكل بشوي حتى لا الفت نظر الناس اللي
يعني يشوفوا فيا ناكل لكن مانعبيش في الملعقة
ونطول وانا نمضغ
وهكذا والله بدون قصد تعودت هكي
ومايمنعش من الافتراس مرةمرة
لكن تكون بعد مدة
وامارس في رياضة 3مرات في الاسبوع لكن قولواشنو





نلعب بالحبل ومهناك حبل مقطعته من خيط الديجتل زايد
لان حوشي ضيق وراجلي مش مقتنع بحاجة اسمهانادي رياضي ولو
نبي نشري الة ماعنديش وين انحطها
وهذا روتيني ان شاءالله اكون افدتكم
المهم مش تعرفي شنو في المهم
ان تعرفي كيف تتحكمي فيه
حكمتي والحمد لله {الرغبة في الدين مش الرغبة في الشبع}

[sweet nona]

ام عدنان موضعك ممتاز

والرياضة وين واحني وين؟؟اني شخصيا من واني فالاعدادي نمارس فيها فالصبح قبل مانمشي للمدرسة ههه وندوش ونطلع في نشاط

وتوا بعد التخرج ..وكثرت الايام الي انعطل فيها..نظمت جدولي على نادي الفروسية نمشي ساعة يوميا ونروح اني واختي هوا بعيد شويا بس هادا هوا

بس توا بعد الاحداث وجاي البلاد بدت ملخبطة شوي مرة نمشي ومرة لا لين ترجع بلادنا هادية بعد الانتخابات يارب

اما الاكل بالنسبة ليا بنوتة فالحوش مش كل يوم انطيب الحق مش زيكم عاد بس من فضل ربي نبعد عالمقلي هلبا انحب الكوشة اكتر شي

وزي ماقالت لبنى مرات قلي الطبيخة هوا الي يضر وعلى قولتك يام عدنان.عرب زمان صحتهم قوية ماشالله ماكلتهم كلها شعير وقصب ولبن طازة

مش احني والله امي ربي يحفظها لتوا ادير فالسحلب والتلبينة وعيش القصب بحكم خبرتهم زمان وحياتهم وديما تعارك تبينا ناكلو بس هيهات

بالك هالموضوع اينشطنا..والريااااضة اهم شي وربي يعينا والف لاباش عليك ام عدنان احني اللحوم الحمراء انحاولو نبتعدو عليها الحق لينا هلبا

الا لو جاك ضيف او عندك مناسبة بس ها مرات اتجيهم النية عليها اني شخصيا الحوت عقلييي

طبعا اني كتبت جريدة هههههههه ..وفي النتظار برنامج يومي انعدوه باش ننتظمو ونحافظو على صحتنا

اني عندي فيه مرة مرة ..متلا يوميا نشرب في طاسة بردقوش قبل مانرقد او نعناع او كمون

بس مازاااااااااااااااااااااااااااااال الكتير

مشكورة ام عدنان