[ مشاركة في مهرجان الصيف ] سمك السلمون المشوي من مطبخ لوبا

[luba]

السلام عليكم ورحمة الله وبركاته

طبق اليوم سمك السلمون المشوي




ملاحظات : سمك السلمون يستعمل بدون غسل وكان غسلتيه تطلع بنه مش حلوة

اي نوع من الاسماك كان نويتي تخليه في تتبيله لمدة ساعات حطي كل التتبيلة ماعدا عصير الليمون والملح

الليمون حيهري السمك وصعب حتي التعامل معاه والملح بيطلع الميه اللي في السمك اللي بتطيبه

وتحطي الملح والليمون اول ماتنوي تطييبه

بسم الله نبدأ :

الطبق ماخليت عليه التبيله الا 5 دقايق لاني مستعجله كله علي بعضه خدي مني 20 دقيقه

سمكة سلمون وجلدتها من تحت موجودة وقسمتها نصفين وكل نصف تبلته تتبيله شكل




مكونات التتبيله للجزء الاول :

ندهنها بزيت الزيتون و نضع عليها نصف ملعقه صغيرة توم مرحي وفلفل اسود

وبشر برتقال او ليمون ( محفوظ في الفريز )

هنا استعملت البرتقال

و ملح وعصير ليمون ونحركها باليد دعك خفيف علي السمكه







مكونات التتبيله التانية :

ندهن السمكه بزيت زيتون ونحط توم و زعتر بري وملح وعصير ليمون وكمون حوت و فلفل اسود

وندعكه دعك خفيف









طبعا للي يحب يضيف عليهم بعد يطيبوا زبدة مقليه كويس وبعد نحولها من النار نصب

عليها شويه ليمون وهدي الحركه تهبل مع السلمون دقتها هنا في كندا

وكنت مستعجله ومادرتها



وكان معاهم طرف دجاجه وحده للي مش حياكل السمك

شلحت اللحم يعني فتحته كيف القديد

ندهنها زيت ونرش عليها ملح وفلفل اسود و بهارات هنديه ليبيه

خاصه للدجاج و ( التوم والليمون ) ولكن لم استعملهم هنا





ونغلف الطواجين بالسلفر ونحط فيهم اللحوم ونشغل الفرن من فوق ( الشوايه )

والسمك اخد 10 دقائق بدون تقليب والدجاج اخد 20 دقيقه او اقل مع التقليب












وصحتين وهنا وبسرعة البرق وان شاء الله تنال اعجابكم

[الصابرة]

الله الله انا نبي الدجاج السلمون مش اصحاب اني وياه واجد
ربي يعطيك صحيحتك وموفقة في المسابقة

[om_adnan]

أهلين لولو,انخاف انقول السلمون من رحلة صيدكم,انكون كثرت,أكلة خفيفة وحلوة.صحة وعافية عليكم,فعلا نصائح شيقة وحنجربها.

[luba]

الحمد لله درت معاه دجاج بيش نرضي كل الادواق وصحتين صبورة
اني زيك مانحبه هلبه بس امس عجبني بالهلخلطات وخاصه متاع بشر البرتقال

وشكرا ام عدنان لمرورك وتسلمي يارب لا مش من الرحله واعتقد مستحيله
مازال ماعدينا الطقس فيه هلبه ريح واليوم تلج مرة ومطر مرة قريب نهبل

[لوتي]

مشاوي حاجة تانية يسلمووو وخاصتا الدجاج منظرهم مش عادي وطول للتقييم

نبي نسأل كيف زبدة مقلية

[luba]

لوتي شكرا ل مرورك وتواجدك معنا
زبدة مقليه يعني تخليها تقلي لين يتغير لونها شويه
تحطي عليها شوي عصير ليمون وارفعيهاوصبيها علي السلمون جربيها وقوليلي والله حاجه تانيه

[زهرة البنفسج]

ماشاء الله ربي يبارك موفقة في المسابقة

[luba]

شكرا زهورة وتسلمي علي المرور والتشجيع

[ترهونيه حره]

يسلمووووو الايادى وجارررررررى التقييم

[مغتربة 7]

سبحان الله حصتي تراجي فيا ماشاء الله على حظي

بسم الله ماشاء الله سمكات ياااخدو العقل
يهبل السمك منظره انحبه وانحب الدجاج
تسلم الايادي الى تلتف بالحرير
ونجي النويشطة ياربي
مشاركة فى غاية الرووووووعة وتستحق التقييييييييييم