[ مشاركة في مهرجان الصيف ] لحم راس خروف في الفرن من مطبخ لـــوبــــا

**luba** · 07-03-2012, 12:57 AM

السلام عليكم ورحمة الله

لحم رأس الخروف في الفرن

خطراته عليا زينب محمد بس البالطه اللي بنقطع بيها واصله ليها يومين
عبر البريد وهيا نفضت عليا شويةالكسل من تنزيلها لموضوعها

الطريقة سهله جدا ولذيذة جداجدا وهدي تعلمتها من امي الغالية
ربي يعطيها الصحة وطول العمر

نقطع راس الخروف المشفشف بالنار ( اني سلخته بسبب عدم مقدرتي علي
تشفشيفة الصنه وماعنديش كيف ووين )
المشفشف تعني ( راس الخروف نحطوه علي النار او بي مسدس النار يستخدم
في الورش السيارات ونحرق كل الشعر حتي يصبح املس علي الجلد ونغسله جيدا بالماءوالليفة
والصابون والجهات التي بها شعر كتيف متل اخر الراس نقصه بالمقص تم استعمال النار )

المهم نغسلوه بالصابون والليفة ونقطعوه انفك في الحنك اللي فوق عن اللي
تحت باليد مجرد انعلم بالسكين ونفتحهم بقوة ونفرقهم علي بعض يطلع العظام اللي من الفك اللي فوق
والباقي الراس بالبالطه ( الشيته ) زيدي تشريح وتمشي معاكم واللسان نرمي فيه

ناخد نغسلهم كويس حتي بعد التقطيع و نحطهم في طنجرة تغلي فيها زيت و ماء وملح وبزار ( كركم ) كتروا منه
ونخليهم حوالي ساعه او اكتر حسب حجم الراس

ونرفع الريم اللي يتكون كل مرة

ونجهز طاجين فيه بطاطا مقطعه دوائر

ونحط عليها اللحم و3 او4 سواقم من المرقه بحيت تغطي البطاطا ونصبها علي اللحم

وندخلهم الفرن علي الرف السفلي والنار قويه ونخليها لين البطاطا اطيب
بعدين نرفعه فوق ونحمر الراس
وان شاء الله ماتصير عركة علي البطاطا بنتها تهبل

وان شاء الله يعجبكم

**الصابرة** · 07-03-2012, 01:06 AM

يعطيك الصحة والعفية.....ماشاءالله عليك .....تعرفي تقطعي رأس ....تبارك الرحمن ...قصدي رأس خروف

**حبيبتهم** · 07-03-2012, 01:11 AM

صحتين

**أم أيوب** · 07-03-2012, 02:42 AM

ماشاء الله يا لولو فالحة

وين حصلتيه راس الخروف في كندا؟؟؟

ربي يحفظك ويسلم ايديك يارب

بس ليش رميتيه اللسان هدا الجزء الوحيد اللي ناكله من راس الخروف

تستحقي التقييم يا لولو صحتين على قلوبكم

**om_adnan** · 07-03-2012, 03:24 AM

لا مش معقول لولو وراس خروف فى كندا,صحتين وعافية وسلم إيديك طالع منك صح,الوالدة تفخر انها علمتك ,ربى ايخليها ليكم.

**luba** · 07-03-2012, 03:40 AM

الصابرة شكرا لمرورك والتقطيع بطريقة سهله امي علمتهلي
كنت نتمني تكون يالصور غير ماعنديش من يصور واني شارقه
واكيد مش كل شويه نغسل ونقطع هي حرب صغيرة صحيتي عزيزتي